ჩეხეთის პრეზიდენტი: ნატომ რუსეთის დარღვევებს სამხედრო გზით უნდა უპასუხოს
1758439012
ჩეხეთის პრეზიდენტი პეტრ პაველი დარწმუნებულია, რომ ნატომ რუსეთის დარღვევებზე სამხედრო რეაგირება უნდა მოახდინოს. ამის შესახებ Radio Prague International-ი იუწყება.
მისი განცხადება 19 სექტემბერს მომხდარ ინციდენტს მოჰყვა, რომლის დროსაც სამი რუსული „MiG-31“ გამანადგურებელი ნებართვის გარეშე შეიჭრა ესტონეთის საჰაერო სივრცეში, ფინეთის ყურის თავზე და იქ სულ 12 წუთის განმავლობაში დარჩა.
„ახლა იმავეს მოწმენი ვართ: რუსეთი არა მხოლოდ აგრესიულ ომს აწარმოებს სუვერენული სახელმწიფოს წინააღმდეგ, არამედ უპრეცედენტო გზით პროვოცირებას ახდენს ნატოს ქვეყნებზე, ცდილობს არა მხოლოდ ისეთი პასუხის პროვოცირებას, რომლის გამოყენებაც შემდეგ საკუთარი ინტერესებისთვის შეუძლია, არამედ გამოცადოს ჩვენი სიმტკიცე და უნარი, დავიცვათ თავი ასეთი პროვოკაციებისგან“, - აღნიშნა პეტრ პაველმა.
ჩეხეთის პრეზიდენტმა რუსეთის საქციელს „აბსოლუტურად უპასუხისმგებლო“ უწოდა, რადგან, როგორც მან აღნიშნა, „საჰაერო სივრცის დარღვევა თავდაცვითი მექანიზმების გააქტიურების, კერძოდ, ასეთი თვითმფრინავის ჩამოგდების საბაბია“.
მან ხაზგასმით აღნიშნა, რომ რუსეთი და მისი ლიდერი ვლადიმერ პუტინი „ისე მოიქცევიან, როგორც მათ ამის საშუალებას მივცემთ“.
„თუ ჩვენ მათ სიტყვიერად დავგმობთ, რუსეთის ქცევას დავაკნინებთ, ან გავამარტივებთ, ეს პროვოკაციები გაგრძელდება“, - აღნიშნა ჩეხეთის პრეზიდენტმა.
ამიტომ, პაველი დარწმუნებულია, რომ დასავლეთის ქვეყნებმა მტკიცედ უნდა იმოქმედონ და „დარღვევების შემთხვევაში, ჩვენ შესაბამისად უნდა ვუპასუხოთ, კერძოდ, სამხედრო გზით“.
„რუსეთი ძალიან სწრაფად მიხვდება, რომ შეცდომა დაუშვა და საზღვრებს გადააჭარბა. სამწუხაროდ, ეს კონფლიქტის ზღვარზე დაბალანსებაა, მაგრამ ბოროტების წინაშე დანებება უბრალოდ შეუძლებელია“, - დასძინა მან.
