ბრექსითის საკითხებში ევროკავშირის წარმომადგენელს COVID-19 დაუდასტურდა

ბრექსითის საკითხებში ევროკავშირის წარმომადგენელმა მიშელ ბარნიემ ტვიტერის ოფიციალურ გვერდზე თავად გაასაჯაროვა ინფორმაცია იმის თაობაზე, რომ ის ახალი კორონავირუსით დაინფიცირებულია.

ბარნიე აღნიშნავს, რომ თავს კარგად გრძნობს და იზოლირებულია.

"გაცნობებთ, რომ COVID-19-ზე გავიარე ტესტირება და ინფიცირებული ვარ. კარგ განწყობაზე ვარ და თავსაც კარგად ვგრძნობ. ვიცავ ყველა რეკომენდაციას და ვარ იზოლირებული. ამას ერთად გადავლახავთ", - წერს ბარნიე.

ცნობისთვის, მსოფლიოს მასშტაბით, კორონავირუსით დაინფიცირებულთა რიცხვი 200 ათასზე მეტია, გარდაცვლილია 8 ათასი. რაც შეეხება საქართველოს, 19 მარტის მონაცემებით, ქვეყანაში ლაბორატორიულად დადასტურებული 40 შემთხვევაა გამოვლენილი.