პოლიტიკა
რუსეთთან ფრენების აღდგენა, სანქციების პოლიტიკის წინააღმდეგ წასვლას ნიშნავს - ვალერი ჩეჩელაშვილი
1674591497
„რუსეთთან ფრენების აღდგენა, სანქციების პოლიტიკის წინააღმდეგ წასვლას ნიშნავს“, - ამის შესახებ „პალიტრას“ ეთერში დიპლომატმა და რუსეთის ფედერაციაში საქართველოს ყოფილმა ელჩმა ვალერი ჩეჩელაშვილმა განაცხადა.
მისი თქმით, თუ საქართველოს ტერიტორიაზე რუსული თვითმფრინავები დაეშვება, ან უნდა დავაპატიმროთ და გადავცეთ მფლობელს, ან სერიოზული პრობლემა შეგვექმნება.
„რუსეთ-საქართველოს შორის ფრენების აღდგენასთან დაკავშირებით გამოვყოფდი 3 პრობლემას. პირველი, რუსული კომპანიები სანქცირებული არიან ევროკავშირის მხრიდან, შესაბამისად, რუსეთთან ფრენების აღდგენა სანქციების პოლიტიკის წინააღმდეგ წასვლას ნიშნავს.
თუ ჩვენ ტერიტორიაზე, რუსული თვითმფრინავები მოგვევლინა, რომლებიც სანქციების ქვეშ არიან, ან უნდა დავაპატიმროთ და გადავცეთ მფლობელს, ან სერიოზული პრობლემა შეგვექმნება, რომელიც აისახება შემდგომში ჩვენ ავიაკომპანიის წინააღმდეგ სანქციების დაწესებაში.
მეორე საკითხია, ევროკავშირის წევრობის კანდიდატის სტატუსის მიღება, ამაშიც ეს ხელს ვერ შეგვიწყობს და მესამე არის უსაფრთხოების საკითხი“, - აღნიშნა ჩეჩელაშვილმა.
ცნობისთვის, 18 იანვარს რუსეთის საგარეო საქმეთა მინისტრმა, სერგეი ლავროვმა იმედი გამოთქვა, რომ საქართველოსთან პირდაპირი ფრენები მალე აღდგება.
20 იანვარს სახელმწიფო დუმის დეპუტატმა სერგეი გავრილოვმა განაცხადა, რომ აუცილებელია საქართველოსთან აღდგეს არა მხოლოდ საჰაერო მიმოსვლა, არამედ საქართველოსა და რუსეთს შორის სრულფასოვანი დიპლომატიური ურთიერთობები.
აღნიშნულ განცხადებას მმართველ გუნდში გამოეხმაურნენ. „ქართული ოცნების“ თავმჯდომარის ირაკლი კობახიძის განცხადებით, როდესაც საქმე ეხება საქართველოს მოქალაქეების მდგომარეობის შემსუბუქებას, ნებისმიერი ასეთი გადაწყვეტილება ხელისუფლებისთვის მისასალმებელია.
რუსეთ-საქართველოს შორის ფრენების აღდგენასთან დაკავშირებით განცხადება გააკეთა აშშ-ის ელჩმა კელი დეგნანმა და აღნიშნა, რომ ქართველების უმეტესობას ურჩევნია, რუსეთმა გაიყვანოს საკუთარი ჯარები საქართველოს ტერიტორიიდან, ვიდრე აღდგეს პირდაპირი ფრენები მოსკოვთან.
აგრეთვე, დაგაინტერესებთ:
⭕ აუცილებელია საქართველოსთან დიპლომატიური ურთიერთობების სრულად აღდგენა - სერგეი გავრილოვი
ყველაზე კითხვადი
რედაქტორის რჩეული
