გოფოძე: ბოლო 2 დღეა კლინიკაში კოვიდინფიცირებული პაციენტი არ მიგვიღია
1589800256
"ბოლო 2 დღეა კლინიკაში კოვიდინფიცირებული პაციენტი არ მიგვიღია", - ამის შესახებ რესპუბლიკური საავადმყოფოს ხელმძღვანელმა, ექიმმა ლევან გოფოძემ განაცხადა.
გოფოძის თქმით, კლინიკაში მყოფი 63 პაციენტიდან 43 კოვიდინფიცირებულია. მისივე ინფორმაციით, დღეს კლინიკას კორონავირუსისგან განკურნებული კიდევ 1 პაციენტი დატოვებს.
"დღეს კიდევ ერთ პაციენტს გავუშვებთ, ზედიზედ 2 ტესტზე ნეგატიური პასუხები მოვიდა და ასეთი პაციენტები ტოვებენ კლინიკას გამოჯანმრთელებულის სტატუსით. კიდევ 6 პაციენტს ჩაუტარდა ტესტირება და ვნახოთ როგორ განვითარდება მოვლენები. ბოლო 2 დღეა კლინიკაში კოვიდინფიცირებული პაციენტი არ მიგვიღია. ბოლოს ვინც მივიღეთ იყო ბოლნისის კლასტერიდან. 1 მძიმე პაციენტი გვყავს, პაციენტს ორმხრივი პნევმონია აქვს, ასაკოვანია და მართვით სუნთქვაზეა. კოვიდინფიცირებულია. ამ პაციენტში ბოლო 2 დღეა სტაბილიზაციის ნიშნები იკვეთება, რაც გარკვეულ იმედებს გვიტოვებს, მაგრამ ჯერჯერობით ამას დაბეჯითებით ვერ ვიტყვით", - აღნიშნა გოფოძემ.
