მთავარი

ძიება

ვიდეო

ქვიზები

კონტაქტი

„საქართველოს ისტორიაში არასოდეს მომხდარა ასეთი სახით, ბრუტალურად დაეპატიმრებინათ მთავარი ოპოზიციური პარტიის ლიდერი“ - სააკაშვილი

საქართველოს ექსპრეზიდენტი მიხეილ სააკაშვილი Pia.ge

„ივანიშვილის სპეცრაზმი მივა ყველგან და ყველა ლიდერთან, რომელიც იბრძვის იმისათვის, რომ საქართველო გადაარჩინოს“, - ასე გამოეხმაურა საქართველოს მესამე პრეზიდენტი მიხეილ სააკაშვილი თანაგუნდელის, „ნაციონალური მოძრაობის“ თავმჯდომარის ნიკა მელიას დაპატიმრებას. 

სააკაშვილი აცხადებს, რომ საქართველოს უახლეს ისტორიაში ბოლო ათწლეულში მსგავსი პრეცედენტი არასოდეს მომხდარა.

ექსპრეზიდენტი ამბობს, რომ გარდა ბრძოლისა, სხვა გამოსავალი არ არის.

„საქართველოს ისტორიაში ბოლო ათწლეულებში არასოდეს მომხდარა ასეთი სახით ბრუტალურად, სრულიად მოგონილი მიზეზით დაეპატიმრებინათ მთავარი ოპოზიციური პარტიის თავმჯდომარე.

მე მინდა გვესმოდეს თუ რატომ არის ივანიშვილი ასე მომართული „ნაციონალურ მოძრაობაზე“, რატომ ებრძვის ყველაზე მეტად „ნაციონალურ მოძრაობას“, რატომ იყენებს ამისთვის ყველაფერს, რათა ეს პარტია გაანადგუროს და მისი ლიდერები დააპატიმროს.

აქ საუბარი იმაზე კი არ არის, ვიღაცას მოსწონს ან არ მოსწონს ნიკა მელია, აქ საუბარი სხვა რაღაცაზეა. ეს არის მთავარი ძალა, რომლის მთავარი ამოცანა არის საქართველოს და ქართველი ერის დახსნა სიღარიბის და მონობის უღელისგან, რომელშიც ის შეიყვანა ივანიშვილმა.

ეს არის ის ძალა, რომელმაც შეძლო წარმატებული გამოცდილების შექმნა საქართველოსთვის და ამას აღიარებს მთელი მსოფლიო“, - აღნიშნა სააკაშვილმა.

ყოფილი პრეზიდენტი ამბობს, რომ ბიძინა ივანიშვილის სპეციალური დანიშნულების რაზმი მივა ყველგან და ყველა ლიდერთან, რომელიც საქართველოს გადარჩენისთვის იბრძვის.

„ივანიშვილის სპეცრაზმი მივა ყველგან და ყველა ლიდერთან, რომელიც იბრძვის იმისათვის, რომ საქართველო გადაარჩინოს სასოწარკვეთას, უბედურებას და სიღატაკეს. ისინი ამას გააგრძელებენ. გააგრძელებენ იმიტომ, რომ მათ სხვა გამოსავალი არ აქვთ და ჩვენც სხვა გამოსავალი არ გვაქვს, თუ არა გავაგრძელოთ ბრძოლა გამარჯვებამდე.

გერმანიამ კომბოსტოს ამკრეფავებად უნდა წაიყვანოს ასი ათასამდე ქართველი და სამუდამოდ დაიტოვოს იქ, სხვა ქვეყნებმაც შეიძლება გასცეს იგივე მოწვევა, ივანიშვილი სიამოვნებით უყიდის მათ ბილეთებს, მისი მმართველობის წლებში საქართველო დატოვა 900 ათასზე მეტმა ადამიანმა.

მალე საქართველოსგან თითქმის აღარაფერი დარჩება. ეს არის მათი გეგმა, რომ არავინ შეუშალოს ხელი სასახლეების მშენებლობაში და ტკბობაში. ეს არის ქართველი ხალხის გენოციდი და ეს არის ის, რაც ჩვენს მტერს ყველაზე მეტად სურს.

ამიტომ, ჩვენ უნდა ვისწავლოთ ბრძოლის ყველანაირი პოლიტიკური მეთოდის გამოყენება, ჩვენ უნდა ვისწავლოთ საკუთარი თავის დაცვა. ჩვენ აუცილებლად უნდა მივიყვანოთ ჩვენი ბრძოლა გამარჯვებამდე და ეს ასეც იქნება, ამაში ვარ სრულიად დარწმუნებული.

ეს იქნება მძიმე ბრძოლა და ეს მოითხოვს თითოეული ქართველის მიერ იმის გაცნობიერებას, თუ რა საფრთხის წინაშე ვართ თითოეული ჩვენგანი. ვფიქრობ, ეს გაცნობიერება პრაქტიკულად უკვე მომხდარია“, - განაცხადა მიხეილ სააკაშვილმა.

ინფორმაციისთვის, „ნაციონალური მოძრაობის“ თავმჯდომარეს ნიკა მელიას გამოძიება 2019 წლის 20-21 ივნისის აქციაზე ჯგუფური ძალადობის ორგანიზებას, ხელმძღვანელობასა და მასში მონაწილეობას ედავება.

მას საქმეზე სასამართლოსგან თავდაპირველად აღკვეთის ღონისძიების სახით 30 000 ლარის ოდენობით გირაო ჰქონდა შეფარდებული, რომელიც ნიკა მელიას უძრავი ქონებით ჰქონდა უზრუნველყოფილი.

2020 წლის 1-ელ ნოემბერს, ნიკა მელიას მიერ, სიტყვით გამოსვლისას, ელექტრონული მონიტორინგის სამაჯურის დემონსტრაციულად მოხსნა სასამართლომ აღკვეთის ღონისძიების პირობების დარღვევად შეაფასა და ნიკა მელიას გირაოს ოდენობა 70 000 ლარამდე გაუზარდა, ხოლო გადახდის ბოლო ვადად 2020 წლის 23 დეკემბერი განისაზღვრა.

2021 წლის 5 თებერვალს ნიკა მელიამ გირაოს თანხის გადახდაზე უარი საჯაროდ განაცხადა.

12 თებერვალს პროკურატურამ პარლამენტს ნიკა მელიას მიმართ აღკვეთის ღონისძიებად პატიმრობის გამოყენების შესახებ სასამართლოს შუამდგომლობაზე თანხმობისთვის მიმართა.

16 თებერვალს პარლამენტი დაეთანხმა პროკურატურის მოთხოვნას და ნიკა მელიას სადეპუტატო უფლებამოსილება შეუწყვიტა. საკითხს სხდომაზე 88 დეპუტატმა დაუჭირა მხარი.

17 თებერვალს, პროკურატურის მოთხოვნის საფუძველზე, სასამართლომ „ნაციონალური მოძრაობის“ თავმჯდომარეს აღკვეთის ღონისძიება დაუმძიმა და პატიმრობა შეუფარდა.

18 თებერვალს სამართალდამცველები „ნაციონალური მოძრაობის“ ოფისში ნიკა მელიასთვის სასამართლო განჩინების ჩასაბარებლად მივიდნენ, თუმცა პარტიის მხარდამჭერებმა ისინი შენობაში არ შეუშვეს.

გიორგი გახარიამ პრემიერ-მინისტრის პოსტი დატოვა და გადაწყვეტილების მიზეზად ნიკა მელიას დაკავების ღონისძიების თარიღისა და ფორმის შესახებ გუნდთან შეუთანხმებლობა დაასახელა.

პრემიერის გადადგომასთან დაკავშირებით, შინაგან საქმეთა სამინისტრომ ნიკა მელიას დაკავების ღონისძიება გადადო.

23 თებერვლის დილას, სპეცრაზმი „ნაციონალური მოძრაობის“ ოფისში შეიჭრა და ნიკა მელია დააკავა. ამავე ღონისძიებისას პოლიციამ ადმინისტრაციული წესით ასევე 21 პირი დააკავა.

აგრეთვე დაგაინტერესებთ:

✔️ „არ გადაიხადა, დაიჭირეს“ - ირაკლი კობახიძის განცხადება ნიკა მელიას დაკავებაზე

✔️ ნიკა მელია დააკავეს! (ვიდეო)