კაკულია: მინდა ვთხოვო ყველა ბიზნესმენს, რომ გარკვეული მარაგების რეალიზებაში შიდა კონტროლი დაწესდეს

საპარლამენტო უმრავლესობის წევრი რომან კაკულია ბიზნესმენებს მიმართავს და მოუწოდებს, რომ მარაგების რეალიზებაში შიდა კონტროლი დაწესდეს.

როგორც დეპუტატმა აღნიშნა, ყველა ვინც ახლა ეკონომიკაზე ზემოქმედებს, პასუხისმგებლობით უნდა მიუდგნენ საკითხს. კაკულიამ განაცხადა, რომ მათი წვლილი ახლა ძალიან დიდია.

რომან კაკულიას თქმით, პირველ რიგში დგას ადამიანების ჯანმრთელობა, შემდეგ დღის წესრიგში დგება ეკონომიკა და თუ ეკონომიკასთან დაკავშირებული პრობლემები ვერ მოგვარდება შემდეგ, სიტუაცია გადადის ხოლმე უსაფრთხოების რანგში.

"დღეს ეკონომიკის შეფასებისას თავს არ შეგაწყენთ ზედმეტი ტერმინებით, მაგრამ ვხედავთ, რომ ყველა ის ფაქტორი, რომელიც განსაზღვრავს ეკონომიკას, არის გარკვეული წნეხის ქვეშ. პირველ რიგში ეს არის ტურიზმი, შემდეგ არის ტრანსპორტი, ეს არის კერძო საკუთრება, რომელიც დაკავებული იყო რესტორნებით თუ თავშეყრის ადგილებით, და ასე შემდეგ. ისმება კითხვა, არის თუ არა ადეკვატური მხარდაჭერის ზომები? აქ შეფასების კრიტერიუმი, ჩემი აზრით, უნდა იყოს ერთადერთი, განვსაზღვროთ მოვლენების განვითარების, ამ ეტაპზე რისი უფლება შეგვიძლია მივცეთ საკუთარ თავს. იმიტომ, რომ ჩვენ არ ვიცით რა იქნება ორი თვის შემდეგ და კიდევ იმის შემდეგ. ამიტომ მნიშვნელოვანია სამთვიანი დახმარების პაკეტის განსჯა მოხდეს არა იმ კრიტერიუმით, თუ რამდენად არიან ეს სექტორები ახლა დარტყმის ქვეშ, ეს პაკეტი აბსოლუტურად გამოიყვანს თუ არა მათ კრიზისიდან, არამედ ჩვენ შევაფასოთ დღევანდელ მოცემულობაში რისი უფლება შეგვეძლო მიგვეცა საკუთარი თავისათვის", - განაცხადა კაკულიამ.

 რომან კაკულიამ ბიზნესმენებს მიმართა, რომელიც განსაკუთრებით საცალო ქსელებთან არიან დაკავშირებული.

"ეს არის ძალიან პატარა ქვეყნა, ყველა ერთმანეთს ვიცნობთ, ყველა სუპერმარკეტის მფლობელი იციან ადამიანებმა, ყველა აფთიაქი ვის ეკუთვნის, ყველა ის დაწესებულება, სადაც პირველადი მოხმარების საგნების გაყიდვა ხდება. ეს ყველაფერი შეიძლება საკანონმდებლო დონეზეც დარეგულირდეს, მაგრამ ახლა არის დღეების ამბავი, ამიტომ პასუხისმგებლიანი მიდგომა მინდა ვთხოვო ყველა ბიზნესმენს, რომ გარკვეული მარაგების რეალიზებაში შეიძლება დაწესდეს შიდა კონტროლი. მაგალითად, ადამიანი, რომელიც ყიდულობს წიწიბურას, არ არის აუცილებელი 25 კოლოფი ერთიანად შეიძინოს და ეს შეზღუდვა შეიძლება მან თვითონვე გააკეთოს", - განაცხადა კაკულიამ.

დეპუტატმა ასევე მოუწოდა ბიზნესმენებს, რომ შემოსავლის გარდა იმაზეც იზრუნონ, როგორ სახელს დატოვებენ სამომავლოდ,

"ყველა ვინც ბიზნესს აკეთებთ, ქვეყნის გარდა, ცხადია ფიქრობთ თქვენი შვილების მომავალზეც, მესმის, მაგრამ შვილებს ფინანსური რესურსების დატოვების გარდა ყველაზე მეტად სჭირდებათ თქვენი კარგი სახელის დატოვებაც სამომავლოდ და საქართველოში ყველა იმახსოვრებს ყოველთვის იმ ადამიანს, რომელიც საერთო გამოწვევებზე საკუთარი კეთილდღეობის აგებას ცდილობს და ჩემი თხოვნა იქნება, ნურავინ ჩაეწერებით ამ სიაში.   ყოველგვარი მინიშნების გარეშეც მივმართავ ყველას", -განაცხადა კაკულიამ.

მან თავის გამოსვლაში ყურადღება გაამახვილა არსებულ სიტუაციაში საერთაშორისო ორგანიზაციებთან ურთიერთობის შესახებაც.

"ამ კრიზისიდან, დღეს შესაძლოა დაახლოებით ნახევარ მილიარდამდე, დავითვალოთ დანაკლისები, რა თქმა უნდა ეს გაცვლის კურსი თავის როლს ითამაშებს, ვიტყვი რომ პოზიტიურს, რა თქმა უნდა, სირთულეებზე იქნება საუბარი. ამიტომ სავალუტო ფონდთან მუშაობა ახლა ძალიან მნიშვნელოვანია, რომ საგარეო დახმარებების დროული და მიზანმიმართული მოზიდვის თემები ახლავე იყოს ჩართული", - აღნიშნა კაკულიამ.