ირაკლი ბებუას, რომელმაც 30 სექტემბერს ოკუპირებულ აფხაზეთში ე.წ. „აფხაზეთის სახელმწიფო დროშა“ დაწვა, ბრალი წაუყენეს ტყვია-წამლის უკანონო შენახვაში.
ამის შესახებ „ეხო კავკაზა“ იუწყება. ამ ინფორმაციის მიხედვით, ბებუას სახლში ჩატარებული ჩხრეკის შედეგად აღმოჩენილია ხელყუმბარა РГ-42, რომელიც „ასაფეთქებელ მოწყობილობას წარმოადგენს“.
ახლა ბებუას ბრალს უყენებენ "აფხაზეთის სახელმწიფო სიმბოლოს განადგურებაში დამამძიმებელ გარემოებებში და ტყვია-წანლის უკანონო შენახვაში".
ირაკლი ბებუამ „აფხაზეთის დროშა“ 30 სექტემბერს გალის რაიონში დაწვა. ამ დღეს სოხუმში „გამარჯვების დღეს“ აღნიშნავდნენ. იმავე დღეს ის დააკავეს. ქართული მხარე ირაკლი ბებუას დაუყოვნებლივ გათავისუფლებას მოითხოვს.