ირაკლი ქადაგიშვილი: ზუსტად ვიცი კახეთის რეგიონის ყველა პრობლემა

„ზუსტად ვიცი კახეთის რეგიონის ყველა პრობლემა, იმიტომ, რომ ამ პერიოდის განმავლობაში ყოველდღიურად ვიყავი ჩართული ყველა პრობლემის მოგვარებაში და ყველა გამოწვევის გადაწყვეტაში, რომელიც ჩვენს წინაშე იდგა. ბევრი ასეთი გამოწვევა დაძლეულია. ლაგოდეხის მუნიციპალიტეტი შეიძლება ითქვას, რომ ერთ-ერთი ლიდერი მუნიციპალიტეტია იმ პროექტების განხორციელებაში, რომელიც კახეთში ძალიან ფართოდ ხორციელდება“, - ამის შესახებ „ქართული ოცნების“ მაჟორიტარი დეპუტატობის კანდიდატმა ირაკლი ქადაგიშვილმა ლაგოდეხის მოსახლეობასთან შეხვედრისას განაცხადა.

ქადაგიშვილი მოსახლეობას რეგიონში არსებული პრობლემების მოგვარებას დაპირდა და აღნიშნა, რომ ინფრასტრუქტურისა და წყალმომარაგების საკითხების მოწესრიგება მისთვის პრიორიტეტულია:

„მარტო მიმდინარე წელს ცხრა მილიონი ლარის სასოფლო გზები დაიგება, ფაქტობრივად არ დარჩება მუნიციპალიტეტში ისეთი სოფელი, სადაც გზა არ იქნება. ძალიან ბევრ ადგილას, დიდი სოფლებში უკვე ყველა მიმართულებით საგზაო ინფრასტრუქტურა იქნება. მუნიციპალიტეტში დაახლოებით წყლის ათამდე პროექტი ხორციელდება. ძალიან წყალუხვი მუნიციპალიტეტია, მაგრამ გამართულ წყალმომარაგებას სულ სხვა მენეჯმენტი და ტექნიკური გადაწყვეტა სჭირდება.

გარკვეული გამოწვევები გადავლახეთ და ამ პროცესს ვაგრძელებთ ქალაქ ლაგოდეხში, რათა ერთხელ და სამუდამოდ სუფთა, 24 საათის განმავლობაში უზრუნველყოფილი წყალმომარაგება ჰქონდეს მოსახლეობას. ჩვენ ვაშენებთ ბაღებს, ვაშენებთ ახალ სკოლებს. ვარემონტებთ ყველა სკოლას, ვარემონტებთ ყველა ბაღს. ეს ის საქმიანობაა, რომელიც ჩვენი მუშაობის ყოველდღიურ ვალდებულებად იქცა.

ამიტომ, ჩემი გამარჯვების შემთხვევაში, მე მუნიციპალიტეტის კიდევ უფრო მეტი უფლებამოსილებით აღჭურვით ვიქნები დაკავებული პარლამენტში, რომელიც საშუალებას მისცემს მუნიციპალიტეტს უფრო მეტად, სწრაფად, ეფექტურად გადაჭრას ყველა ის პრობლემა, ყველა ის საჭიროება, რომელიც მუნიციპალიტეტის მოსახლეობის წინაშე დგას იმიტომ, რომ ცხოვრების წინსვლა ახალ მოთხოვნას აყენებს. ის, რაც გაკეთდა, ეს არის უკვე განვლილი ეტაპი, მაგრამ ეს ის მყარი საფუძველია, რომელზე დაყრდნობით შემდეგი ნაბიჯი უნდა გადავდგათ ჩვენი მოსახლეობის ცხოვრების დონის ამაღლების მიზნით“, - აღნიშნა ქადაგიშვილმა.

„ქართული ოცნების“ მაჟორიტარი დეპუტატობის კანდიდატმა მოსახლეობასთან საუბრისას რეგიონში პანდემიის ფონზე მიმდინარე სამუშაოებზე ისაუბრა და აღნიშნა, რომ კახეთმა ეს პერიოდი წარმატებით გაიარა.

„თქვენ იცით, რომ ჩვენი ქვეყანა, ისევე როგორც მთელი მსოფლიო პანდემიის პირობებში ცხოვრობს. კახეთმა ძალიან წარმატებულად განვლეთ მთელი ეს პერიოდი. არ დარჩენილა მოსავალი, რომელიც კახეთში მოვიდა და არ დაბინავებულიყო. ძალიან მოქნილად ვიმუშავეთ ჯანდაცვის მუშაკებთან ერთად, ადგილობრივ ხელისუფლებასთან, სამართალდამცავებთან ერთად და ერთი დღითაც კი არ შეგვიფერხებია მოსახლეობის გასვლა თავიანთ სავარგულებში ყველა იმ წესების დაცვით, რაც არ იყო ადვილი დასაცავი და მისატანი მოსახლეობასთან.

ფერმერებს მუშაობის მაქსიმალური საშუალება მივეცით და ამით ჩვენ მივიღეთ ის, რომ არცერთი კილოგრამი ყურძენი იქნება ეს თუ ბოსტნეულ-ბახჩეული, ხილი და სხვა კულტურა, რომლითაც მდიდარია კონკრეტულად ლაგოდეხის მუნიციპალიტეტი, არ გაფუჭებულა, დაუბინავებელი არაფერი დარჩენილა და ყველა ამ პროდუქტმა თავისი მომხმარებელი ნახა, სათანადო, ნორმალურ ფასშიც გაიყიდა. ესეც ჩვენი წარმატებაა, რომ ამ პირობებში შევძელით და არ გავჩერდით, მაინც წინ წავედით.

ასეთი პატარა, მაგრამ წარმატების ისტორია სჭირდება მუნიციპალიტეტს, ოჯახს და სჭირდება მთელ ჩვენს ქვეყანას იმიტომ, რომ დამოუკიდებლობის მიღების შემდეგ ათეული წლების განმავლობაში იყო გამარჯვებაც, მაგრამ იყო ძალიან ბევრი ტკივილი, იყო ძალიან დიდი პრობლემების დაგროვება და დღეს, ჩვენი ქვეყანა მსოფლიოში ერთი, საერთო დიდი ბრძოლის ძალიან წარმატებული ისტორია ვართ. ამ წარმატებას სჭირდება გამრავლება, ბოლომდე მიყვანა“, - განაცხადა ქადაგიშვილმა.