"ირიგაციით უზრუნველყოფილ მიწის ნაკვეთებზე სოფლის მეურნეობის პროდუქციის წარმოების ხელშეწყობის პროგრამის" პირობები გაუმჯობესდა

საქართველოს მთავრობის სხდომაზე მიღებული გადაწყვეტილებით, „ირიგაციით უზრუნველყოფილ მიწის ნაკვეთებზე სოფლის მეურნეობის პროდუქციის წარმოების ხელშეწყობის პროგრამაში“ ცვლილებები შევიდა.გაფართოვდა პროგრამის გავრცელების გეოგრაფიული არეალი. პროგრამა  განხორციელდება სოფელ კაჭრეთზე და საგარეჯოს, გორის, ქარელის მუნიციპალიტეტებში შემავალ ყველა სოფელზე.პროგრამაში შესული ცვლილებებით, გაიზარდა ერთ ბენეფიციარზე განსაზღვრული თანადაფინანსების პროცენტული მაჩვენებელი. პროგრამით გათვალისწინებული  ყველა მიზნობრიობის თანადაფინანსება განისაზღვრა 50%-ით, ახალგაზრდებისათვის -  55 %-ით, ხოლო წყალმომხმარებელთა ორგანიზაციის წევრებისთვისათვის - 60%-ით. ერთ ბენეფიციარზე გასაცემი თანადაფინანსების ჯამური ოდენობა 30 000 ლარი შეადგენს.პროგრამის მიზნობრიობებს  დაემატა მცირეგაბარიტიანი სასოფლო-სამეურნეო ტექნიკის დაფინანსება.  სოფლის განვითარების სააგენტოს თანადაფინანსების მოცულობა განსხვავებულია ტექნიკის სიმძლავრის მიხედვით და მერყეობს 1000 ლარიდან 5000 ლარის ფარგლებში.იმისათვის, რომ პროგრამამ მოიცვას რაც შეიძლება მეტი ბენეფიციარი,  პროგრამით მოთხოვნილი მიწის ფართობის სავალდებულო მინიმუმი 0.5 ჰა - დან 0.2 ჰა- მდე შემცირდა.პროგრამით, რომელსაც სოფლის განვითარების სააგენტო  ახორციელებს, ფინანსდება ერთწლოვანი კულტურებისთვის, ასევე,  მარწყვისა და იონჯის მრავალწლოვანი კულტურებისთვის თანამედროვე სარწყავი სისტემების, აგრომეტეოროლოგიური სადგურების, მზის ენერგიაზე მომუშავე ელექტროსადგურების და სასათბურე მეურნეობების  მოწყობა.აღსანიშნავია, რომ პროგრამა  სახელმწიფოს სახსრებით და მსოფლიო ბანკის სესხით თანაბარწილად დაფინანსებული „საქართველოს მდგრადი სოფლის მეურნეობის, ირიგაციისა და მიწის  პროექტის“ შემადგენელი ნაწილია. 

ფრანგ მეცნიერთა დელეგაცია ჯიღაურას მრავალწლოვანი კულტურების საცდელ-სადემონსტრაციო ბაზას სტუმრობდა

სოფლის მეურნეობის სამეცნიერო-კვლევითი ცენტრის ჯიღაურას მრავალწლოვანი კულტურების საცდელ-სადემონსტრაციო ბაზას საფრანგეთის მევენახეობა-მეღვინეობის აგროეკოლოგიის, ფიზიოლოგიის, მიკრობიოლოგიის მიმართულების მეცნიერთა წარმომადგენლობითი  დელეგაცია ეწვია.სოფლის მეურნეობის სამეცნიერო-კვლევითი ცენტრის დირექტორმა ლევან უჯმაჯურიძემ დელეგაციის წევრებს ცენტრის მიერ განხორციელებული და მიმდინარე  მნიშვნელოვანი პროექტები გააცნო; განსაკუთრებული ინტერესი გამოიწვია ადგილობრივი ვაზის ჯიშების  ნარგაობებმა, სადაც  1000-მდე გენოტიპია წარმოდგენილი. ლევან უჯმაჯურიძემ ყურადღება გაამახვილა მრავალწლიანი მუშაობით მოძიებული და ჯიღაურას საკოლექციო ნარგაობებში დაცული  ვაზის, ასევე ხეხილოვანი და აგროსატყეო  კულტურების უნიკალურ გენეტიკურ რესურსებზე და მათ მნიშვნელობაზე ბიომრავალფეროვნების შენარჩუნების საქმეში.უცხოელი სტუმრების დელეგაცია, რომელიც სოფლის მეურნეობის, სურსათისა და გარემოს ეროვნული ინსტიტუტის (INRAE,  მონპელიე)  და პარტნიორი  კვლევითი ორგანიზაციების (ბორდო, ჟირონდა) წარმომადგენლებისგან შედგებოდა, ქართველი მეცნიერების საქმიანობის იმ მიმართულებებს გაეცნენ, რომელიც ვაზის ჯიშების ამპელოგრაფიული ნიშნებით იდენტიფიცირებას, კლონურ სელექციას, სანამყენეთა და საძირეთა საბაზისო  მასალების წარმოებას, სერტიფიცირებას,  კლიმატური ცვლილებებთან ადაპტირებული ჯიშების მიღებას, მიკროვინიფიკაციას და სხვ. მნიშვნელოვან საკითხებს ეხებოდა.სსიპ სოფლის მეურნეობის სამეცნიერო-კვლევით ცენტრსა და საფრანგეთის სოფლის მეურნეობის, სურსათისა და გარემოს ეროვნული ინსტიტუტს (INRAE) შორის გაფორმებული მემორანდუმის ფარგლებში, მხარეებმა იმსჯელეს სამომავლოდ განსახორციელებელ ერთობლივ საერთაშორისო პროექტებზე, რომელიც ჯიღაურასა და საფრანგეთის  ვასალის (მონპელიე)  კოლექციებში მიმდინარე კომპლექსურ ამპელოგრაფიულ სამუშაოებს, მათ შორის,  მონაცემთა ბაზების განახლებას და ახალი საცდელი ნაკვეთის გაშენებას ეხება.შეხვედრის დასასრულს, საფრანგეთის დელეგაციის წევრებმა ჯიღაურას საკოლექციო ნარგაობაში დაცული ვაზის ადგილობრივი ჯიშების ყურძნისაგან დამზადებული ღვინის ნიმუშები დააგემოვნეს. დეგუსტაცია სამეცნიერო-კვლევითი ცენტრის მევენახეობა-მეღვინეობის თანამშრომელთა ორგანიზებით ჩატარდა.

იაპონიის დედაქალაქ ტოკიოში ქართული ღვინის წარდგენა გაიმართა

ღვინის ეროვნული სააგენტოს მხარდაჭერით, ღვინისა და ალკოჰოლიანი სასმელების საერთაშორისო გამოფენაში ProWein Tokyo ქართული ღვინის მწარმოებელი 9 კომპანია მონაწილეობდა.გამოფენას ,Prowine Tokyo 2025 50 ათასამდე ვიზიტორი სტუმრობდა, მათ შორის, ღვინის პროფესიონალები და კომერციული სფეროს წარმომადგენლები, რაც მნიშვნელოვანია იაპონიაში ქართული ღვინის ცნობადობის გაზრდისთვის,  ბაზარზე დამკვიდრებისა და სავაჭრო პარტნიორების მოძიებისთვის.ProWein Tokyo-ს იაპონიაში საქართველოს საგანგებო და სრულუფლებიანი ელჩი თეიმურაზ ლეჟავა დაესწრო. გამოფენაზე ღვინის წარსადგენად, ქართველმა მეწარმეებმა მხარდაჭერა იაპონიაში საქართველოს საელჩოსგანაც მიიღეს.ტოკიოში ასევე გაიმართა ქართული ღვინის საგანმანათლებლო მასტერკლასი  და დეგუსტაცია, რომელსაც 30 ღვინის პროფესიონალი, მედიის და კომერციული სექტორის წარმომადგენელი დაესწრო. დეგუსტაციას უძღვებოდა საფრანგეთის ღვინის აკადემიის (Academie du Vin) ექსპერტი ფრედერიკ კაიუე (Frederic Cayuela), რომელიც იაპონიის ღვინის სფეროშიც მოღვაწეობს და იაპონურ კომპანიას „Oteroirs K.K.” წარმოადგენს. დეგუსტაციაზე წარმოდგენილი იყო სხვადასხვა სახეობის 7 ქართული ღვინო.იაპონია ქართული ღვინის ერთ-ერთი სტრატეგიული ბაზარია, სადაც ღვინის ეროვნული სააგენტოს მხარდაჭერით, ქართული ღვინის პირველი მასშტაბური წარდგენა 2014 წელს გაიმართა. შემდგომ წლებში, ასევე ღვინის ეროვნული სააგენტოს მხარდაჭერით,  ქართული ღვინის კომპანიები მონაწილეობდნენ გამოფენებში „Foodex Japan“, „Wine and Gourmet Japan“, „RAW Wine Tokyo”, „ProWein Tokyo”, ადგილობრივ ღვინის კონკურსებში, ქართული ღვინის წარდგენა-დეგუსტაციებში, რომლებიც იაპონიის სხვადასხვა ქალაქში გაიმართა; პარალელურად, მოეწყო იაპონელი ღვინის პროფესიონალებისა და მედიის წარმომადგენლების ტურები საქართველოში.

"უამინდობის გამო, საჭირო რაოდენობის თაფლი ვერ ვაწარმოვეთ, საექსპორტო ქვეყნები სხვა ბაზრებზე გადაერთვნენ" - ქართველი მეფუტკრე

დასავლეთ საქართველოში, რომელზეც ქვეყანაში წარმოებული თაფლის უდიდესი წილი მოდის, ფუტკრის გავრცელებულ პარაზიტს ებრძვიან, რომელიც ანადგურებს ფუტკარს, - ამის შესახებ „ბიზნესპარტნიორს“  შპს „დესპანის“ დამფუძნებელმა ლადო ვარდოსანიძემ განუცხადა.მისი ვარაუდით, არ არის გამორიცხული რომ ეს დაავადება (საუბარია ტროპოლელაპსზე)  აღმოსავლეთ საქართველოშიც გადმოვიდეს. „და თუ ეს მოხდება, სავარაუდოდ,  ქვეყანაში ფუტკრების ოჯახების რაოდენობა განახევრდება“, - განმარტა ვარდოსანიძემ.როგორც შპს „დესპანის“ დამფუძნებელმა აღნიშნა, ამ გამოწვევასთან ბრძოლის მიზნით, მეფუტკრე ფერმერებს შეხვედრა ჰქონდათ სურსათის ეროვნულ სააგენტოსთან და დაიგეგმა სამუშაო ჯგუფების შექმნა, რომლებიც ამ დაავადებაზე იმუშავებენ, გარდა ამისა, თაფლის სექტორში არსებულ სხვა გამოწვევებსაც გადაჭრიან.უნდა ითქვას, რომ ქვეყანაში მეფუტკრეების ხელშეწყობის მიზნით გარკვეული პროგრამებიც ხორციელდება. მათ შორის, სოფლის განვითარების სააგენტო მეფუტკრეებს შესაძლებლობას აძლევს, ახალი სკები შეიძინონ. პროგრამის ფარგლებში, ბენეფიციარს შეუძლია მიიღოს თანადაფინანსება ერთი სკის ღირებულების არაუმეტეს 50%-ისა. პროგრამაში მონაწილეობის მისაღებად, პოტენციურ ბენეფიციარს  უნდა ჰყავდეს არანაკლებ 10 ფუტკრის ოჯახი.რაც შეეხება ქვეყნიდან თაფლის ექსპორტის საკითხს, აქ კლების მაჩვენებლები ფიქსირდება. კლება შეინიშნება როგორც მთლიანად წლიურ ჭრილში, ისე რამდენიმე თვის მონაცემებითაც. მაგალითისთვის, 2025 წლის იანვარ-თებერვალში საქართველოდან ექსპორტზე 530 კილო თაფლი გავიდა, მაშინ როდესაც გასული წლის ანალოგიურ პერიოდში, ეს მაჩვენებელი 13 ტონა იყო. აღნიშნული სტატისტიკური მონაცემები ცხადყოფს, რომ ქვეყანას ნატურალური თაფლის ექსპორტი თითქმის 96%-ით შეუმცირდა. მთლიანად, გასულ 2024 წელს კი, საქართველოდან უცხოეთში 271 ათასი დოლარის ღირებულების თითქმის 34 ტონა თაფლი გაიყიდა, რაც 2023 წელთან შედარებით, მოცულობაში თითქმის 70%-იანი შემცირებაა.„უნდა ითქვას, რომ ქართული თაფლის გასაღების მთავარი ბაზარი 2024 წლამდე ევროკავშირი იყო. მაგალითად, 2023 წელს ყველაზე დიდი მოცულობით თაფლი ექსპორტზე საფრანგეთში გავიდა, მანამდე ამ კუთხით ბულგარეთი ლიდერობდა, 2024 წელს კი აღნიშნულ პოზიციაზე - აზერბაიჯანი დაწინაურდა“, - აღნიშნა ლადო ვარდოსანიძემ.მან საექსპორტო ბაზრების ცვლილებასა და ექსპორტის კლების მიზეზებზეც ისაუბრა. შპს „დესპანის“ დამფუძნებლის თქმით, ექსპორტში კლების მიზეზი, ბოლო წლებში, ქვეყანაში დაფიქსირებული ცუდი კლიმატური პირობები გახდა, რის გამოც, საჭირო რაოდენობის თაფლი (საუბარია აკაციის თაფლზე) ვერ აწარმოეს, შესაბამისად, ის რაოდენობა, რასაც საექსპორტო ქვეყნები ითხოვდნენ, ვერ მიაწოდეს. ამის გამო, ეს ბაზრები სხვა მომწოდებლებზე გადაერთვნენ, მათ შორის - ჩინეთზე, რომელიც დაბალფასიან თაფლს აწარმოებს.ლადო ვარდოსანიძე ამბობს იმასაც, რომ ქართული თაფლი მაღალი ხარისხიდან გამომდინარე, მაღალ საფასო სეგმენტში გადის, შესაბამისად, საექსპორტო ბაზრებზე გასვლაში, მაღალი ფასიც უშლის ხელს.ცნობისთვის, ამჟამად, ქვეყანაში ოფიციალურად 1300-მდე საფუტკრე მეურნეობაა დარეგისტრირებული, რომლებიც 53 ათასზე მეტ სკას მოიცავს.bp.ge 

დავით სონღულაშვილი საქართველოში სლოვაკეთის რესპუბლიკის საგანგებო და სრულუფლებიან ელჩს, მატუშ ბუშოვსკის შეხვდა

გარემოს დაცვისა და სოფლის მეურნეობის მინისტრი დავით სონღულაშვილი საქართველოში სლოვაკეთის რესპუბლიკის საგანგებო და სრულუფლებიან ელჩს, მატუშ ბუშოვსკის შეხვდა.შეხვედრაზე მხარეებმა ქვეყნებს შორის სავაჭრო-ეკონომიკური ურთიერთობების გაღრმავების და სამომავლო თანამშრომლობის პერსპექტივები განიხილეს.მინისტრმა ხაზგასმით აღნიშნა სახელმწიფოსთვის გარემოსდაცვითი და აგრარული დარგის განვითარების პრიორიტეტულობის საკითხი და ელჩს აღნიშნული მიმართულებებით ხელშემწყობი სახელმწიფო პროგრამების და გატარებული ღონისძიებების შესახებ მიაწოდა ინფორმაცია.დავით სონღულაშვილის განცხადებით, საქართველოსა და სხვადასხვა ქვეყანას შორის გაფორმებული თავისუფალი ვაჭრობის შესახებ შეთანხმებები მნიშვნელოვანი ფაქტორია სლოვაკეთის მხრიდან აგრარულ დარგში ინვესტიციების განსახორციელებლად.შეხვედრაზე საუბარი შეეხო წყლის რესურსების, ნარჩენების ეფექტიანი მართვის, ირიგაციის და გადამმუშავებელი მიმართულებით თანამშრომლობის საკითხებს. მინისტრმა მადლობა გადაუხადა სლოვაკეთის მხარეს აგრარული და გარემოსდაცვითი მიმართულებებით სხვადასხვა პროექტის ფარგლებში გაწეული მხარდაჭერისთვის.მატუშ ბუშოვსკის განცხადებით,  ქვეყნებს შორის წარმატებული თანამშრომლობის დიდი პოტენციალი არსებობს, რაც მომავალში კონკრეტულ შედეგებს გამოიღებს.სამინისტროში გამართულ შეხვედრას შესაბამისი სამსახურის ხელმძღვანელი პირები ესწრებოდნენ.