პარტია „გირჩის“ თავმჯდომარის იაგო ხვიჩიას განცხადებით, ბიძინა ივანიშვილის პოლიტიკიდან წასვლა „ქართულ ოცნებაზე“ უარყოფითად აისახება.
მისი თქმით, კონფლიქტები, რომლებიც პარტიის წევრებს შორის იქმნება, მოუგვარებელი დარჩება.
„სად მიდის ის ძალაუფლება, რომელიც ბიძინა ივანიშვილს ჰქონდა? ჩვენ ვიცით, რომ გვაქვს სამი ხელისუფლება, საკანონმდებლო - არჩილ თალაკვაძის ხელმძღვანელობით, აღმასრულებელი - გახარიას მეთაურობით და სასამართლო - მურუსიძე-ჩინჩალაძის. ადამიანურადაც კი ეს ხალხი განსხვავებულია. ბიძინა ივანიშვილი იყო უმაღლესი მსაჯული, ქურუმი, რომელიც კონფლიქტებს აგვარებდა და სიტუაციას ასტაბილურებდა. ასეთი ხალხი ერთ დღეში არ მიდის“, - აღნიშნა იაგო ხვიჩიამ.
იგი თვლის, რომ ბიძინა ივანიშვილის მხრიდან ძალაუფლებაზე უარის თქმა რეალური არ არის.
„ბიძინა ივანიშვილი, რომ მართლა წავიდეს, „ქართული ოცნების“ შიგნით კატასტროფა მოხდება. მას რომ წასვლა სდომებოდა, ერთპიროვნულად „ქოცები“ კი არ უნდა დაეტოვებინა ხელისუფლებაში, არამედ ნელ-ნელა უნდა დაწყებულიყო კოალიციურ მთავრობაზე გადასვლა“, - განაცხადა იაგო ხვიჩიამ.
👉 ინფორმაციისთვის, 11 იანვარს ბიძინა ივანიშვილმა განაცხადა, რომ „ქართული ოცნების“ თავმჯდომარის პოსტი დატოვა და პოლიტიკიდან მიდის.
👉 „ქართული ოცნების“ ახალი თავმჯდომარის კანდიდატად მან ირაკლი კობახიძე დაასახელა.
აგრეთვე წაიკითხეთ: