სომხური მხარე - აზერბაიჯანი ცდილობს კონფლიქტში ირანი ჩაითრიოს
1602051873
აზერბაიჯანი ცდილობს მთიან ყარაბაღში მიმდინარე კონფლიქტში ირანი ჩაითრიოს, რისთვისაც გამიზნებით ახდენს ძალთა კონცენტრაციას ირანის საზღვართან. ამის შესახებ სომხეთის თავდაცვის სამინისტროს პრესმდივანმა არცრუნ ოვანესიანმა „არმენპრესს“ განუცხადა.
მისი ინფორმაციით, ირანის საზღვართან აზერბაიჯანული ძალების კონცენტრაციის დროს სომხური მხარის მიერ გასროლილი ჭურვები შეიძლება ირანის ტერიტორიაზე ჩავარდეს. „სომხეთმა უკვე აცნობა ამის შესახებ ირანს. იმედია ირანული მხარე მიიღებს სათანადო ზომებს“ - განაცხადა ოვანესიანმა.
მისი ინფორმაციით, სამშაბათს სომხურმა შენაერთებმა მოწინააღმდეგის 22 ერთეული საბრძოლო ტექნიკა გაანადგურეს. ასევე აზერბაიჯანულმა მხარემ 60 ჯარისკაცი და ოფიცერი დაკარგა. ოვანესიანის ინფორმაციით, აზერბაიჯანული ძალები კვლავ ქალაქ ჯებრაილის აღებას ცდილობენ, რომელიც ყარაბაღის სამხრეთ ნაწილში მდებარეობს, თუმცა უშედეგოდ.
შეგახსენებთ, სომხეთ-აზერბაიჯანის საზღვარზე შეტაკება 27 სექტემბერს, დილიდან დაიწყო.
სომხეთმა საომარი მდგომარეობა გამოაცხადა, ხოლო აზერბაიჯანმა სამხედროებს მობილიზაციისკენ მოუწოდა.
ცეცხლის გახსნაში მხარეები ერთმანეთს ადანაშაულებენ.
2016 წლის შემდეგ სომხეთ-აზერბაიჯანის ისტორიაში ეს ყველაზე მწვავე ესკალაციაა.
