პოლიტიკა

სააკაშვილი: ახლა ერთმანეთის მიმართ კრიჭაში ჩადგომის დრო არ არის

საქართველოს ყოფილი პრეზიდენტი
1584118799
დაკოპირებულია

"ახლა ერთმანეთის მიმართ კრიჭაში ჩადგომის დრო არ არის, საზოგადოება სამედიცინო სისტემას უნდა დაუდგეს და მთავრობამ დაუყოვნებლივ უნდა გადაჭრას მისი პრობლემები", -ამის შესახებ საქართველოს ყოფილმა პრეზიდენტმა მიხეილ სააკაშვილმა განაცხადა.

ექს პრეზიდენტის თქმით, მნიშვნელოვანია, რომ საზოგადოება პანიკას არ აყვეს.

"ჩვენ გვაქვს საკმაოდ განვითარებული ჰოსპიტალური ინფრასტრუქტურა, რომელიც მე დავტოვე და რიჩარდ ლუგარის ცენტრი, რომელიც ჩემმა მეგობარმა ააშენა, რომელიც საქართველოს ქმნის უფრო დაცულად, ვიდრე დაცულია რეგიონის ნებისმიერი სხვა ქვეყანა. ახლა ამ სისტემაში არის პრობლემები, პრაქტიკულად ბევრი საავადმყოფო ჩვენს მიერ დატოვებული არის დარჩენილი რესურსებისა და მათი პერსონალი არის დარჩენილი ხელფასების გარეშე. ძალიან მნიშვნელოვანია, რომ სასწრაფოდ გასტუმრებული იქნას მათი დავალიანება... მოძებნილი იქნას ახალი ლოკაციები დაავადებასთან საბრძოლველად და სასწრაფოდ მოხდეს დატრეინინგება სამედიცინო პერსონალის. მე მინდა მადლობა ვუთხრა თითოეულ მათგანს, ჩვენ ექიმებს, რომლებიც საკუთარი სიცოცხლის რისკის ფასად ებრძვის ამ დაავადებას. ჩვენ გვყავს საკმაოდ კარგი სპეციალისტები და მნიშვნელოვანია, რომ მათ რჩევას დავუგდოთ ყური და არ ავყვეთ პანიკას. ახლა ერთმანეთის მიმართ კრიჭაში ჩადგომის დრო არ არის. საზოგადოება უნდა დაუდგეს სამედიცინო სისტემას და მთავრობამ დაუყოვნებლივ უნდა გადაჭრას მისი პრობლემები", - აცხადებს სააკაშვილი.

ცნობისთვის, 11 მარტს ჯანდაცვის მსოფლიო ორგანიზაციამ ახალი კორონავირუსი პანდემიად გამოაცხადა. ორგანიზაციის ხელმძღვანელმა ტედროს ადჰანომ გებრეიესუსმა ვირუსის გავრცელების დინამიკას შემაშფოთებელი და საგანგაშო უწოდა. ამ დროისთვის, ახალი კორონავირუსი მსოფლიოს 100-ზე მეტ ქვეყანაშია გავრცელებული. რაც შეეხება საქართველოს, კორონავირუსის ლაბორატორიულად დადასტურებული 25 შემთხვევაა გამოვლენილი.