„მოსამართლეებთან იმართება რუტინული შეხვედრები და თუ ვინმეს სურს, რომ აქედან სკანდალი შექმნას, ალბათ ეს პირადი ინტერესებიდან გამომდინარე ხდება“ - დეგნანი

საქართველოში აშშ-ის ელჩმა კელი დეგნანმა მოსამართლე ლაშა ჩხიკვაძის მიერ გავრცელებული განცხადების შემდეგ მიღებულ კრიტიკას უპასუხა. 

დეგნანის თქმით, აშშ-ის საელჩოში ქართველ მოსამართლეებთან, პროკურორებთან რუტინული შეხვედრები ყოველთვის იმართება. 

„ჩვენ გვაკავშირებს ხანგრძლივი მეგობრობა საქართველოსთან და როგორც კარგ მეგობრებს სჩვევიათ, ჩვენ ზოგჯერ ერთმანეთს არ ვეთანმებით. ჩვენ უნდა ველაპარაკოთ ერთმანეთს ამ აზრთა სხვადასხვაობაზე და ამას, როგორც წესი, პირად საუბრებში ვაკეთებთ, რაც ყველაზე ეფექტური საშუალებაა. 

ჩვენ გამოვაქვეყნეთ ოფიციალური განცხადება და გამოვთქვით შეშფოთება განაჩენის დროულობასა და ბრალდებებზე. აღსანიშნავია, რომ აშშ არ იყო ერთადერთი, ვინც ასეთი შეშფოთება გამოთქვა. ასეთები იყვნენ სახალხო დამცველი, არასამთავრობო ორგანიზაციები და საქართველოს მეგობრები. ასე რომ, ეს არ მომხდარა ფარულად.

აშშ დიდი ხანია მუშაობს საქართველოს მართლმსაჯულების გასაუმჯობესებლად, მისი გამჭვირვალობისა და დამოუკიდებლობისთვის. ეს მოიცავს უამრავ აზრთა გაცვლა-გამოცვლას ამერიკელ ექსპერტებსა და ქართველ მოსამართლეებს, პროკურორებსა და ადვოკატებს შორის. კიდევ ერთხელ ვიმეორებ, რომ ეს რუტინული შეხვედრებია და თუ ვინმეს სურს, რომ აქედან სკანდალი შექმნას, ალბათ ეს პირადი ინტერესებიდან გამომდინარე ხდება“, - განაცხადა კელი დეგნანმა. 

ცნობისთვის, მოსამართლე ლაშა ჩხიკვაძემ განცხადება გაავრცელა, სადაც აღნიშნულია, რომ „მთავარი“ არხის დირექტორის ნიკა გვარამიას სასამართლო განხილვის შედეგის გამო ზოგიერთი პოლიტიკური ძალა სანქციებით ემუქრება.

ჩხიკვაძე მოუწოდებს პოლიტიკურ პარტიებს, დიპლომატიურ კორპუსს, საერთაშორისო და საქართველოში მოქმედ არასამთავრობო ორგანიზაციებს, თავი შეიკავონ სასამართლოზე ზეწოლისაგან და მოსამართლეებს მიეცეთ საშუალება გადაწყვეტილებები მიიღონ საქართველოს კონსტიტუციის, კანონისა და შინაგანი რწმენის საფუძველზე.

ასევე დაგაინტერესებთ:

👉 „საქართველოს დათმობას არ ვაპირებთ და მოვუწოდებთ ხალხს ქუჩაში გამოსვლისკენ“ - პაატა მანჯგალაძე

👉 „დაინახეს, რომ 6 თვიდან ერთი თვე გავლიეთ ჩხუბში და აყალმაყალში“ - ჰერმან საბო ევროკომისიის გადაწყვეტილებაზე

👉 „არ უნდა დაველოდოთ 2023 წელს და პირობების შესრულების კვალდაკვალ, კანდიდატის სტატუსი უახლეს ვადაში უნდა მოვიპოვოთ“ - ლევან ბეჟაშვილი