აშშ-ის ელჩი ვალდებულია, ასეთ საგანგაშო მიდგომასთან დაკავშირებით, რაზეც საუბრობს მოსამართლე ჩხიკვაძე, გააკეთოს ნათელი განმარტებები, რომ საზოგადოებამ იცოდეს რასთან გვაქვს საქმე - დიმიტრი ხუნდაძე
1657881981
„ჩვენს მიერ გუშინ გამოთქმული ეჭვი, ხომ არ იყო მოსამართლის ამერიკაში გამგზავრების ხელის შემშლელი ფაქტორი სასამართლო გადაწყვეტილება, დღეს თვითონ დაადასტურა მოსამართლე ჩხიკვაძემ“, - ამის შესახებ პარლამენტის წევრმა დიმიტრი ხუნდაძემ მოსამართლე ლაშა ჩხიკვაძის განცხადების კომენტირებისას განაცხადა.
მისი თქმით, აქ უფრო მეტ შეუსაბამო საკითხებთან გვაქვს საქმე - რამდენადაა შესაძლებელი, რომ სასამართლო გადაწყვეტილების რევიზია მოხდეს საელჩოებში, ან ვთქვათ, რომელიმე ევროპარლამენტარმა გააკეთოს წინასწარი დაკვეთა, თუ, რა გადაწყვეტილება უნდა იქნეს მიღებული მოსამართლის მიერ ამა თუ იმ საკითხთან დაკავშირებით.
„ვფიქრობ, ეს არ არის დასავლური ღირებულება, სწორედ ასეთი მიდგომაა სახიფათო სასამართლოს დამოუკიდებლობისთვის და ზოგადად ეწინააღმდეგება პარტნიორულ ურთიერთობებს და იმ მიზანს, რა მიზანიც აქვს საზოგადოებას ხელისუფლებასთან და პრაქტიკულად ყველა პოლიტიკურ შემადგენელთან ერთად გადაწყვეტილი, რომ ჩვენთვის მნიშვნელოვანია დასავლური ღირებულება, სიტყვის თავისუფლება, დამოუკიდებელი სასამართლოს ხელშეუხებლობა. ასეთი დამოკიდებულება საგანგაშო და სახიფათოა, ამიტომ კითხვები კიდევ უფრო მეტი ჩნდება და ახლა კითხვის ადრესატი, რომელსაც აქამდე პასუხი არ გაუცია, აშშ-ის ელჩი ვალდებულია, ასეთ საგანგაშო მიდგომასთან დაკავშირებით რაზეც საუბრობს მოსამართლე ჩხიკვაძე, გააკეთოს ნათელი, ერთმნიშვნელოვანი განცხადებები და განმარტებები, რომ საზოგადოებამ იცოდეს რასთან გვაქვს საქმე.
მიჩნდება ეჭვი, რომ აქამდე დასმულ კითხვებთან დაკავშირებითაც კიდევ უფრო მეტ ხიფათთან და შეუსაბამობასთან გვაქვს საქმე, ვიდრე მოსალოდნელია და ვიდრე შესაძლოა წინასწარ პროგნოზის გაკეთება. ამიტომ, კითხვებს სჭირდება პასუხები, წინააღმდეგ შემთხვევაში კითხვები კიდევ უფრო მრავლად ჩნდება. კელი დეგნანთან ჩვენ გვრჩება პასუხგაუცემელი კითხვები და ვთხოვთ მას, გაგვცეს პასუხები იმ კითხვებზე, რაც არა მხოლოდ ჩვენი, არამედ საზოგადოების მაღალი ინტერესია და ასევე ქვეყნის ინტერესი, თუ როგორ წარმოუდგენია ქვეყანა საზოგადოებას, როგორი იქნება ის ხვალ და საით მივდივართ გრძელვადიან პერსპექტივაში, რომ საზოგადოებას ჰქონდეს სტაბილურობის განცდა“, - განაცხადა დიმიტრი ხუნდაძემ.
ცნობისთვის, მოსამართლე ლაშა ჩხიკვაძემ განცხადება გაავრცელა, სადაც აღნიშნულია, რომ „მთავარი“ არხის დირექტორის ნიკა გვარამიას სასამართლო განხილვის შედეგის გამო ზოგიერთი პოლიტიკური ძალა სანქციებით ემუქრება.
ჩხიკვაძე მოუწოდებს პოლიტიკურ პარტიებს, დიპლომატიურ კორპუსს, საერთაშორისო და საქართველოში მოქმედ არასამთავრობო ორგანიზაციებს, თავი შეიკავონ სასამართლოზე ზეწოლისაგან და მოსამართლეებს მიეცეთ საშუალება გადაწყვეტილებები მიიღონ საქართველოს კონსტიტუციის, კანონისა და შინაგანი რწმენის საფუძველზე.
