პასუხები კორონავირუსის შესახებ დასმულ ტოპ 10 კითხვაზე

მიუხედავად იმისა, რომ მსოფლიო ჯანდაცვის ორგანიზაციამ კორონავირუსთან დაკავშირებით, არაერთი განცხადება გააკეთა და რეკომენდაციები გასცა, საზოგადოებაში უამრავი კითხვა ჩნდება. ადამიანებს აინტერესებთ ყველაფერი, რაც ახალ ინფექციას უკავშირდება.

წარმოგიდგენთ პასუხებს 10 ყველაზე აქტუალურ კითხვაზე კორონავირუსთან დაკავშირებით:

1.რამდენ ხანს გრძელდება კორონავირუსის ინკუბაციის პერიოდი?

მსოფლიო ჯანდაცვის ორგანიზაციის ცნობით, ახალი კორონავირუსის ინკუბაციის პერიოდი 14 დღე გრძელდება, თუმცა ზოგიერთი მოსაზრებით, ეს პერიოდი 24 დღეს მოიცავს. ინფექციის სიმპტომების დაწყების საშუალო დრო 5 დღეა.

2.აქვს თუ არა გამოჯანმრთელებულ ადამიანს კორონავირუსის მიმართ იმუნიტეტი?

ამაზე პასუხი ჯერჯერობით ნაადრევია. ჩინეთში მიმდინარეობს გამოჯანმრთელებული პაციენტების კვლევები, რომლებიც პოზიტიურ მოლოდინებს ქმნის, თუმცა ამ საკითხთან დაკავშირებით დასკვნების გაკეთება ჯერ ადრეა.

3.რა განსხვავებაა გრიპსა და კორონავირუსს შორის?

გრიპი და კორონავირუსი მსგავსი სიმპტომებით ვლინდება, რაც ლაბორატორიული კვლევის გარეშე დიაგნოზის დასმას ართულებს. კორონავირუსის ძირითადი სიმპტომებია ტემპერატურის მატება და ხველა, მაშინ როცა გრიპი სხვა მრავალი სიმპტომით შეიძლება გამოვლინდეს, მაგალითად, ყელის ტკივილით. მაშინ, როცა კორონავირუსის ინფექციას სუნთქვის გაძნელება ახასიათებს.

4.რას გულისხმობს თვითიზოლაცია?

თვითიზოლაცია ნიშნავს 14 დღის განმავლობაში სახლში დარჩენას. სამსახურში, სკოლასა ან სხვა საზოგადოებრივ ადგილებში არ წასვლას და საზოგადოებრივი ტრანსპორტის ან ტაქსისთვის თავის არიდებას. ადამიანი, რომელსაც თვითიზოლაციის რეკომენდაცია აქვს, განცალკევებით უნდა იყოს ოჯახის წევრებისგანაც. თვითიზოლაციაში მყოფი პირებისთვის პროდუქტისა და სხვა საჭირო ნივთების კართან დატოვება, პირდაპირი კონტაქტის გარეშე, შესაძლებელია.

5.რამდენად საშიშია კორონავირუსი ასთმის მქონე ადამიანებისთვის?

კორონავირუსმა შესაძლოა ასთმის სიმპტომები გააძლიეროს. ამიტომ, ჯანდაცვის მსოფლიო ორგანიზაცია ასთმის მქონე ადამიანებს პრევენციისთვის ინჰალატორის ყოველდღიურად გამოყენებას ურჩევს, რაც კორონავირუსით გამოწვეულ ასთმის შეტევის რისკს მკვეთრად შეამცირებს.

6.თუ სკოლები დაიხურება, მიიღებენ თუ არა მშობლები ფინანსურ დახმარებას?

დამსაქმებლებს შეუძლიათ მოგცენ დრო სირთულეებთან გასამკლავებლად, მაგრამ ისინი ვალდებულნი არ არიან გაცდენილი დღეებისთვის გადაგიხადონ. თქვენ შეგიძლიათ მოითხოვოთ უხელფასო შვებულება.

7.გადადის თუ არა კორონავირუსი კარის სახელურიდან და რამდენ ხანს რჩება ის ზედაპირზე?

თუ ნებისმიერ ზედაპირს ინფიცირებული ადამიანი შეეხო, ბუნებრივია ის შესაძლებელია სხვა ადამიანის დაავადების წყაროდ იქცეს. თუ ადამიანი ინფიცირდება ვირუსით ხელზე, შემდეგ კი რაიმეს შეეხო, შეიძლება ეს ზედაპირი დაბინძურდეს. კარის სახელურები, გამოყენების სიხშირიდან გამომდინარე, საფრთხის რეალური მატარებელია. ექსპერტები ფიქრობენ, რომ კოროვირუსს მის ზედაპირზე დარჩენა მთელი დღის განმავლობაში შეუძლია, ამიტომ აუცილებელია დიდი სიხშირით ხელების დაბანა.

8.არის თუ არა უსაფრთხო საზოგადოებრივ აუზებში ბანაობა?

საზოგადოებრივი აუზები, როგორც წესი, ქლორით იწმინდება, ამიტომ ისინი ნაკლებ საფრთხეს შეიცავს, თუ სწორად არის დამუშავებული. თუმცა, თავად დაწესებულებაში არის უამრავი ზედაპირი, რომლისგანაც შეიძლება ინფექცია გავრცელდეს, მაგალითად, კარის სახელურები.

9.ნიღაბი კორონავირუსისგან გვიცავს?

მიუხედავად იმისა, რომ ექიმები დაავადებულ ადამიანებთან კონტაქტის დროს ნიღბებს იყენებენ, არ არსებობს მტკიცებულება იმისა, რომ ნიღაბი კორონავირუსის გავრცელებას აფერხებს. ნიღბის ტარების ნაცვლად, პრევენციის გაცილებით ეფექტური ზომაა, ხელების დაბანა, განსაკუთრებით სახესთან შეხების წინ.

10.რამდენად დიდი რისკის ქვეშ არიან ბავშვები?

ჩინეთის მონაცემებით, ბავშვები დაბალი რისკის ქვეშ არიან, თუმცა მეტი სიფრთხილეა საჭირო იმ ბავშვების შემთხვევაში, რომლებსაც ასთმური დაავადება მემკვიდრეობით აქვთ მიღებული.

ცნობისთვის, Covid 19 ჩინეთში, პირველად, 2019 წლის დეკემბერში უხანის პროვინციაში დაფიქსირდა. ამ ეტაპზე, ინფექციასთან დაკავშირებით ჩინეთში სიტუაცია გაუმჯობესდა, შეინიშნება კლების ტენდენცია. რაც შეეხება მსოფლიო მასშტაბით არსებულ ვითარებას, ამ დროისთვის, კორონავირუსი 100-ზე მეტ ქვეყანაშია გავრცელებული, შესაბამისად, ინფექცია მსოფლიო ჯანდაცვის ორგანიზაციამ პანდემიად 11 მარტს გამოაცხადა.

საქართველოში 12 მარტის მდგომარეობით, კორონავირუსით 25 პირია ინფიცირებული, მათ შორის არის არასრულწლოვანი.