მთავარი

ძიება

ვიდეო

ქვიზები

კონტაქტი

საზოგადოება

თელასი
1711656178
თბილისის ქუჩები, რომლებსაც 29 მარტს ელექტრომომარაგება დროებით შეუწყდება

გადაუდებელი სამუშაოების ჩატარების გამო 29 მარტს ელექტრომომარაგება დროებით შეიზღუდება.კომპანია თელასის განცხადებით, შეზღუდვა შეეხება შემდეგ უბნებში არსებულ ქუჩებს: კრწანისის რაიონი11:00 საათიდან 12:00 საათამდე შეზღუდვა შეეხება: გორგასალის ქუჩის მოსახლეობას.ჩუღურეთის რაიონი10:00 საათიდან 18:00 საათამდე შეზღუდვა შეეხება: დავით აღმაშენებლის გამზირის (ნაწილობრივ), უზნაძის და დგებუაძის ქუჩების მოსახლეობას.ნაძალადევის რაიონი11:00 საათიდან 18:00 საათამდე შეზღუდვა შეეხება: ბეჟანიშვილის, ნათაძის, ხვინგიას, წიწამურის, ჭყონდიდელის, დადიანის და ჭილაიას ქუჩების მოსახლეობას.

გამარჯვებულების დაჯილდოება
1711646233
GITA-ს საგრანტო პროგრამის „25 000 ლარამდე ინოვაციების გრანტები რეგიონებისთვის“ გამარჯვებულები გურიის რეგიონში ცნობილია

საქართველოს ინოვაციების და ტექნოლოგიების სააგენტოს საგრანტო პროგრამის „25 000 ლარამდე ინოვაციების გრანტები რეგიონებისთვის“ გამარჯვებულები გურიის რეგიონში გამოვლინდნენ: io - ინოვაციური პლატფორმა, რომელიც შეუფერხებლად აკავშირებს კედლის მხატვრებსა და მომხმარებლებს. უნიკალური AI/AR Order Generator ტექნოლოგია მომხმარებელს მისცემს საშუალებას, შექმნას კედლის იდეალური არტი წუთებში, რაც მნიშვნელოვნად ამცირებს დროსა და ძალისხმევას, რომელიც საჭიროა არტ-ინსტალაციის პროცესში. (ოზურგეთი) ge - პროექტის მიზანია Software პლატფორმის შექმნა სამკერვალოებისთვის, ვებ გვერდზე შეთავაზებული სხვადასხვა თარგისგან სასურველი ესკიზის შესაქმნელად. (ოზურგეთი) ge - პროექტის ფარგლებში შეიქმნება პირველი ქართული ციფრული დონაციის პლატფორმა იუთუბერებისთვის, ინფლუენსერებისა თუ საჯარო ფიგურებისთვის, რომლებსაც სურთ crowdfunding - ის დახმარებით განავითარონ კონტენტი. (ლანჩხუთი) რეგიონალური საგრანტო პროგრამის მიზანია, ხელი შეუწყოს საქართველოს რეგიონებში ადგილობრივი ინოვაციური და ტექნოლოგიური ეკოსისტემის გაძლიერებას; ინოვაციური პროდუქტების, მომსახურების, ტექნოლოგიებისა და პროცესების შემუშავება - ათვისებისა და კომერციალიზაციის გზით ინოვაციური და ტექნოლოგიური სტარტაპების შექმნას.საგრანტო პროგრამის ფარგლებში, 2023 წელს საქართველოს ყველა რეგიონიდან უკვე გამოვლინდა 41 გამარჯვებული. მათ შესახებ ინფორმაცია შეგიძლიათ იხილოთ gita.gov.ge-ზე. აჭარას, გურიასა და იმერეთში რეგისტრირებულ ფიზიკურ და იურიდიულ პირებს კი 29 იანვრიდან შესაძლებლობა ჰქონდათ, ელექტრონული პორტალის www.grants.gov.ge მეშვეობით წარედგინათ განაცხადები.შერჩეულმა სტარტაპებმა გაიარეს ტრენინგები, რომელიც მოიცავდა ბაზრის კვლევას, ბაზარზე გასვლის სტრატეგიას, მასშტაბირებასა და ე.წ. „ფიჩინგს“.ტრენინგების გავლის შემდეგ, სტარტაპებმა პროექტები წარადგინეს კომისიის წინაშე, რომელიც დაკომპლექტებული იყო შესაბამისი პროფილის მოწვეული ექსპერტებით.საგრანტო თანხის მოცულობა არ უნდა აღემატებოდეს 25 000 ლარს.გრანტის მიღება შეუძლია სამიზნე რეგიონებში რეგისტრირებულ ან/და მოქმედ ფიზიკურ პირებს, მეწარმე სუბიექტებს და სტარტაპებს. არარეგისტრირებულმა პირმა, კონკურსის წარმატებით გავლის შემთხვევაში, საგრანტო ხელშეკრულების გაფორმებამდე სავალდებულოა მეწარმე სუბიექტის რეგისტრაცია მოახდინოს შესაბამის რეგიონში.

შეხვედრა გადამზიდველებთან
1711645910
სახმელეთო ტრანსპორტის სააგენტოს ხელმძღვანელობასა და გადამზიდველთა შორის შეთანხმება შედგა

სახმელეთო ტრანსპორტის სააგენტოს ხელმძღვანელობასა და გადამზიდველთა წარმომადგენლებს შორის სამუშაო შეხვედრა გაიმართა.სააგენტოს წარმომადგენლებმა შეხვედრის დამსწრეებს, მათ შორის, საპროტესტო აქციებში მონაწილეებს, გააცნეს გეგმა შეზღუდული ნებართვების სამართლიანი, ოპტიმალური განაწილებისა და ნებართვების გაცემის წესთან დაკავშირებით.სააგენტოს ხელმძღვანელობამ გადამზიდველებს შესთავაზა ამ პროცესში მონაწილეობის მიზნით, გადამზიდველთა კონსოლიდირება საერთო ორგანიზაციული ფორმით. გადამზიდავებმა აქცია შეწყვიტეს და მათი მხრიდან გამოითქვა მზადყოფნა სააგენტოსთან კოორდინირებულ თანამშრომლობაზე, მესამე ქვეყანაში/ქვეყნიდან შეზღუდული ტიპის ნებართვების გაცემასთან დაკავშირებით.„ჩვენ შეხვედრის მონაწილეებს დეტალურად გავაცანით სააგენტოს მიერ პარტნიორ ქვეყნებთან თანამშრომლობის ფარგლებში, საერთაშორისო გადაზიდვებისათვის განკუთვნილი ნებართვის კვოტების დადგენის პროცედურები, ასევე ამავე ქვეყნებიდან შეზღუდული, მესამე ქვეყანაში, ან მესამე ქვეყნიდან გადაზიდვის ტიპის ნებართვების გადმოცემის სირთულეები“ - აღნიშნა სააგენტოს დირექტორმა.ლევან გამყრელიძის ინფორმაციით, უკვე 18 მარტიდან ნებართვების გაცემა ხდება განაცხადების საფუძველზე, არა ქოლცენტრის მეშვეობით, შედგენილი სიების და გრაფიკის მიხედვით, რათა სააგენტოს მომსახურეობის ოფისებმა გადატვირთვის გარეშე შეძლონ საქმიანობა. ამასთან, პროცესის სრულად გამჭვირვალობის მიზნით, სააგენტოს ოფიციალურ ვებგვერდზე და სააგენტოს მომსახურეობის ოფისებში ხდება იმ გადამზიდველთა სიების განთავსება, რომლებზეც ნებართვა გაიცემა.

OneRepublic
1711645763
რა ეღირება OneRepublic-ის ბილეთები? - Black Sea Arena საფასო კატეგორიებს აქვეყნებს

როგორც ცნობილია, Starring Georgia-ს 2024 წლის სეზონზე მაყურებლის წინაშე OneRepublic, Scorpions და Jungle წარდგებიან. Black Sea Arena-მ ცოტა ხნის წინ OneRepublic-ის კონცერტზე დასასწრები ბილეთების საფასო კატეგორიები გამოაქვეყნა.ამერიკული პოპ-როკ ჯგუფის კონცერტზე ბილეთების ფასი 145 ლარიდან იწყება და 550 ლარს აღწევს.უფრო კონკრეტულად, ზედა იარუსებში, ბილეთები 145-165 ლარი ეღირება. სცენის წინ, დასაჯდომი ადგილების ფასი სკამების განლაგების მიხედვით, 220-280 ლარი იქნება, აგრეთვე 220 ეღირება დასადგომი ბილეთები, ხოლო VIP ბილეთების შეძენას 550 ლარად შეძლებთ.კონცერტი 10 მაისს, შეკვეთილში გაიმართება. ბილეთების გაყიდვა ხვალ 10:00 საათიდან BSA.ge-სა და TKT.ge-ზე დაიწყება. BSA.ge-ზე მხოლოდ Star Ring ბილეთებს შეიძენთ, TKT.ge-ზე კი ნებისმიერ კატეგორიას.აღსანიშნავია, რომ Starring Georgia-ს, TBC-ისა და VISA-ს თანამშრომლობის ფარგლებში, 20%-იან ფასდაკლებას მიიღებთ ყველა კატეგორიის ბილეთზე თიბისის Visa ბარათებით შეძენისას;-30%-ს II იარუსის კატეგორიის ბილეთებზე თიბისის მოსწავლის და სტუდენტის Visa ბარათებით შეძენისას;ასევე 30%-იანი ფასდაკლებით შეძლებთ VIP კატეგორიის ბილეთების შეძენას თიბისი კონცეპტის და WM-ის Visa ბარათებით; ხოლო -15% მიიღებთ ყველა კატეგორიის ბილეთზე თიბისის განაწილებით შეძენისას;ფასდაკლება არ იმოქმედებს BSA.ge-ზე შეძენის შემთხვევაში.

გიორგი ებანოიძე
1711634717
შეგნებული ტყუილი?! - რაში დასჭირდა გამოცემა „ნეტგაზეთს“ მოსამართლე გიორგი ებანოიძის კომენტარის დამახინჯება - „იმედინიუსი“

თბილისის საქალაქო სასამართლოს მოსამართლე გიორგი ებანოიძე ინტერნეტგამოცემა „ნეტგაზეთს“ სიცრუეში და მისი კომენტარის შეგნებულად დამახინჯებაში ადანაშაულებს. აღნიშნული ფაქტის შესახებ მოსამართლე საკუთარ ფეისბუკგვერდზე წერს.„სამწუხაროდ, ჩემი კომენტარის შეგნებულად არასწორად ინტერპრეტაციის გამო, აქაც დავწერ და აღნიშნულ საკითხთან დაკავშირებით კომენტარს აღარ გავაკეთებ. არასოდეს მითქვამს, რომ რაიმე ფორმით ე.წ. ვეტინგის მომხრე ვარ და იგივე აზრზე ვარ ამჟამადაც. პირიქით, ნებისმიერი საკითხი, რომელიც კანონმდებლობის ფარგლებს სცილდება, ჩემთვის, როგორც მოსამართლისთვის მიუღებელია“,- წერს ებანოიძე.„იმედინიუსი“ მოვლენებს ქრონოლოგიურად მიყვება და წერს, 2024 წლის 15 მარტს, გამოცემა „ნეტგაზეთმა“ გამოაქვეყნა ჟურნალისტ მარიამ ბოგვერაძის ავტორობით სტატია „ათი მოსამართლე კეთილსინდისიერების შემოწმების მექანიზმს ემხრობა“.სტატიაში ვკითხულობთ, რომ „არსებული მონაცემებით, საქართველოს საერთო სასამართლოების სისტემაში, სულ მცირე, 10 მოსამართლეა, ვინც არ ეწინააღმდეგება საკვანძო თანამდებობებზე მომუშავე მოსამართლეების კეთილსინდისიერების შემოწმების მექანიზმს“ .„ჟურნალისტს ერთ-ერთ ასეთ მოსამართლედ წარმოდგენილი ჰყავს თბილისის საქალაქო სასამართლოს მოსამართლე გიორგი ებანოიძე, რომელზეც მტკიცებით ფორმაში წერს, რომ ის „საკუთარი კეთილსინდისიერების შემოწმებისთვის მზაობას გამოხატავს“. აქვე იშველიებს ებანოიძის ციტატას, რომელსაც უცვლელად გთავაზობთ: „შეფასებისგან თავს შევიკავებ. რაც შეეხება შემოწმებას, კანონიერების ფარგლებში ნებისმიერ დროს“. სწორედ აღნიშნული კომენტარის შეგნებულად არასწორად ინტერპრეტაციის შესახებ წერს ებანოიძე. მოსამართლე ჟურნალისტისთვის მიწერილ კომენტარში წერს, „შემოწმება კანონიერების ფარგლებში ნებისმიერ დროს“. სწორედ ეს უკანასკნელი დაამახინჯა გამოცემამ განზრახ, რადგან „ ვეტინგი“ დარგის სპეციალისტების თუ მმართველი გუნდის წარმომადგენლების მხრიდან უკვე არაერთხელ შეფასდა, როგორც არაკონსტიტუციური. განცხადება გაავრცელა საქართველოს უზენაესმა სასამართლომაც, სადაც ვკითხულობთ: „ვეტინგი“ არ მიეკუთვნება საერთაშორისო სტანდარტს, უხეშად ლახავს სახელმწიფოს სუვერენიტეტს, ითვალისწინებს რა სახელმწიფო ხელისუფლების ერთ-ერთი შტოს - სასამართლოს დაკომპლექტების მექანიზმების გარე აქტორების ხელში გადატანას“.„ვეტინგი“ ერთმნიშვნელოვნად, არსებითად და პრინციპულად ლახავს სასამართლოსა თუ ინდივიდუალური მოსამართლის დამოუკიდებლობას, ძირს უთხრის საზოგადოების ნდობას მართლმსაჯულების სისტემისადმი და მიზნად ისახავს „კეთილსინდისიერების“ შემოწმების საჭიროების თაობაზე უარყოფითი საზოგადოებრივი აზრის კონსოლიდაციას, რათა გაადვილდეს პოლიტიკური კონტროლის განხორციელება სასამართლო ხელისუფლებაზე“.სასამართლოს დაკომპლექტების მექანიზმების გარე აქტორების ხელში გადატანა ყველასთვის ადვილი მისახვედრია რასაც უნდა ემსახურებოდეს. ეს სასამართლო ხელისუფლებაზე პოლიტიკური კონტროლის განხორციელების პირდაპირი მცდელობაა, რასაც როგორც მმართველი გუნდის წარმომადგენლები ამბობენ არ დაუშვებენ და სასამართლო სისტემაში 2012 წლამდე არსებულ პერიოდს აღარასდროს დაუბრუნდებიან.ალბათ ყველასთვის ადვილად მისახვედრია რაში აწყობს „გლობალურ ომის პარტიას“ საქართველოში „ვეტინგის“ ამოქმედება ან ვინ უნდა შეამოწმოს საქართველოს სასამართლო სისტემა მაშინ, როდესაც ავტორიტეტული კვლევითი ორგანიზაციების მიერ გამოქვეყნებული სხვადასხვა ინდექსების მიხედვით, ქართული სასამართლო მოწინავე პოზიციებზეა, უსწრებს ევროკავშირის ყველა კანდიდატ ქვეყანას, აშშ-ს და ევროპის მოწინავე ქვეყნებს.და თუ მაინც რომელიმე მოსამართლის კეთილსინდისიერების შემოწმება დადგება დღის წესრიგში ამას ქვეყანა თავად მოახერებს“, - წერს „იმედინიუსი“.„დღეს საქართველოში ერთადერთი ორგანო კონსტიტუციის მიხედვით, რომელიც ამოწმებს მოსამართლეების კეთილსინდისიერებას, არის იუსტიციის უმაღლესი საბჭო“, - აცხადებს ირაკლი კობახიძე.

ჯილიზა
1711634124
სომხეთი საქართველოსთვის სოფელ ჯილიზას დაბრუნებას გეგმავს - სომხური მედია

სომხეთი, საზღვრის დემარკაციის სამუშაოების გააქტიურებას არა მხოლოდ აზერბაიჯანთან, არამედ საქართველოსთანაც აპირებს. ამის შესახებ აზერბაიჯანული გამოცემა Report სომხურ ჟურნალ „Жоховурт“-ზე დაყრდნობით წერს. კერძოდ, ცნობა ვრცელდება იმის შესახებ, რომ სომხური მხარე აპირებს, საქართველოს საზღვრისპირა ლორეს პროვინციაში მდებარე სოფელი ჯილიზა დაუბრუნოს.არსებული ინფორმაციით, ეს საკითხი საქართველოს პრემიერ-მინისტრის, ირაკლი კობახიძის ვიზიტის დროს განიხილეს ერევანში, სადაც ის სომეხ კოლეგას, ნიკოლ ფაშინიანს შეხვდა. „ჩემს კოლეგასთან ერთად, განვიხილეთ სომხეთსა და საქართველოს შორის დემარკაციის პროცესის გააქტიურების შესაძლებლობა“, - განაცხადა სომხეთის პრემიერმა შეხვედრის შემდეგ. აღსანიშნავია, რომ საქართველო და სომხეთი სახელმწიფო საზღვრის დემარკაციის პროცესს 1992 წლიდან განიხილავენ, ხოლო 1996 წლის შემდეგ, ორ ქვეყანას შორის ამოქმედებულია საზღვრის დელიმიტაციისა და დემარკაციის კომისიები. ცნობისთვის, სოფლის აღმოსავლეთით ქართული არქიტექტურის ძეგლი ოფრეთის ციხე დგას. მატიანის მიხედვით, V საუკუნეში ქართლის პიტიახშს ვარსქენს სწორედ ოფრეთის ციხეში ჰყავდა დატყვევებული საკუთარი მეუღლე, შუშანიკი. 

ბაკურიანში ძებნა-შველის ოპერაცია
1711633008
ბაკურიანში ძებნა-შველის ოპერაცია ამ დრომდე გრძელდება

ბაკურიანში ძებნა-შველის ოპერაცია ამ დრომდე გრძელდება.სამაშველო სამუშაოებში ჩართულია სასაზღვრო პოლიციის ვერტმფრენი, ასევე, გამოიყენება სამაშველო დრონები.არსებული ცნობით, ზვავში 40 წლამდე კაცი მოყვა.„ციხისჯვარის მიმართულებით მთაზე 5-კაციანი ჯგუფი იყო ბურანებით, სასრიალოდ იყვნენ წასულები. ერთ-ერთ მთაზე მოწყდა თოვლი და ქვეშ მოიყოლა 1 ადამიანი. 4 ადამიანი გადარჩა, გამოვიდნენ. ამ დროისთვის თოვლში მოყოლილია 1 ადამიანი. შს სამინისტრომ სასწრაფოდ გამოგზავნა ვერტმფრენი მაშველებთან ერთად. ადგილი მიუვალია ფეხით. ვერტმფრენმა მაშველები დატოვა და ამ დროისთვის მიმდინარეობს ძებნა-შველის ღონისძიება“, - აცხადებს სამცხე-ჯავახეთის სახელმწიფო რწმუნებული ბესიკ ამირანაშვილი.შეგახსენებთ, 28 მარტს დაბა ბაკურიანში თოვლის მასა ჩამოიშალა და ერთი ადამიანი მოიყოლა.

სამუშაო შეხვედრა
1711624059
ნინო თანდილაშვილმა ბრიუსელში ევროკომისიის სამეზობლო პოლიტიკისა და გაფართოების საკითხებში გენერალური დირექტორატის სამუშაო შეხვედრაში მიიღო მონაწილეობა

საქართველოს გარემოს დაცვისა და სოფლის მეურნეობის მინისტრის პირველმა მოადგილემ, ნინო თანდილაშვილმა, ბრიუსელში ევროკომისიის სამეზობლო პოლიტიკისა და გაფართოების საკითხებში გენერალური დირექტორატის სამუშაო შეხვედრაში მიიღო მონაწილეობა.შეხვედრის მონაწილეებმა ევროკომისიის დასკვნაში ასახული რეკომენდაციების შესრულების საკითხებზე იმსჯელეს და დაგეგმილი აქტივობები განიხილეს.ნინო თანდილაშვილმა ევროკავშირს სოფლის მეურნეობისა და გარემოს დაცვის მიმართულებებით საქართველოსთვის გაწეული მხარდაჭერისთვის მადლობა გადაუხადა და ევროკავშირის უწყვეტი თანადგომის მნიშვნელობას გაუსვა ხაზი. მინისტრის პირველმა მოადგილემ ევროკომისიის წარმომადგენლებს საქართველოს გარემოს დაცვისა და სოფლის მეურნეობის სამინისტროს მიერ გატარებული ღონისძიებებისა და სამომავლო გეგმების შესახებ მიაწოდა ინფორმაცია.ევროკომისიამ საქართველოს მიერ გადადგმული ნაბიჯები დადებითად შეაფასა და ქვეყნის შესაბამის უწყებებთან თანამშრომლობის მზადყოფნა გამოხატა.ბრიუსელში გამართულ შეხვედრაში საქართველოს ეკონომიკისა და მდგრადი განვითარების მინისტრის მოადგილე გენადი არველაძე, ევროკავშირში საქართველოს ელჩი ვახტანგ მახარობლიშვილი, საქართველოს შესაბამისი სამინისტროების წარმომადგენლები და ევროკავშირის შესაბამისი გენერალური დირექტორატების ხელმძღვანელი პირები მონაწილეობდნენ.

სამხედრო პანაშვიდი
1711623830
ირაკლი კობახიძე 1990-იანი წლების შეიარაღებული მოქმედებების დროს უგზო-უკვლოდ დაკარგული, იდენტიფიცირებული და გადმოსვენებული პირების სამოქალაქო პანაშვიდზე იმყოფებოდა

საქართველოს პრემიერ-მინისტრმა ირაკლი კობახიძემ 1990-იანი წლების შეიარაღებული მოქმედებების დროს უგზო-უკვლოდ დაკარგული, ოკუპირებული აფხაზეთის რეგიონიდან გადმოსვენებული პირების ოჯახებს მიუსამძიმრა.მთავრობის მეთაური სამების საკათედრო ტაძარში სამოქალაქო პანაშვიდზე პარლამენტის თავმჯდომარე შალვა პაპუაშვილთან და მინისტრთა კაბინეტის წევრებთან ერთად იმყოფებოდა.შერიგებისა და სამოქალაქო თანასწორობის საკითხებში სახელმწიფო მინისტრის აპარატისა და წითელი ჯვრის საერთაშორისო კომიტეტის ერთობლივი თანამშრომლობით, საკოორდინაციო მექანიზმის ფარგლებში, უგზო-უკვლოდ დაკარგული 12 იდენტიფიცირებული პირის გადმოსვენება და ოჯახებისთვის დაბრუნება მოხერხდა.5 მებრძოლს დიღმის ძმათა სასაფლაოზე, სხვა იდენტიფიცირებულ პირებს კი, ოჯახების გადაწყვეტილებით, საგვარეულო სასაფლაოებზე სამხედრო პატივით დაკრძალავენ.

სილქნეტი
1711622704
სილქნეტის პლატფორმებს „National Geographic საქართველოს“ ახალი პოდკასტი დაემატა

თითქმის ერთი წელია, რაც სილ­ქნეტ­ი „National Geographic საქართველოს“ რედაქციასთან ერთად, ჟურ­ნალ­ში გა­მოქ­ვეყ­ნე­ბუ­ლი სა­ავ­ტო­რო სტა­ტი­ე­ბის აუ­დიო ვერ­სი­ე­ბს ქმნის, რომლებსაც ცნობილი მსახიობები კითხულობენ.მარტის თვეში, პოდკასტების სერიას ჟურნალისტისა და მწერლის, ეკა ქევანიშვილის საავტორო სტატია „შიშის ხელოვნება“ დაემატა, რომელსაც მსახიობი ნინო კასრაძე კითხულობს. მასალა აღწერს საბჭოთა ტერორის იმ სიმძიმეს, რომელსაც მწერლები, მეცნიერები, ხელოვანები შეეწირნენ. ტოტალური შიში ადამიანებს აიძულებდა რეპრესირებულების სახეებიც კი ამოეშალათ ფოტოებიდან.ავტორი მრავალი წელია მუშაობს საქართველოს შიდა პოლიტიკის, ადამიანის უფლებების, ქალთა და ბავშვთა, უმცირესობების, ეკოლოგიის, ჯანდაცვისა და სხვა სოციალურ საკითხებზე.2012 წლიდან, სილ­ქნე­ტის მხარ­და­ჭე­რით, სა­ერ­თა­შო­რი­სო სა­მეც­ნი­ე­რო ჟურ­ნა­ლი „National Geographic“ ქარ­თულ ენა­ზე გა­მო­ი­ცე­მა. კომპანია რედაქციასთან ერ­თად სხვა­დას­ხვა სა­გან­მა­ნათ­ლებ­ლო ღო­ნის­ძი­ე­ბა­სა და აქ­ტი­ვო­ბას ახორ­ცი­ე­ლებს. პრო­ექ­ტის ფარ­გლებ­ში ტარ­დე­ბა ლექ­ცი­ე­ბი, საავტორო მასალებზე მზადდება პოდკასტები.ყველა ამ ჩანაწერის მოსმენა შესაძლებელია უფასოდ, როგორც სილქნეტის პლატფორმებზე SilkTV და SilkGo, ისე National Geographic საქართველოს საიტზე.

სილქნეტი
1711622357
„გავერთიანდეთ ჩვენი გმირებისთვის“ - სილქნეტი დაჭრილ მებრძოლთა თანადგომის ფონდის საქმიანობის ანგარიშს აქვეყნებს

„დაჭრილ მებრძოლთა თანადგომის ფონდმა“ წელი 22 ბენეფიციარის მხარდაჭერით დაიწყო. სხვადასხვა სახის დახმარება გაეწია 3 ვეტერანსა და 19 სამხედრო მოსამსახურეს. ამისათვის ფონდიდან 105 006.54 ლარი გამოიყო, რომელიც გარდა სამხედროებისა, მოხმარდა მათ მეუღლეებსა და არასრულწლოვან შვილებს, რასაც ითვალისწინებს ფონდის კრიტერიუმები.ფონდმა დააფინანსა: ერთი სარეაბილიტაციო კურსი - 2 100 ლარი 3 საზღვარგარეთ მკურნალობა - 64 847.05 ლარი 3 სამედიცინო ინვენტარის შეძენა - 10 721 ლარი მედიკამენტებით უზრუნველყოფა - 956.24 ლარი 8 არასრულწლოვან შვილთა საჭიროებები - 14 599.86 ლარი 6 მეუღლეთა თანადგომა - 8 742.39 2 სასწავლო კურსის დონაცია - 3 040 ლარი „დაჭრილ მებრძოლთა თანადგომის ფონდი“ 2018 წელს დაფუძნდა სილქნეტის მხარდაჭერით. კომპანია ყოველწლიურად 300 000 ლარს რიცხავს ფონდის ანგარიშზე და მხარში უდგას ტერიტორიული მთლიანობისთვის ბრძოლის დროს და საერთაშორისო მისიებში მონაწილე დაჭრილ-დაშავებულ სამხედროებს.2024 წელს ფონდში დონაციები განახორციელა არაერთმა კომპანიამ და ფიზიკურმა პირმა. გარდა ამისა, ფონდს საქველმოქმედო საქმიანობით მხარში უდგანან საერთაშორისო ორგანიზაციები, როგორიც არის მსოფლიოში ცნობილი საერთაშორისო საქველმოქმედო ფონდი - Invictus Games Foundation, ასევე, დიპლომატიური კორპუსი.სხვადასხვა დროს ჩატარდა ფონდის მხარდასაჭერი სპორტული აქციები ნატო-საქართველოს არსებითი პაკეტის ძირითადი ჯგუფის ინიციატივით. ასევე, საფრანგეთის საელჩომ უზრუნველყო ვეტერანთა ხსოვნისადმი მიძღვნილი ღონისძიება, თბილისის სამხედრო ატაშეთა ასოციაციამ გასულ წელს ლისის ტბაზე მოაწყო საქველმოქმედო გარბენი. ამ აქტივობებიდან შემოსული თანხები სრულად გადაირიცხა ფონდში, რამაც კიდევ ერთხელ შეუწყო ხელი ქველმოქმედების მასშტაბის გაზრდას და ცნობადობის ამაღლებას.წელს ფონდს კიდევ ერთი მეგობარი შეუერთდა „პალიტრა მედიას“ სახით. ჰოლდინგში შემავალმა გამომცემლობა „პალიტრა L“-მა ბიბლუსის მაღაზიებში გამართა საქველმოქმედო აქცია, რომლის ფარგლებშიც წიგნის გაყიდვებიდან შემოსული თანხა - 3 000 ლარი ფონდის ბიუჯეტში გადარიცხა, რაც სრულად მოხმარდება დაჭრილ ვეტერანებს, სამხედრო მოსამსახურეებს და მათი ოჯახის წევრებს.„გავერთიანდეთ ჩვენი გმირებისთვის“ - ასეთია ფონდის მთავარი გზავნილი. ქვეყნისთვის საამაყო ადამიანების თანადგომის გამოსახატავად გახსნილია საბანკო ანგარიშები, სადაც ნებისმიერ მსურველს შეუძლია დონაციაში ჩართვა. ასევე, შესაძლებელია საქველმოქმედო ნომერზე - 0 901 777 771 დარეკვა, ერთი ზარი - ერთი ლარი. შემოსული თანხები სრულად ირიცხება ფონდის ანგარიშზე.

ღვინის ფესტივალი
1711620499
საფრანგეთში, გასტრონომიის რამდენიმე ფესტივალზე ქართული ღვინო იყო წარმოდგენილი

ბაზრების დივერსიფიცირებისა და გაყიდვების ხელშეწყობის მიზნით, ქართული ღვინო საფრანგეთის ღვინისა და გასტრონომიის რამდენიმე პრესტიჟულ ფესტივალზე ღვინის ეროვნული სააგენტოს მხარდაჭერითა და სააგენტოს კონტრაქტორი კომპანიის - „Le Pont Caucasien“ ორგანიზებით იყო წარდგენილი.ფესტივალი „SAVIM Printemps Salon des Vignerons et de la Gastronomie“ - ქალაქ მარსელში; „LA FETE des VINS et de la GASTRONOMI“ - ქალაქ ტულონში; ხოლო „SALON DU VIN POUR PROFESSIONNELS“ - ქალაქ ნიცაში გაიმართა.კომპანიის - „Le Pont Caucasien“ ხელმძღვანელმა, საფრანგეთში მოღვაწე ენოლოგმა ილია კახოიძემ ფესტივალების სტუმრებს რვა ქართული ღვინის კომპანიის ის ღვინოები გააცნო, რომლებიც უკვე იყიდება საფრანგეთში.ღვინის ეროვნული სააგენტოს საქმიანობის ერთ-ერთ ძირითად მიმართულებას საერთაშორისო ბაზრებზე ქართული ღვინის პოპულარიზაცია და ცნობადობის ამაღლება წარმოადგენს. სააგენტო ქართული ღვინის პოპულარიზაციის ხელშეწყობის ფარგლებში, 2013 წლიდან, ბაზრების დივერსიფიცირების მიზნით, მიზანმიმართულ სარეკლამო-მარკეტინგულ კამპანიებს ახორციელებს, მათ შორის, მეღვინეობით სახელგანთქმულ ისეთ ქვეყანაში, როგორიც საფრანგეთშია, სადაც ქართულ ღვინოზე, განსაკუთრებით კი ქვევრის ღვინოზე, მოთხოვნილება მზარდია.

••• იტვირთება