ბათუმში ახალი სკვერების და მასშტაბური კომუნალური ინფრასტრუქტურის მშენებლობა მიმდინარეობს
1606918472
აჭარის მთავრობის თავმჯდომარემ თორნიკე რიჟვაძემ ბათუმის მერის მოვალეობის შემსრულებელთან არჩილ ჩიქოვანთან ერთად ბათუმში მიმდინარე ინფრასტრუქტურული პროექტები დაათვალიერა. ამის შესახებ ინფორმაციას აჭარის მთავრობის პრესსამსახური ავრცელებს.
მათივე ინფორმაციით, ბათუმის მუნიციპალური ინფრასტრუქტურის რეაბილიტაციის პროექტის IV ფაზის ფარგლებში, კობალიძის ქუჩაზე დასრულდა მაგისტრალური წყალარინების კოლექტორის მოწყობა. ამ დროისთვის მიმდინარეობს გზის საფარის სამუშაოები. IV ფაზის ფარგლებში პარალელურად რამდენიმე პროექტი ხორციელდება, რომელთა საერთო ღირებულება 17 მილიონ ევროს შეადგენს.
„ბათუმში ინასარიძის ქუჩაზე დაიწყო ახალი სკვერის მშენებლობა. პროექტის ფარგლებში მოეწყობა საბავშვო ატრაქციონები და ტრენაჟორები. დაიგება მწვანე კორდი და დეკორატიული ფილები. დამონტაჟდება შადრევანი და გარეგანათების სისტემა. განთავსდება საბაღე სკამები და დეკორატიული ურნები.
ასევე დაგეგმილია სკვერის მიმდებარედ არსებული სპორტული მოედნის რეაბილიტაცია და საპარკინგე სივრცის მოწყობა. ამ ეტაპზე, უკვე დასრულდა სანიაღვრე სისტემის მონტაჟი და მიმდინარეობს შადრევნისა და ტროტუარების მოწყობა“. - აღნიშნულია განცხადებაში.
ინფორმაციისთვის, პროექტის ღირებულება 832 ათას ლარს აღემატება.
