ნატოს გენმდივანი ავღანეთიდან აშშ-ის ძალების გაყვანით გამოწვეულ საფრთხეებზე საუბრობს
1605682127
ნატოს გენერალურმა მდივანმა იენს სტოლტენბერგმა განაცხადა, რომ ავღანეთიდან აშშ-ის ძალების გაყვანის შემდეგ ალიანსი „მაღალ ფასს“ გადაიხდის. ავღანეთიდან ძალების გაყვანას შეერთებული შტატების მოქმედი პრეზიდენტი დონალდ ტრამპი აპირებს. ინფორმაციას washingtonpost.com ავრცელებს.
„ჩვენ საკმაოდ რთული გადაწყვეტილების წინაშე ვდგავართ. ჩვენ ავღანეთში 20 წლის განმავლობაში ვიმყოფებოდით, ნატოს არც ერთ ქვეყანას არ სურს იქ იმაზე დიდ ხანს ყოფნა, ვიდრე ეს საჭიროა. მაგრამ ნაჩქარევი და არაკოორდინირებული გასვლის ფასი შეიძლება ძალზე მაღალი იყოს“ - განაცხადა სტოლტენბერგმა.
მისი თქმით, ავღანეთში ყოველთვის ნატოს მინიმუმ 12 ათასი სამხედრო მოსამსახურე იმყოფებოდა და მათი ნახევარი ამერიკელი სამხედროები იყვნენ. ნატოს სამხედრო კონტინგენტისთვის ძალზე მნიშვნელოვანია ამერიკელი სამხედროების დახმარება ტრანსპორტის და ლოჯისტიკის კუთხით.
ბოლო დროს მედიაში ვრცელდება ინფორმაცია, რომ აშშ-ის პრეზიდენტი დონალდ ტრამპი თანამდებობიდან წასვლამდე ავღანეთიდან შეიარაღებული ძალების გაყვანას აპირებს. ექსპერტების აზრით, პენტაგონის ხელმძღვანელის, მარკ ესპერის გადაყენება სწორედ ამის გამო მოხდა, ვინაიდან ის ავღანეთიდან ძალების გაყვანის წინააღმდეგი იყო.
