"ეს რეალობასთან ახლოს არ არის" - პაატა იმნაძის პასუხი მათ, ვინც ფიქრობს, რომ ახალი კორონა ნოემბერში გადაიტანეს
1585736495
დაავადებათა კონტროლის ეროვნული ცენტრის დირექტორის მოადგილე პაატა იმნაძე საქართველოს მოქალაქეების იმ ნაწილს პასუხობს, ვინც ფიქრობს, რომ მსგავსი სიმპტომებით ახალი კორონავირუსი წინა წლის ნოემბერ-დეკემბერში უკვე გადაიტანეს.
"ნუ დაგვავიწყდება, რომ მსგავსი სიმპტომებით - ტემპერატურა, ხველა და ა.შ საქართველოში ნოემბერში დაიწყო გრიპისა და გრიპის მაგვარი დაავადებების სეზონი. დაინტერესებულებს ვთხოვ იხილონ ჩვენი ვებ-გვერდი, სადაც წერია, რომელი ვირუსები ცირკულირებდა ქვეყანაში, ეს იყო მაგალითად B ტიპის ვირუსები, იქ იყო კორონავირუსები, ოღონდ ჩვეულებრივი ადამიანის კორონავირუსები და არა ახალი, რესპირატორიულ- სინციტიური ვირუსი, რომელიც სხვათაშორის დღესაც გრძელდება. შეიძლება ვიღაცას მოეჩვენოს, რომ შარშან ზაფხულშიც ჰქონდა გადატანილი. ეს რეალობასთან ახლოს არ არის", - განაცხადა პაატა იმნაძემ.
ცნობისთვის, საქართველოში ახალი კორონავირუსის პირველი შემთხვევა 26 თებერვალს დადასტურდა. დღეის მდგომარეობით, ქვეყანაში კორონავირუსის 115 დადასტურებული შემთხვევაა, აქედან 23 უკვე გამოჯანმრთელდა.
