ბიძინა ივანიშვილი ჯემალ ჭკუასელს 85 წლის იუბილეს ულოცავს
1601308472
„ქართული ოცნების“ თავმჯდომარე ბიძინა ივანიშვილი სახელმწიფო ანსამბლ „ერისიონის" სამხატვრო ხელმძღვანელს, ლოტბარსა და ფოლკლორისტს ჯემალ ჭკუასელს 85 წლის იუბილეს ულოცავს.
როგორც მისალოც ტექსტში ივანიშვილი აღნიშნავს, ის დარწმუნებულია, რომ საქმეს, რომელსაც ჯემალ ჭკუასელი ემსახურება, თაობები დააფასებენ:
„ჩვენო საყვარელო, ბატონო ჯემალ, მე და ჩემი ოჯახი მთელი გულით გილოცავთ 85 წლის იუბილეს!
ბედნიერებაა, პირადად იცნობდე ქართული კულტურის დიდ მოამაგესა და ქომაგს, თავისი საქმის ერთგულ, დაუღალავ კაცს, რომელმაც მთელი ცხოვრება მიუძღვნა ჩვენი ყველაზე დიდი საგანძურის - უნიკალური ქართული ფოლკლორის აღორძინებას.
გისურვებთ ჯანმრთელობას და დიდხანს სიცოცხლეს. დარწმუნებული ვარ, ამ კეთილშობილურ საქმეს, რომელსაც თქვენ ემსახურებით, თაობები დააფასებენ. ბიძინა ივანიშვილი“, - აღნიშნულია „ქართული ოცნების“ ოფიციალურ ფეისბუკ გვერდზე.
ჯემალ ჭკუასელი დაბადების დღეს 18 მაისს აღნიშნავს, თუმცა, სახალხო არტისტის იუბილე დღეს, ანსამბლ „ერისიონის“ 135-ე წლისთავთან ერთად აღინიშნა.
ანსამბლი „ერისიონი“ 1885 წელს დაარსდა და დღეს ის ეთნო-სტილში ერთ-ერთი ყველაზე მასშტაბური საერთაშორისო პროექტია.
ჯემალ ჭკუასელი ანსამბლ „ერისიონს“ სათავეში 1986 წლიდან ედგა.
ჯემალ ჭკუასელი საქართველოს სახალხო არტისტი, შოთა რუსთაველის სახელობის სახელმწიფო პრემიის ლაურეატია. ამჟამად „ერისიონს“ მისი ვაჟი შერმადინ ჭკუასელი ხელმძღვანელობს.
