დღეს, 8 ნოემბერს ნაციონალური მოძრაობის ერთ-ერთმა ლიდერმა დაგეგმილ აქციასთან დაკავშირებით ისაუბრა და აგრეთვე 2020 წლის არჩევნები შეაფასა.
მისი თქმით, გაერთიანებული ოპოზიციის წარმომადგენლები შეიკრიბებიან 2 ადგილმდებარეობაზე. ეს იქნება რესპუბლიკის მოედანი და რუსთაველის გამზირი.
„ნამდვილად ვერ გეტყვით რამდენი ადამიანი იქნება დღეს აქ. იმდენად ბევრ ადამიანს ველოდებით, რომ არ ვიცი ეს რამდენი იქნება“, - აღნიშნა ზაალ უდუმაშვილმა.
მისი თქმით, ადამიანები აქციაზე საქართველოს სხვადასხვა რეგიონიდან მოდიან.
„მირეკავენ და მეუბნებიან, ზალიკო ყელში ამოვიდა ყველაფერი და მოვდივართ“, - დასძინა ზაალ უდუმაშვილმა ერთ-ერთ სატელევიზიო ეთერში.
მისი თქმით, პარტიების მთავარი სათქმელი არის ის, რომ ბიძინა ივანიშვილს არ შეარჩენენ ქართველი ამომრჩევლის ხმების მოპარვას.
ცნობისთვის, ოპოზიცია დღეს 15:00 საათზე პარლამენტის წინ მასშტაბურ აქციას გამართავს.
📌 ინფორმაციისთვის, არჩევნების შედეგების გაპროტესტების მიზნით, ყველა ოპოზიციურმა პარტიამ, რომელმაც 2020 წლის საპარლამენტო არჩევნებში 1%-იანი ბარიერი გადალახა, საკანონმდებლო ორგანოში შესვლაზე უარი განაცხადა.