გურიაში ხანძარი ლოკალიზებულია

შინაგან საქმეთა სამინისტროს საგანგებო სიტუაციების მართვის სამსახურის ინფორმაციით, გურიაში, სოფელ ვაკიჯვართან ხანძარი ლოკალიზებულია.

ვაკიჯვართან ხანძარის ჩაქარობის პროცესი მეორე დღეა აქტიურად მიმდინარეობს. პროცესში დღეს შინაგან საქმეთა სამინისტროს სასაზღვრო პოლიციის 2 ვერტმფრენი ჩაერთო, რომლებმაც ცეცხლის კერებზე წყალი უკვე 20-ჯერ დაასხეს. ადგილზე გურიის, აჭარის და სამეგრელო-ზემო სვანეთის განყოფილებებიდან 120-მდე მეხანძრე-მაშველი იმყოფება.

ცეცხლი ქარსაცავ ზოლზე იყო გავრცელებული. ამ დროისთვის, ხანძარი ლოკალიზებულია. გავრცელების საფრთხე აღარ არსებობს.

შემთხვევის შედეგად არავინ დაშავებულა. სიტუაცია კონტროლს სრულად ექვემდებარება.

შინაგან საქმეთა სამინისტრომ მომხდარზე გამოძიება 187-ე მუხლის მე-2 ნაწილით დაიწყო, რაც ცეცხლის წაკიდებით ნივთის დაზიანებას ან განადგურებას გულისხმობს.