ბაკურიანის ერთ-ერთი სასტუმროს თანამშრომელს კორონავირუსის სიმპტომები გამოუვლინდა

სასტუმროში, სადაც იტალიიდან დაბრუნებული პირი მუშაობს, კორონავირუსზე ჩატარებული ანალიზის პასუხს ელიან. არის თუ არა ახალგაზრდა ქალი covid 19-ის მატარებელი - ეს დღის ბოლოს გახდება ცნობილი.

30 წლამდე ქალი იტალიიდან 21 დღის წინ დაბრუნდა, გუშინ კი სიცხემ აუწია. სასწრაფო დახმარების ბრიგადამ პაციენტი ბორჯომის სამედიცინო ცენტრში, ბოქსირებულ პალატაში გადაიყვანა, საიდანაც თბილისში გაწერეს.

სასტუმრო ბაკურიანში მდებარეობს. პრესსამსახურის წარმომადგენელი ამბობს, რომ მათმა თანამშრომელმა მაღალი მოქალაქეობრივი პასუხისმგებლობა გამოიჩინა და კლინიკას თავის დაზღვევის მიზნით მიმართა.

"როცა ეს გოგო ჩამოვიდა, 17 თებერვალს მილანში ასეთი მძიმე ეპიდსიტუაცია არ იყო. ჩვენ რეკომენდაციების მიხედვით ვმოქმედებთ, მაგრამ მაშინ არ იყო რაიმე სახის რეკომენდაცია გაცემული. აქედან გამომდინარე, ვიმოქმედეთ სიტუაციის შესაბამისად. მან გამოიჩინა მაღალი სამოქალაქო პასუხისმგებლობა და მივიდა კლინიკაში. აუღეს ანალიზები, მხოლოდ თავის დაზღვევის მიზნით. ველოდებით პასუხებს",-აცხადებენ სასტუმროს პრესსამსახურში.

რაც შეეხება სადეზინფექციო სამუშაოებს - კომპანიაში ამბობენ, რომ ამ პროცედურებს სასტუმრო ყოველდღიურად ისედაც ატარებს.