ზაზა გახელაძე უკანონო განაჩენს არ გაასაჩივრებს
1613371579
ოკუპირებულ ცხინვალში, უკანონო პატიმრობაში მყოფი ზაზა გახელაძე ე.წ. სასამართლოს განაჩენის გასაჩივრებას არ გეგმავს. ამის შესახებ ზაზა გახელაძის ოჯახს სახაზინო ადვოკატმა შეატყობინა.
ირმა ბუთხუზის თქმით, არ იცის, მისმა მეუღლემ აღნიშნული გადაწყვეტილება რატომ მიიღო.
„ადვოკატი ამბობს, რომ ზაზას არ უნდა გასაჩივრება. ჩვენ გვქონდა სურვილი, თუმცა ეს ზაზას უნდა გაეკეთებინა. არ ვიცი, ასე რატომ გადაწყვიტა. ესაა ზაზას გადაწყვეტილება და ჩვენ მის წინ ვერ წავალთ“, – აღნიშნა ირმა ბუთხუზმა.
შეგახსენებთ, რომ 5 თებერვალს ოკუპირებული ცხინვალის დე ფაქტო სასამართლომ საოკუპაციო ძალების მიერ დაკავებულ ზაზა გახელაძეს 12 წლითა და 6 თვით პატიმრობა მიუსაჯა.
ზაზა გახელაძე საოკუპაციო რეჟიმის წარმომადგენლებმა გასული წლის 11 ივლისს დააკავეს.
