ესტონეთის დაზვერვა: რუსეთი მოლაპარაკებებისთვის მზად არ არის და მასშტაბურ თავდასხმებს აგრძელებს
1756486894
ესტონეთის დაზვერვა აცხადებს, რომ რუსეთი არ არის მზად უკრაინასთან სამშვიდობო მოლაპარაკებებისთვის და აგრძელებს აქტიურ საომარ მოქმედებებს - ბოლო კვირის განმავლობაში რუსმა ჯარებმა დონეცკის რეგიონში თითქმის 100 კვადრატული კილომეტრი დაიკავეს და ყოველდღიურად ახორციელებენ დრონებით დარტყმებს უკრაინის სხვადასხვა რეგიონში, მათ შორის კიევში, სადაც დაზიანდა სამრეწველო ობიექტები, - ამის შესახებ თავდაცვის ძალების დაზვერვის ცენტრის ხელმძღვანელმა ანტს კივისელგმა განაცხადა.
კივისელგი მიიჩნევს, რომ ბრძოლის ველზე არსებული ვითარება არ მიუთითებს იმაზე, რომ რუსეთი სერიოზულად განიხილავს უკრაინასთან სამშვიდობო მოლაპარაკებების დაწყებას, პირიქით: შეინიშნება თავდასხმების ახალი პიკები.
„ტერიტორიულად, რუსეთის შეიარაღებული ძალები ბოლო შვიდი დღის განმავლობაში თითქმის 100 კვადრატული კილომეტრით წინ წავიდნენ, რომელთა უმეტესობა დონეცკის რეგიონში დაიკავეს“, - განაცხადა მან.
ესტონეთის თავდაცვის ძალების სადაზვერვო ცენტრის ხელმძღვანელმა აღნიშნა, რომ რუსმა ჯარებმა წელს „დონეცკის რეგიონის ტერიტორიის დაახლოებით 16% დაიკავეს“.
„ეს კიდევ ერთხელ ადასტურებს, რომ დონეცკის რეგიონი რუსეთის შეიარაღებული ძალების ერთ-ერთ მთავარ სამიზნედ რჩება“, - დასძინა ესტონეთის თავდაცვის ძალების სადაზვერვო ცენტრის ხელმძღვანელმა.
მან, ასევე, კომენტარი გააკეთა რუსეთის საჰაერო დარტყმებზე უკრაინის რეგიონებში.
„გასული კვირის განმავლობაში რუსული ძალები ყოველდღიურად აგრძელებენ დრონებით დარტყმებს სუმის, დნეპროპეტროვსკის, ხარკოვის, პოლტავას, ჩერკასისა და ჩერნიგოვის ოლქებზე. დღეში გაშვებული დრონების რაოდენობა 50-დან 100-მდე მერყეობდა“, - აღნიშნა მან.
