ე.წ. სამხრეთ ოსეთის „უშიშროების კომიტეტი“ საქართველოს მიერ უპილოტო საფრენი აპარატების გამოყენებას აპროტესტებს
1623834942
ცხინვალის დე ფაქტო მთავრობის „უშიშროების კომიტეტი“ საქართველოს მიერ უპილოტო საფრენი აპარატების გამოყენების გახშირებულ ფაქტებს აპროტესტებს. ამის შესახებ ის ფეისბუკის გვერდზე წერს.
„18 მაისს და 3 ივნისს სოფელ იუსტას მახლობლად ორი კვადროკოპტერის ფრენის ფაქტი დაფიქსირდა. უპილოტო აპარატებმა სამხრეთ ოსეთის საჰაერო სივრცე დაარღვიეს და რესპუბლიკის ტერიტორიაზე 150 მეტრით შეფრინდნენ“, - წერია განცხადებაში.
ე.წ. კომიტეტის ინფორმაციით, ამ ტიპის საჰაერო აპარატებს ქართული მხარე სადაზვერვო მიზნებისთვის იყენებს. მათივე ცნობით, საქართველოს შინაგან საქმეთა სამინისტროს და უშიშროების სამსახურს მოიერიშე დრონებიც გააჩნია, რომლებსაც შესაბამისი შეიარაღება აქვთ, რაც „ძალზე სახიფათო ფაქტორს წარმოადგენს“.
ე.წ. უშიშროების სამსახური ვითარების განმუხტვის ერთ-ერთ საშუალებად „საზღვრის დელიმიტაციას და დემარკაციას“ და „საზღვარზე“ შესაბამისი რეჟიმის დაწესებას ასახელებს.
