კორონავირუსთან დაკავშირებით პარლამენტში საჯარო ღონისძიებები შეიზღუდება

კორონავირუსთან დაკავშირებით საკანონმდებლო ორგანოში საჯარო ღონისძიებები შეიზღუდება. ამის შესახებ პარლამენტის თავმჯდომარემ არჩილ თალაკვაძემ ბიუროს სხდომაზე განაცხადა.

"მინდა გთხოვოთ, მაქსიმალურად შეზღუდოთ საჯარო ღონისძიებები, რომელიც დამატებით იმართება პარლამენტში და შემოვიფარგლოთ მხოლოდ იმ აუცილებელი სხდომებით და პროცედურებით, რომელიც ამ მომენტში პარლამენტის ფუნქციონირებისთვის არის დასაბუთებულად აუცილებელი", - აღნიშნა არჩილ თალაკვაძემ.

გარდა ამისა, არჩილ თალაკვაძის ინფორმაციით, კორონავირუსთან დაკავშირებით პარლამენტი სპეციალურ ბრძანებას გამოსცემს, რომელიც საკანონმდებლო ორგანოს წევრებს და თანამშრომლებს შეეხება.

"მომდევნო 12 საათის განმავლობაში გამოიცემა ბრძანება, რომელიც დაარეგულირებს კორონავირუსთან დაკავშირებულ ნებისმიერ შესაძლებელ სიტუაციას, ეს იქნება ძირითადად თვითიზოლაციასთან თუ კარანტინთან დაკავშირებული, ასევე სამედიცინო სამსახურებთან კონსულტაციისთვის.

ამ მომენტისთვის არცერთი პარლამენტარი, არცერთი თანამშრომელი არ იმყოფება კარანტინის რეჟიმში და არ აქვს კორონავირუსის დადასტურებული ინფექცია, შესაბამისად, პარლამენტი ამ მომენტისთვის ეფექტურად უმკლავდება ვირუსთან დაკავშირებულ სიტუაციას", - განაცხადა არჩილ თალაკვაძემ.