თბილისის ინფექციური საავადმყოფოს ბოქსირებული განყოფილების უფროსი მარინა ენდელაძე საქართველოს მოქალაქეებს მოუწოდებს, პირბადე ღია სივრცეშიც ატარონ.
„ქუჩაშიც პირბადით უნდა ვიაროთ, რადგან შესაძლოა, ახლო კონტაქტი მოგვიწიოს. აუცილებელია რეგულაციების ძალიან სერიოზულად დაცვა“, - აღნიშნა მარინა ენდელაძემ.
ინფორმაციისთვის, პირბადე სავალდებულოა მხოლოდ დახურულ სივრცეში. რეგულაციების დარღვევაზე ჯარიმაა - ფიზიკური პირი 20 ლარით ჯარიმდება, იურიდიული 500 ლარით.
ბოლო პერიოდში, საქართველოში ყოველდღიურად კორონავირუსის ახალი შემთხვევების მნიშვნელოვანი მატებაა. შესაბამისად, ეპიდემიოლოგები და ინფექციონისტები მოსახლეობას მოუწოდებენ, პირბადე ღია სივრცეშიც ატარონ.
გასული დღე-ღამის განმავლობაში საქართველოში კორონავირუსის 919 ახალი შემთხვევა გამოვლინდა, 208 პაციენტი გამოჯანმრთელდა, 4 გარდაიცვალა.