🎥 ყირიმის ხიდზე კვამლი იყო - რუსული მხარე ხიდის დაკეტვას წვრთნებით ხსნის

ოკუპირებული ყირიმის ხიდზე დილით გამოჩენილ კვამლს, რასაც რამდენიმე საათით ხიდის ჩაკეტვა მოჰყვა, რუსული მხარე წვრთნებით ხსნის. ამის შესახებ რუსული სახელისუფლებო სააგენტო RIA Novosti ყირიმის მარიონეტი ხელმძღვანელის სერგეი აქსენოვის Telegram-ზე დაყრდნობით წერს. 

„ყირიმის ხიდი დაკეტილია რაიონში წვრთნების გამო“, - დაწერა აქსენოვმა.

ამის შემდეგ, ინფორმაცია გავრცელდა, რომ ხიდზე მოძრაობა ადგილობრივი დროით 11:00 საათზე აღდგა მას შემდეგ, რაც მათივე თქმით, წვრთნები დასრულდა და დაკვამლიანება შეწყდა. 

რუსული მხარე არ აკონკრეტებს, რა ტიპის სწავლება ჩატარდა ხიდზე და წინასწარ რატომ არ გააფრთხილეს მოსახლეობა.