პოლიტიკა

დეპუტატი: გარყვნილებას მიცემული კაცობრიობა, ვირუსის შიშის ტყვეობაშია, ძრწის და კანკალებს სიკვდილის წინაშე

პარლამენტის დეპუტატი
1584440787
დაკოპირებულია

"განსაუთრებით ხელისუფლების წარმომადგენლები უნდა სასოებდნენ უფალს",- ამის შესახებ დეპუტატმა ალექსანდრე ერქვანიამ პლენარულ სხდომაზე კორონავირუსის თემაზე ვრცელი მოხსენებით გამოსვლისას განაცხადა.

"მსოფლიოში გავრცელებულმა ვირუსმა გვაჩვენა, თუ როგორი უძლური და უსუსური აღმოჩნდა მეცნიერებასა და ტექნიკის განვითარებაში მიღწეული წარმატებებით თვითდაჯერებული ადამიანი. ამპარტავნების სულით შეპყრობილი კაცობრიობა, რომელმაც ღმერთი უარყო და დაუპირისპირდა, მის მიერ დადგენილი კანონების შეცვლა მოინდომა, მარადიულ ცხოვრებას ვნებები და სიამოვნება ამჯობინა, გარინდულია.

მსოფლიო პანიკაშია - დაცარიელებული ქალაქები, ჩაკეტილი საზღვრები. გარყვნილებასა და უზნეობას მიცემული კაცობრიობა, რომელმაც ღვთისადმი შიში და კრძალვა დაკარგა, ვირუსის შიშის ტყვეობაშია, ძრწის და კანკალებს სიკვდილის წინაშე, რაც უღმერთობის და ურწმუნოების შედეგია. უნდა გვახსოვდეს, რომ სამყაროს უფალი განაგებს და მისი ნების გარეშე არაფერი ხდება. მის მორწმუნეებს კი, ყველაფერი კეთილად წარემართება. ამიტომ მწუხარებას და შიშს არ უნდა მივეცეთ, განსაცდელი არის გზა გამოცდისა, რომელსაც ღვთის შემეცნებამდე მივყავართ. მხოლოდ ღვთისადმი სასოებით, მარხვით, სინანულით, ლოცვით და ზიარებით, ერთმანეთის თანადგომით და თავგანწირვით, სიყვარულით შევძლებთ განსაცდელების დაძლევას და მარადიული სიცოცხლის მოპოვებას. ყველა უნდა გავერთიანდეთ და ვილოცოთ ჩვენი ქვეყნის და მოსფლიოს გადარჩენისთვის. განსაუთრებით ხელისუფლების წარმომადგენლები უნდა სასოებდნენ უფალს.

სამწუხაროდ, ამ განსაცდელის ჟამს, ზოგიერთები არ წყვეტენ ანტიეკლესიურ პროპაგანდას, გამოჩნდნენ ისეთი ადამიანები, რომლებიც მოითხოვენ ზიარების წესის შეცვლას და მიიჩნევენ, რომ ერთი კოვზით ზიარებამ შეიძლება გამოიწვიოს ვირუსის გავრცელება, რაც გარდა იმისა, რომ დიდი უგუნურება და ურწმუნოებაა, მორწმუნე ადამიანის შეურაცხყოფაა", - აღნიშნა ალექსანდრე ერქვანიამ.