უცხოეთი

საქართველომ სააკაშვილის ექსტრადირების სანაცვლოდ შეიძლება, მისი პოლიტიკური საქმიანობის შეწყვეტა მოითხოვოს - უკრაინელი ექსპერტი

იგორ რეიტეროვიჩი
1633596925
დაკოპირებულია

უკრაინელ ექსპერტს იგორ რეიტეროვიჩს მიაჩნია, რომ მიხეილ სააკაშვილს ციხეში გარკვეული დროის გატარება ნებისმიერ შემთხვევაში მოუწევს, ხოლო მისი მომავალი ბედი საქართველოში ადგილობრივი თვითმმართველობის არჩევნების მეორე ტურის მერე იქნება მიღებული. ინფორმაციას kanaldom.tv ავრცელებს.

„სააკაშვილის ნაბიჯი, რომელმაც საქართველოში დაბრუნება გადაწყვიტა, იყო პასუხისმგებლობიანი პოლიტიკოსის მიერ გადადგმული ნაბიჯი. მიუხედავად იმისა, რომ სააკაშვილი უკრაინის მოქალაქეა, საქართველოში არიან პოლიტიკური ძალები, რომლებიც მასთან არიან ასოცირებულები და ბუნებრივია, მათ ისინი მხარდაჭერის გარეშე ვერ დატოვებდა. არსებობს საკმაოდ მინიმალური, მაგრამ მაინც იმის ალბათობა, რომ მიხეილ სააკაშვილს გაათავისუფლებენ. ბევრია იმაზე დამოკიდებული, თუ როგორ მოიქცევა უკრაინა. სააკაშვილი ჩვენს დიპლომატიურ წარმომადგენლებთან მუდმივ კავშირზე უნდა იყოს, ასევე, გასარკვევია თუ რა მუხლით უნდა მოიხადოს მან სასჯელი. არის საქმეები, რომლებიც სააკაშვილის წინააღმდეგ ადრე აღიძრა და არის ახალი საქმეები, რომლებსაც ალბათ, ახლო მომავალში აღძრავენ, მაგალითად, საზღვრის უკანონო გადაკვეთის გამო.

ჩვენ უკვე მოვისმინეთ ოფიციალური თბილისის განცხადებები იმის შესახებ, რომ მან სასჯელი უნდა მოიხადოს, ან, როგორც მინიმუმ, სასჯელის ნაწილი და შემდეგ შეუძლია დაბრუნდეს უკრაინაში. საქართველოს თავისუფლად შეუძლია სააკაშვილი ახლა არც გაათავისუფლოს და არ გადასცეს უკრაინულ მხარეს, არამედ ისე გააკეთოს, რომ სააკაშვილის შესახებ უბრალოდ დაივიწყონ. პრინციპში არ არის გამორიცხული, რომ მომავალ არჩევნებზე, ან საპარლამენტოზე, ან საპრეზიდენტოზე ხელისუფლების კონფიგურაცია შეიცვალოს და ამ შემთხვევაში მას გათავისუფლების პერსპექტივა გაუჩნდება“, - აცხადებს რეიტეროვიცი.

წამყვანის შეკითხვაზე, აისახება თუ არა სააკაშვილის საკითხი ნეგატიურად ქართულ-უკრაინულ ურთიერთობებზე, თუ პირიქით, კარგი ურთიერთობები ამ საკითხის დიპლომატიური გზით მოგვარებას ხელს შუწყობს, რეიტეროვიჩი ამბობს, რომ საკითხი მართლაც შეიძლება გადაწყდეს დიპლომატიური გზით, უმაღლეს პოლიტიკურ დონეზე.

„ამასთანავე, საქართველომ სააკაშვილის გათავისუფლების და უკრაინაში მისი ექსტრადირების სანაცვლოდ შეიძლება მოითხოვოს, რომ მან შეწყვიტოს საქართველოში პოლიტიკური საქმიანობა, საქართველო აღარ ახსენოს და აღარ ჩაერიოს მის საშინაო საქმეებში. ასე რომ უკრაინა შეიძლება მართლაც შეეცადოს სააკაშვილის გათავისუფლებას გარკვეული დათმობების სანაცვლოდ, მაგრამ სააკაშვილი ამას შეიძლება არც დათანხმდეს“ ამბობს ექსპერტი.

წამყვანის შეკითხვას არის თუ არა შესაძლებელი, რომ სააკაშვილმა ციხეში 9 წელი გაატაროს, და მხოლოდ ამის მერე დაბრუნდეს უკრაინაში, ექსპერტი ამბობს, რომ დღეს არსებული მდგომარეობით, ყველაზე სავარაუდო სცენარია, რომ სააკაშვილი ციხეში დარჩეს, მაგრამ არა 9 წლით, არამედ ნაკლები ვადით.

„ახლა ეს საქართველოს ხელისუფლებისთვის ძალზე პრინციპული საკითხია, მაგრამ საპარლამენტო, ან საპრეზიდენტო არჩევნების შემდეგ პოლიტიკური სიტუაცია შეიძლება შეიცვალოს, თანაც არსებობს ისეთი ცნება, როგორიცაა გადაწყვეტილების ცხელ გულზე მიღება. შესაბამისად, პესიმისტური სცენარი, რომელიც ახლა ყველაზე რეალურია, შეიძლება შეიცვალოს ოპტიმისტური სცენარით, მთავარია, რომ უკრაინას ის ახსოვდეს და იმუშაოს ამ მიმართულებით, თუმცა, ამაში მე ეჭვიც არ მეპარება. საქართველოს და უკრაინას დღეს ძალზე კარგი ურთიერთობები აქვთ და ჩვენ გვაქვს ბევრი საერთო პროექტი, მათ შორის ევროკავშირში და ნატოში ინტეგრაციის კუთხით, რისი განხორციელებაც უმჯობესია ერთობლივად, ვიდრე ცალ-ცალკე. უკრაინის ხელისუფლებამ და პირადად ვოლოდიმირ ზელენსკიმ მასზე დამოკიდებული ყველაფერი გააკეთა - გააკეთა შესაბამისი განცხადებები და მისცა დავალებები საგარეო საქმეთა სამინისტროს. ის შეეცდება, ამ თემებზე საქართველოს წარმომადგენლებთან გამართოს მოლაპარაკება, ასევე, ჩართოს ამ პროცესში საერთაშორისო პარტნიორები, მაგრამ ეს ყველაფერი იქნება 30 ოქტომბრის შემდეგ, ანუ ადგილობრივი არჩევნების მეორე ტურის დასრულების შემდეგ.

ინფორმაციისთვის, ყოფილი პრეზიდენტი მიხეილ სააკაშვილი თბილისში 1-ელ ოქტომბერს დააკავეს. იგი რუსთავის ციხეში იმყოფება და შიმშილობს.

უკრაინის პრეზიდენტმა ვოლოდიმირ ზელენსკიმ ჟურნალისტებთან განაცხადა, რომ ის საქართველოში დაკავებული მიხეილ სააკაშვილის უკრაინაში დაბრუნებას შეეცდება.

მიხეილ სააკაშვილი ციხიდან პერიოდულად წერილებს აქვეყნებს და მხარდამჭერებს მიმართავს. მის ბოლო წერილში, რომელიც მან 4 ოქტომბერს გაავრცელა, აღნიშნულია, რომ ის არ წყვეტს შიმშილობას და მან უარი განაცხადა უგონო მდგომარეობაში სამედიცინო ჩარევაზე.

იხილეთ აგრეთვე:

🔴 „ციხეში სააკაშვილის ლიკვიდაციას გეგმავენ“ - თაკო ჩარკვიანი (ვიდეო)

🔴 კრემლს სააკაშვილის დაკავება აწყობდა - ვალერი სოლოვეი

🔴 ზელენსკიმ პირობა დადო, რომ შეეცდება სააკაშვილის უკრაინაში დაბრუნებას

🔴 სააკაშვილს უკრაინის მოქალაქეობა უნდა ჩამოერთვას - უკრაინელი ექსპერტი

🔴 „მომიკითხეთ მიხეილ სააკაშვილი ციხეში“ - ირაკლი კობახიძე