„არ ნიშნავს, რომ პანდემია გველის წინ, თუმცა გამორიცხული არც ეს არის“ - ბუწაშვილი მაიმუნის ყვავილზე

ინფექციონისტი მაია ბუწაშვილი ჯანდაცვის მსოფლიო ორგანიზაციის მიერ მაიმუნის ყვავილის საგანგებო მდგომარეობად გამოცხადებას გამოეხმაურა.

მისი თქმით, ჯანმომ აღნიშნული გადაწყვეტილება იმისთვის მიიღო, რათა სხვადასხვა ქვეყნებმა ვირუსის გავრცელების პრევენციისთვის მობილიზება დროულად მოახდინონ. 

„ორი დღის წინ ჯანმომ მაიმუნის ყვავილი საზოგადოებრივი ჯანდაცვის საერთაშორისო საფრთხედ გამოაცხადა. 2020 წლის იანვარში ანალოგიურად გამოცხადდა კოვიდი, რომელმაც მარტში უკვე პანდემიის კვალიფიკაცია მიიღო.

ამან გარკვეული მღელვარება გამოიწვია. რა თქმა უნდა, გლობალურ საფრთხედ გამოცხადება ავტომატურად არ ნიშნავს, რომ პანდემია გველის წინ, თუმცა გამორიცხული არც ეს არის (სადღეისოდ მსოფლიოს 70-ზე მეტ ქვეყანაში 16 ათასი შემთხვევაა დარეგისტრირებული, 5 ლეტალური გამოსავალი).

გლობალურ საფრთხედ გამოცხადების მიზანი ძირითადად არის ის, რომ სხვადასხვა ქვეყნებმა მეტად მოახდინონ მობილიზება და გადავიდნენ მზადყოფნის რეჟიმში, კერძოდ, გააუმჯობესონ ეპიდზედამხედველობა, იმუშაონ მოსახლეობის ცნობიერების ამაღლებაზე, ასევე დაგეგმონ და განსაზღვრონ ვაქცინაციის სამიზნე ჯგუფები და ა.შ.

ასეა თუ ისე, მაიმუნის ყვავილს ბევრად უფრო მომზადებული ხვდება მსოფლიო, ვიდრე ეს კოვიდის შემთხვევაში იყო. არსებობს ვაქცინები, ასევე ანტივირუსული მედიკამენტები, ვირუსის შესახებ ბევრად მეტია ცნობილი და შესაბამისად, პრევენციაც უფრო ადვილია“, - წერს მაია ბუწაშვილი სოციალურ ქსელში.

ცნობისთვის, ჯანდაცვის მსოფლიო ორგანიზაციამ გადაწყვიტა, რომ „მაიმუნის ყვავილი“ წარმოადგენს საერთაშორისო შეშფოთების საბაბის მქონე საგანგებო მდგომარეობას.

ასევე დაგაინტერესებთ:

👉 „გადავწყვიტე, რომ „მაიმუნის ყვავილი“ წარმოადგენს საერთაშორისო შეშფოთების საბაბის მქონე საგანგებო მდგომარეობას“ - ტედროს გებრეისუსი

👉 „ვირუსი განსაკუთრებით საშიშია პათოგენების ნუსხაში საქართველოში, დაღუპვის შემთხვევები 1%-იდან 10%-მდე მერყეობს“ - გიორგი ფხაკაძე ჯანმოს მიერ „მაიმუნის ყვავილის“ საგანგებო მდგომარეობად გამოცხადებაზე

👉 ჯანმომ „მაიმუნის ყვავილთან“ დაკავშირებით, გლობალური საგანგებო მდგომარეობა გამოაცხადა

👉 „მაიმუნის ვირუსი“ კოვიდ 19-ისგან განსხვავებულია - ჯანდაცვის ექსპერტები

👉 „მაიმუნის ჩუტყვავილა ჩვეულებრივ იწვევს ცხელებას, გამონაყარს და დაზიანებებს სახეზე ან სასქესო ორგანოებზე“ - ზაზა წერეთელი „მაიმუნის ვირუსზე“ საუბრობს