ბელარუსში საპროტესტო აქციაზე 100-ზე მეტი ადამიანი დააკავეს
1603649732
ბელარუსის დედაქალაქ მინსკსა და სხვადასხვა ქალაქებში პრეზიდენტ ალექსანდრ ლუკაშენკოს გადადგომის მოთხოვნით მიმდინარე საპროტესტო აქციაზე დაკავებულ პირთა რაოდენობა 100-ს აღემატება. ინფორმაციას გამოცემა interfax ავრცელებს.
თვითმხილველებმა გამოცემასთან საუბრისას განაცხადეს, რომ ხალხის უმეტესობა დააკავეს გროდნოსა და მინსკში. ასევე, დაკავებები მოხდა ლიდაში, მოგილევსა და სხვა ქალაქებში. დაკავებები ამ დრომდე გრძელდება.
ყველაზე დიდი რაოდენობით ორლოვსკაიას ქუჩაზე დააკავეს აქტივისტები. თვითმხილველები აცხადებენ, რომ აქციის მონაწილეების მისამართით რეზინის ტყვიებიც გამოიყენეს.
დაკავებულებს შორის არიან ოპოზიციონერი პოლიტიკოსი ზმიცერ დაშკევიჩი და ხუთი ჟურნალისტი.
ინფორმაციისთვის, ბელარუსში 9 აგვისტოდან საპროტესტო აქციები მიმდინარეობს. ოპოზიცია საპრეზიდენტო არჩევნების შედეგებს აპროტესტებს.
ევროკავშირი არჩევნების შედეგებს და ალექსანდრე ლუკაშენკოს ლეგიტიმურობას არ აღიარებს.
