იტალიიდან საქართველოს 200 მოქალაქეს დღეს ჩამოიყვანენ

კორონავირუსის გამო, ფრენების დროებით შეჩერების შედეგად, იტალიაში დარჩენილ საქართველოს 200 მოქალაქეს დღეს ჩამოიყვანენ.

როგორც "ჯორჯიან ეარვეისის" გენერალურმა დირექტორმა რომან ბოკერიამ აღნიშნა, მოქალაქეების ჩამოსაყვანად კომპანიის 2 თვითმფრინავი ორ რეისს შეასრულებს.

"10:15 საათზე გაფრინდა ჩვენი ყველაზე დიდი ბოინგი, რომელშიც 180 მგზავრის განთავსებაა შესაძლებელი. ასევე გაფრინდა მეორე თვითმფრინავი, ემბრაერი, სადაც 90 მგზავრის მოთავსებაა შეგვიძლია. საქართველოს 200 მოქალაქე ელოდება ჩვენს თვითმფრინავს", - განაცხადა "მთავარის" ეთერში ბოკერიამ.

ცნობისთვის, საქართველოს მთავრობის გადაწყვეტილებით, 6 მარტს იტალიის რესპუბლიკასთან ფრენები დროებით შეჩერდა. გარდა იტალიისა, ფრენები ასევე შეჩერებულია ჩინეთთან და ირანთან.