ლადო კახაძე: ოპოზიციამ დემონსტრაციებით და აქციებით ყველაფერი გააკეთა, რომ ეპიდსიტუაცია დამძიმებულიყო
1606220436
საპარლამენტო უმრავლესობის წევრის ლადო კახაძის განცხადებით, გაერთიანებულმა ოპოზიციამ ყველაფერი გააკეთა იმისთვის, რომ ქვეყანაში ეპიდემიოლოგიური სიტუაცია დამძიმებულიყო.
როგორც კახაძემ აღნიშნა, იმ რეკომენდაციების ფონზე, რომელიც კარგად იცოდა ოპოზიციურმა სპექტრმა, თავყრილობები მაინც მოაწყო.
მისი თქმით, ოპოზიციური პარტიების მიერ ორგანიზებულ აქციებზე შეკრებილი მოქალაქეები სხვადასხვა ლოკაციებიდან იყვნენ, რამაც კიდევ უფრო გაამწვავა ეპიდვითარება.
„ეს ეპიდემია ყველასთვის დიდი გამოწვევაა. სამართავადაც რთულია, ძალიან საინტერესოა დაგროვილი ცოდნის სწორად გადანაწილება. სწორედ ასეთ დროს ყველაზე დიდი გამოწვევა თავყრილობებია. პირადი უსაფრთხოება გადის სხვათა უსაფრთხოების პატივისცემაზე - თუ ჩვენ განვიხილებით პოტენციურად ამ ვირუსის მატარებლად ყველანაირად უნდა ვეცადოთ, რომ სხვას შემთხვევით არ გადავცეთ. შვედეთმა, რომელსაც ლიბერალური მიდგომა აქვს ამ საკითხის მიმართ, 8 ადამიანზე მეტი არ დაუშვეს შეკრებაზე“, - აღნიშნა ლადო კახაძე.
მმართველი გუნდის წევრი ამბობს, რომ ამ თავყრილობებმა, დემონსტრაციებზე უწესრიგობამ ყველანაირი პირობა შექმნა, რომ ინფიცირების რაოდენობა გაზრდილიყო.
კახაძის თქმით, პოლიტიკურ სარჩულზე დაყრდნობილი მავნებლობა ქვეყანას კარგს არ მოუტანს.
„გულსატკენია ახლა რასაც ვიტყვი, მაგრამ ვიღაცამ მოისურვა ამ სიტუაციის დამძიმება ხელოვნურად და პირდაპირ დასვა ამ არჩევნების ჩარჩოზე. გული მტკივა, მაგრამ ოპოზიციურმა ფრთამ, დემონსტრაციებით და აქციებით ყველაფერი გააკეთა, რომ სიტუაცია დამძიმებულიყო, რამეთუ მათ იცოდნენ რეკომენდაციების დონეზე, რომ თავყრილობები არასასურველია, რომ შესანიშნავი გარემოა იმისთვის, რომ ამ დაავადებამ თავისი ფრთები გაშალოს. მაგალითიც გვაქვს უკვე. გვქონდა ციფრები ზაფხულიდან გამოყოლილი.
დავინახეთ ჯიუტად პირბადის გარეშე ერთმანეთის გვერდიგვერდ, არეულად, დისტანციის გარეშე ბევრი ადამიანის თავყრილობა. ეს ადამიანები ერთი ლოკაციიდან კი არ იყვნენ, სხვადასხვა ლოკაციიდან იყვნენ. მივიღეთ, ის რომ ამ თავყრილობის ადგილებიდან ეს ადამიანები საწყის ლოკაციას დაუბრუნდნენ და იქაც იფეთქა ამ დაავადებამ. ამ თავყრილობებმა, დემონსტრაციებმა უწესრიგოდ ყველანაირი პირობა შექმნა, რომ ინფიცირების რაოდენობა გაზრდილიყო. ინფიცირების წყარო გაძლიერდა არასწორი მოპყრობის გამო. ამბობდნენ გაზაფხულზე ეპიდვითარება აუფეთქდებათო- ისე იძახდნენ აუფეთქდებათო, თითქოს ჩვენ სხვები ვიყოთ. ეს არის მავნებლობა. არ ვერიდები ამ სიტყვას. ეს უმეცრებასთან ერთად მავნებლობაც არის. პოლიტიკურ სარჩულზე დაყრდნობილი მავნეობა ქვეყანას კარგს არ მოუტანს“, - დასძინა ლადო კახაძემ.
ინფორმაციისთვის, გაერთიანებული ოპოზიციის ორგანიზების რუსთაველის გამზირსა და ცენტრალური საარჩევნო კომისიის შენობასთან საპროტესტო აქცია გაიმართა. ოპოზიციამ 31 ოქტომბრის საპარლამენტო არჩევნების შედეგები მხარდამჭერებთან ერთად გააპროტესტა.
21 ნოემბერს საპარლამენტო არჩევნების მეორე ტური გაიმართა.
ქართული ოცნების“ აღმასრულებელი მდივნის ირაკლი კობახიძის განცხადებით, 17-ვე მაჟორიტარულ ოლქში მმართველი გუნდის კანდიდატები ლიდერობენ. ამასთან, კობახიძის თქმით, მომავალ პარლამენტში მმართველ გუნდს 90 დეპუტატი ეყოლება.
აგრეთვე წაიკითხეთ:
🔴 მელია: გლდანში იმაზე ნაკლები ამომრჩეველი მოვიდა არჩევნებზე, ვიდრე პირველ ტურში ხმა ავიღე
🔴 კობახიძე: მომავალ პარლამენტში „ქართული ოცნება“ 90 დეპუტატით იქნება წარმოდგენილი
