აშშ-ის ვიცე-პრეზიდენტი: ჩვენ გვსურს უკრაინის ტერიტორიული მთლიანობის დაცვა და მკვლელობების შეჩერება
1756480402
აშშ-ს სურს, შესაძლო სამშვიდობო შეთანხმების ფარგლებში, შეინარჩუნოს უკრაინის ტერიტორიული მთლიანობა და ხელი შეუშალოს რუსეთს მისი მთელი ტერიტორიის მიტაცებაში, - ამის შესახებ აშშ-ის ვიცე-პრეზიდენტმა ჯ.დ. ვენსმა USA Today-თან ინტერვიუში განაცხადა.
ვენსმა აღნიშნა, რომ მას და აშშ-ის პრეზიდენტ დონალდ ტრამპს უკრაინის პრეზიდენტ ვოლოდიმირ ზელენსკისთან რამდენიმე კარგი საუბარი ჰქონდათ. ვიცე-პრეზიდენტმა პირობა დადო, რომ შეერთებული შტატები მშვიდობისთვის მუშაობას გააგრძელებს.
„ვფიქრობ, ამ საკითხთან დაკავშირებით პრეზიდენტ ზელენსკის სრულიად ვეთანხმებით, თუმცა გარკვეული უთანხმოებები გვაქვს. ჩვენ, რა თქმა უნდა, გვსურს უკრაინის ტერიტორიული მთლიანობის დაცვა. ჩვენ არ გვინდა, რომ რუსეთმა მთელი ქვეყანა დაიპყროს. ასევე, გვინდა, რომ მკვლელობები შეწყდეს და გვჯერა, რომ ომმა იმ ეტაპს მიაღწია, სადაც რუსები, ბრძოლის გაგრძელებით, რეალურად ვერაფერს აღწევენ და უკრაინელებიც წარმატებას ვერ აღწევენ“, - დასძინა მან.
ვიცე-პრეზიდენტის თქმით, ახლა საუკეთესო დროა ყველასთვის, მათ შორის შეერთებული შტატებისთვის, რათა შეწყდეს მკვლელობები და ყველაფერი მშვიდობიანი გზით მოგვარდეს.
