საქართველო, უკრაინა და მოლდოვა ევროპული უსაფრთხოების სისტემის აუცილებელი შემადგენელი ქვეყნებია - ჩავუშოღლუ
1669721328
„თუ ევროკავშირი უსაფრთხოების ახალი სისტემის აწყობას გეგმავს, იქ უნდა იყოს ჩართული ყველა ქვეყანა ბალკანეთიდან საქართველომდე, და, რა თქმა უნდა, უკრაინისა და მოლდოვის ჩათვლით. ასევე, ნებისმიერ შემთხვევაში თურქეთის გამოტოვებაც შეუძლებელია“. ამის შესახებ თურქეთის საგარეო საქმეთა მინისტრმა მევლუთ ჩავუშოღლუმ ბუქარესტში, ნატოს ფორუმზე განაცხადა.
„ჩვენ გვიხარია, რომ უკრაინის საკითხზე ევროკავშირში და ნატოში არის დიდი ერთიანობა. ამასთანავე გვსურს, თქვენი ყურადღება ერთ მოვლენაზე გავამახვილოთ. ევროკავშირმა ახლა დააანონსა ახალი წვრთნის და უსაფრთხოების მისია უკრაინისთვის და კვლავ დაავიწყდა თურქეთთან ამ საკითხზე რაიმე თანამშრომლობა. მე მომყავს ეს მაგალითი თუ როგორ აიგნორირებს ევროკავშირი სხვადასხვა პარტნიორი ქვეყნების ინტერესებს. ეს პროგრამა ჩვენ არ გვჭირდება, თურქეთი უკრაინას ისედაც ეხმარება. თუ ევროკავშირი უსაფრთხოების ახალი სისტემის აწყობას გეგმავს, იქ უნდა იყოს ჩართული ყველა ქვეყანა ბალკანეთიდან საქართველომდე, და, რა თქმა უნდა, უკრაინისა და მოლდოვის ჩათვლით. და ამ სისტემიდან თურქეთის ამოგდებაც შეუძლებელია. წარმოიდგინეთ, როგორ შეიძლებოდა უკრაინული ხორბლის გატანასთან დაკავშირებით შეთახმების მიღწევა თურქეთის გარეშე, ყოვლად შეუძლებელი“, - განაცხადა ჩავუშოღლუმ.
ჩავუშოღლუს თქმით, თურქეთის წარმატება არის მთლიანად ევროპის წარმატება და თურქეთი გააგრძელებს ძალისხმევას რეგიონის და ევროპის უსაფრთხოების უზრუნველყოფის მხრივ.
მისი განცხადებით, თურქეთი დღესაც ასრულებს ამ მხრივ უდიდეს როლს შავი ზღვის და ევროპა-აზიის რეგიონში.
„სიტყვა წარუმატებლობა ჩვენთვის არ არსებობს“, - განაცხადა თურქმა მინისტრმა.
ცნობისთვის, ბუქარესტში დღეს ნატოს საგარეო საქმეთა მინისტრების საბჭო იმართება. სხდომაში ნატოს წევრი ქვეყნების გარდა საქართველოს, მოლდოვის, უკრაინისა და ბოსნია-ჰერცეგოვინას საგარეო უწყებების ხელმძღვანელები მონაწილეობენ.
აგრეთვე წაიკითხეთ:
👉 ექსპერტის თქმით, ირანმა შეიძლება არ გადასცეს ბალისტიკური რაკეტები რუსეთს
👉 ლუგანსკის ოლქის ქალაქ სვატოვოში 20-მდე რუსი სამხედროა ლიკვიდირებული - უკრაინის გენშტაბი
👉 პუტინი აბსოლუტურად ამაზრზენად იქცევა, რადგან ოკუპანტებს სამხედრო მარცხი ემუქრებათ - ჯონ კირბი
👉 რუსი ოკუპანტები უკრაინაზე ახალი სარაკეტო დარტყმისთვის ემზადებიან - ISW
