თბილისსა და რეგიონებში სადეზინფექციო სამუშაოების ჩატარებაში სურსათის ეროვნული სააგენტოს სპეცტექნიკა ჩაერთვება

ახალი კორონავირუსის შესაძლო გავრცელების აღკვეთის მიზნით, სურსათის ეროვნული სააგენტოს სპეციალიზებული ტექნიკა და სპეციალისტთა ჯგუფები თბილისსა და რეგიონებში სადეზინფექციო სამუშაოების განხორციელების პროცესში ჩაერთვებიან.

„კორონავირუსთან ბრძოლის ღონისძიებების დაწყების პირველივე დღეებიდან, სურსათის ეროვნული სააგენტოს სპეციალური ტექნიკა გამოყენებულია საზღვრებზე, სადაც ყველა ტვირთის შემოსვლისას დამუშავება ხდება. სააგენტოს სპეციალისტები ის ადამიანები არიან, რომლებიც არაერთ რთულ ღონისძიებაში იღებენ მონაწილეობას და დიდი გამოცდილება აქვთ. ჩვენი სპეციალისტები ბოლნისსა და მარნეულში, კარანტინში შემსვლელ-გამომსვლელ მანქანებსაც ამუშავებენ სპეციალური სადეზინფექციო ხსნარებით, რომელიც დაავადებათა კონტროლის ცენტრთან არის შეთანხმებული და აბსოლუტურად უვნებელია მოსახლეობისთვის. ჩვენი მძიმე ტექნიკა დღეს საკარანტინო ზონაში გაიგზავნება, სადაც დიდი სივრცეების დამუშავებას მოვახდენთ. რაც შეეხება თბილისს, მოხდება კრიტიკული საჯარო ინფრასტრუქტურის დამუშავება, რათა დაავადების გავრცელების რისკი მინიმუმამდე დავიყვანოთ”, - განაცხადა გარემოს დაცვისა და სოფლის მეურნეობის მინისტრმა, ლევან დავითაშვილმა. 

მინისტრის განმარტებით დედაქალაქში სადეზინფექციო სამუშაოებში 40 ერთეული სპეციალური ტექნიკა ჩაერთვება. პირველი დამუშავება მთელ ქალაქში მოხდება, შემდგომ კი ხელის აპარატებით, სამუშაოები რეგულარულად ჩატარდება, საჭიროების შემთხვევაში კი სპეციალური ტექნიკით დეზინფექცია განმეორდება.  

„დღეს ღამით, გარემოს დაცვისა და სოფლის მეურნეობის სამინისტროსთან ერთად, მნიშვნელოვან პროექტს ვიწყებთ. უშუალოდ იმ ქუჩების დეზინფექცია მოხდება, სადაც არის გაჩერებები, მეტროს შესასვლელები; სადეზინფექციო სამუშაოები ჩატარდება რამდენიმე დღის განმავლობაში. იცით, რომ საზოგადოებრივი ტრანსპორტი ყოველდღიურ რეჟიმში მუშავდება შესაბამისი სპეციალური ხსნარებით. მინდა მოსახლეობას ვუთხრა, რომ ჯანმრთელობისთვის ეს პრეპარატი საშიში არ არის“, - განაცხადა დედაქალაქის მერმა, კახა კალაძემ.

გარემოს დაცვის და სოფლის მეურნეობის მინისტრმა ლევან დავითაშვილმა სამინისტროში მობილიზებული 60 ერთეული ტექნიკა თბილისის მერთან, კახა კალაძესთან ერთად დაათვალიერა.