1759043407

უფროსი ლეიტენანტის მუხრან შუკვანის სახელობის პოლიგონზე, ეროვნულ სამხედრო სამსახურში 6 თვის ვადით გაწვეულმა წვევამდელებმა მორიგი საველე სწავლება გაიარეს. ინფორმაციას თავდაცვის სამინისტრო ავრცელებს. უწყების ცნობით, წვევამდელებმა ოცეულის დონის წვრთნის ფარგლებში თავდაცვითი ოპერაცია, საბრძოლო სროლებით ჩაატარეს. მათ ამოცანას ოპერაციის რაიონში იმიტირებული მოწინააღმდეგის განადგურება წარმოადგენდა. საველე სწავლებას დასავლეთის სარდალი, ბრიგადის გენერალი კობა გრიგოლია დაესწრო. ტაქტიკური სწავლება წვევამდელების მონაწილეობით დადებითად შეფასდა.წვევამდელები ეროვნულ სამხედრო სამსახურს დასავლეთის სარდლობის მე-3 ქვეითი ბრიგადის, 31-ე ბატალიონის შემადგენლობაში გადიან.2025 წლიდან წვევამდელები ეროვნულ სამხედრო სამსახურს თავდაცვის ძალებში გადიან. წვევამდელთა ეროვნული სამხედრო სამსახური მიზნად ისახავს ძლიერი თავდაცვის რეზერვის შექმნასა და ქვეყნის თავდაცვისუნარიანობის კიდევ უფრო გაძლიერებას.

1758957841

ეროვნულ სამხედრო სამსახურში რვა თვის ვადით გაწვეული პირების საწყისი საბრძოლო მომზადება (BCT) დაიწყო. თბილისისა და კახეთის რეგიონის მასშტაბით ეროვნულ სამხედრო სამსახურში ნებაყოფლობით დარეგისტრირებულმა ახალგაზრდებმა სამედიცინო შემოწმება წარმატებით დაასრულეს და ახალქალაქში, ზაზა ფერაძის სახელობის საწყისი მომზადების ცენტრსა და ვაზიანში, წვრთნებისა და სამხედრო განათლების სარდლობის დაქვემდებარებულ ცენტრში (CTC) საწყის საბრძოლო მომზადებას გაივლიან. ინფორმაციას საქართველოს თავდაცვის სამინისტრო ავრცელებს. უწყების ცნობით, საწყის საბრძოლო მომზადების ცენტრში განთავსებამდე წვევამდელები სამხედრო აღრიცხვის, გაწვევისა და რეკრუტირების დიდუბისა და სამგორის რაიონების განყოფილებებში შეიკრიბნენ, სადაც ინსტრუქტაჟის მიღებისა და ოჯახის წევრებთან დამშვიდობების შესაძლებლობა ჰქონდათ.„წვევამდელებს რვა კვირის განმავლობაში სამწყობრო, საცეცხლე, საინჟინრო, სამედიცინო, ტაქტიკური მომზადება ჩაუტარდებათ და კავშირგაბმულობასა და ტოპოგრაფიაში მნიშვნელოვან საკითხებს შეისწავლიან. ცენტრის სერჟანტ-ინსტრუქტორები მათ სადისციპლინო წესდებების გაცნობასა და ფიზიკური მომზადების პროცესშიც დაეხმარებიან. საწყისი საბრძოლო მომზადების კურსის დასრულებისა და სამხედრო ფიცის დადების შემდეგ წვევამდელები თავდაცვის ძალების ქვედანაყოფებში გადანაწილდებიან. რვა თვის ვადით გაწვეული პირები სამ დღეში ერთხელ იმსახურებენ. წვევამდელთა ეროვნულ სამხედრო სამსახურში ნებაყოფლობით დარეგისტრირებული პირები დანამატის სახით, ყოველთვიურად 30%-ით მაღალ ანაზღაურებას მიიღებენ“, - აღნიშნულია ინფორმაციაში.

1758957614

სოხუმის დაცემის 32 -ე წლისთავთან დაკავშირებით და აფხაზეთის ომში დაღუპულთა ხსოვნის პატივის მიგების მიზნით, თავდაცვის სამინისტროს შენობაზე სახელმწიფო დროშა დაეშვა.უწყების ადმინისტრაციულ შენობებთან ერთად, სახელმწიფო დროშები დაშვებულია საქართველოს რეგიონებში არსებულ ყველა სამხედრო ბაზაზე.

1758550803

საქართველოს თავდაცვის მინისტრმა ირაკლი ჩიქოვანმა, ეროვნული გვარდიის ტერიტორიული თავდაცვის მე-10 და მე-20 ბრიგადის პირად შემადგენლობას ქვედანაყოფების დაარსების დღე მიულოცა. საქართველოს თავდაცვის სამინისტროს ინფორმაციით, იუბილე თელავში, მე-20 ტერიტორიული თავდაცვის ბრიგადის სამხედრო ბაზაზე აღინიშნა. ღონისძიების ფარგლებში ფიცის დადების საზეიმო ცერემონია გაიმართა. მე-20 ტერიტორიული თავდაცვის ბრიგადას ახალი პირადი შემადგენლობა შეემატა. ბრიგადის წევრებმა ღვთისა და ერის წინაშე საზეიმოდ დადეს სამხედრო ფიცი. ირაკლი ჩიქოვანმა სიტყვით გამოსვლისას აღნიშნა, რომ ეროვნული გვარდიის ტერიტორიული თავდაცვის ბრიგადები ახალი სარეზერვო სისტემის ერთ-ერთი მნიშვნელოვანი კომპონენტია საქართველოს უსაფრთხოების დაცვის საქმეში. მან რეზერვისტებს ფიცის დადება მიულოცა და საქართველოს სამსახურისთვის მადლობა გადაუხადა. ბრიგადების პირად შემადგენლობას სიტყვით მიმართეს საქართველოს თავდაცვის ძალების მეთაურმა, გენერალ - ლეიტენანტმა გიორგი მათიაშვილმა და ეროვნული გვარდიის უფროსმა, ბრიგადის გენერალმა რომან ჯოხაძემ. ღონისძიებაზე წუთიერი დუმილით პატივი მიაგეს საქართველოს ტერიტორიული მთლიანობისთვის ბრძოლებში, სამშვიდობო მისიებსა და სამსახურებრივი მოვალეობის შესრულების დროს დაღუპულთა ხსოვნას. ღონისძიების დასასრულს, დაჯილდოების ცერემონია გაიმართა. წარმატებული გვარდიელები დაჯილდოვდნენ თავდაცვის სამინისტროს უწყებრივი მედლებით - „სამშობლოსთვის თავდადებული“ და „გიორგი ანწუხელიძე“. სამხედრო მოსამსახურეებს სამკერდე ნიშნები - „ღირსეული გვარდიელი“, სერტიფიკატები და ფასიანი საჩუქრები გადაეცათ.

1758435693

6 თვის ვადით წვევამდელთა ეროვნულ სამსახურში გაწვეული სამხედროების უმრავლესობა სამხედრო კარიერის გაგრძელებას თავდაცვის ძალების საკონტრაქტო სამსახურში გეგმავს. ინფორმაციას საქართველოს თავდაცვის სამინისტრო ავრცელებს. სამინისტროს ცნობით, ჯარისკაცებმა 6 თვის განმავლობაში აღმოსავლეთ სარდლობის მე-4 ქვეითი ბრიგადის 43-ე ქვეითი ბატალიონის შემადგენლობაში ყოველდღიურად იმსახურეს. საბრძოლო ქვედანაყოფში ისინი გამოცდილმა სამხედრო მოსამსახურეებმა მოამზადეს.„წვევამდელების მონაწილეობით ვაზიანის სასროლეთზე ჩატარდა შემაჯამებელი, ოცეულის დონის ტაქტიკური სწავლება, რომელსაც თავდაცვის ძალების აღმოსავლეთის სარდალი, ბრიგადის გენერალი როლანდ ძნელაძე, მე-4 ქვეითი ბრიგადის მეთაური პოლკოვნიკი გიორგი ჯინჭარაძე და თავდაცვის ძალების წარმომადგენლები დაესწრნენ. ჯარისკაცებმა სწავლებაში ჩასაფრების, პოტენციური მოწინააღმდეგის განადგურებისა და სანგარ-სავალის წმენდის ოპერაციები ჩაატარეს. წვევამდელების მომზადების დონე დადებითად შეფასდა.2025 წლიდან წვევამდელები ეროვნულ სამხედრო სამსახურს თავდაცვის ძალებში გადიან. უწყება მათ სთავაზობს ახალ პირობებს, გაწვევის მათზე მორგებულ ვადებს, სახელფასო დანამატებსა და გაუმჯობესებულ სოციალურ პირობებს, რამაც ახალგაზრდების ნებაყოფლობით დარეგისტრირების რიცხვი გაზარდა. მზარდი დინამიკით ხასიათდება წვევამდელთა შორის თავდაცვის ძალებში სამსახურის მსურველთა რიცხვიც.წვევამდელთა ეროვნული სამხედრო სამსახური მიზნად ისახავს ძლიერი თავდაცვის რეზერვის შექმნასა და ქვეყნისთავდაცვისუნარიანობის კიდევ უფრო გაძლიერებას“, - აღნიშნულია ინფორმაციაში.

1758349348

ახალქალაქში, ზაზა ფერაძის სახელობის საწყისი საბრძოლო მომზადების ცენტრის 12 წლის იუბილესადმი მიძღვნილი და რეკრუტების ფიცის დადების ღონისძიება გაიმართა.ღონისძიებას თავდაცვის ძალების მეთაურის მოადგილე, გენერალ-მაიორი ზაზა ჩხაიძე, საწყისი საბრძოლო მომზადების ცენტრის ხელმძღვანელობა და რეკრუტების ოჯახის წევრები დაესწრნენ.თავდაცვის ძალების მეთაურის მოადგილემ რეკრუტებს სამხედრო ფიცის დადება, ხოლო პირად შემადგენლობას ცენტრის იუბილე მიულოცა. მან სამხედროებს ქვეყნის წინაშე ღირსეული სამსახური უსურვა და საწყისი საბრძოლო მომზადების მნიშვნელოვან როლზე ისაუბრა.სამხედროებს, ასევე მიმართა საწყისი საბრძოლო მომზადების ცენტრის მეთაურმა, პოლკოვნიკმა ზაქარია კალანდაძემ.იუბილესთან დაკავშირებით ცენტრის პირადი შემადგენლობა თავდაცვის სამინისტროს სისტემაში სამსახურისთვის სხვადასხვა ხარისხის მედლებით, სამახსოვრო საჩუქრებით, სიგელებითა და სერტიფიკატებით დაჯილდოვდა.ფიცის დადებამდე წვევამდელებმა ორთვიანი საწყისი საბრძოლო მომზადების სპეციალური პროგრამა გაიარეს. ისინი საკონტრაქტო სამხედრო სამსახურს თავდაცვის ძალების სხვადასხვა ქვედანაყოფში გაივლიან.

1758277941

საქართველოს თავდაცვის ძალების სამხედრო ავიაციის დღისადმი მიძღვნილი ღონისძიება ალექსეევკას სამხედრო საჰაერო ბაზაზე ჩატარდა.საქართველოს თავდაცვის მინისტრმა ირაკლი ჩიქოვანმა პირად შემადგენლობას პროფესიული დღე მიულოცა.ირაკლი ჩიქოვანმა სიტყვით მიმართვისას ავიაციის მნიშვნელობასა და მფრინავების როლზე გაამახვილა ყურადღება. მან აღნიშნა, რომ მფრინავების თავდაუზოგავი შრომა და პროფესიონალიზმი თავდაცვისძალებს კიდევ უფრო აძლიერებს. ქართული სამხედრო ავიაციის დღე სამხედროებს, ასევე მიულოცა თავდაცვის ძალების მეთაურმა, გენერალ-ლეიტენანტმა გიორგი მათიაშვილმა და მათ წარმატება უსურვა.ქართული ავიაციის დაარსებიდან 33 წლის იუბილესადმი მიძღვნილი ცერემონიალის დაწყებამდე, თავდაცვის მინისტრმა და თავდაცვის ძალების მეთაურმა, გენერალ ლეიტენანტმა გიორგი მათიაშვილმა ქვეყნის ტერიტორიული მთლიანობისთვის ბრძოლებში დაღუპულ გმირთა მემორიალი გვირგვინით შეამკეს.ღონისძიება დაჯილდოების ცერემონიალით გაგრძელდა. წარმატებულ სამხედრო მოსამსახურეებს უწყებრივი მედლები - „სამშობლოსთვის თავდადებული“, „გენერალი კვინიტაძე“, ასევე ფასიანი საჩუქრები გადაეცათ.ღონისძიების ოფიციალური ნაწილის დასრულების შემდეგ, სტუმრებმა სამხედრო აეროდრომზე წარმოდგენილი ტექნიკა დაათვალიერეს.1992 წლის 19 სექტემბერს აღიჭურვა ქართული საავიაციო ქვედანაყოფი ორი ერთეული სუ-25-ის ტიპის მოიერიშე თვითმფრინავით, რითაც პოლკოვნიკებმა იზანი ცერცვაძემ და ვალერი ნაყოფიამ პირველი ფრენა განახორციელეს. ქართული სამხედრო ავიაციის ისტორია კი, საქართველოს დემოკრატიული რესპუბლიკის პერიოდიდან იწყება,როდესაც 1918 წლის 20 აგვისტოს, საქართველოს პარლამენტის გადაწყვეტილებით, პირველი ქართული სამხედრო საავიაციო დანაყოფი შეიქმნა.

1758183658

ვაზიანის სასროლეთზე 6-თვის ვადით გაწვეულმა წვევამდელებმა ოცეულის დონის ტაქტიკური სწავლება ჩაატარეს. თავდაცვის სამინისტროს ინფორმაციით, სწავლებას თავდაცვის ძალების მთავარი სერჟანტი, მთავარი სერჟანტი გიორგი გოგოჭური, მე-4 ქვეითი ბრიგადის მეთაური, პოლკოვნიკი გიორგი ჯინჭარაძე და თავდაცვის ძალების წარმომადგენლები დაესწრნენ.წვრთნაში მონაწილეობდნენ წვევამდელთა ეროვნულ სამხედრო სამსახურში 6-თვის ვადით გაწვეული წვევამდელები, რომლებიც სამხედრო სამსახურს აღმოსავლეთ სარდლობის მე-4 ქვეითი ბრიგადის 43-ე ბატალიონის შემადგენლობაში გადიან. სწავლების მიზანს მოწინააღმდეგის ძირითადი ძალების განეიტრალება წარმოადგენდა. წვევამდელების მთავარი ამოცანა პოტენციური მოწინააღმდეგის ბლოკირების, შეყოვნებისა და კონტრშეტევაზე გადასვლის კომპონენტების შესრულება იყო.43-ე ბატალიონის სამხედრო მოსამსახურეებს მხარს უჭერდნენ სატანკო, საინჟინრო, ჰაერსაწინააღმდეგო და საარტილერიო ქვედანაყოფები.

1758102422

ნატო-საქართველოს არსებითი პაკეტის (SNGP) სამხედრო სამედიცინო შესაძლებლობების განვითარების ინიციატივის ფარგლებში, საქართველოს თავდაცვის სამინისტრომ, სამხედრო სამედიცინო ქვედანაყოფების შეფასებისა და ნატოს სტანდარტებთან თავსებადობის ამაღლების მიზნით სამედიცინო სწავლება ჩაატარა. ინფორმაციას თავდაცვის სამინისტრო ავრცელებს. უწყების ცნობით, სწავლება ვაზიანის სასწავლო ტერიტორიაზე ჩატარდა და მასში მონაწილეობდა საქართველოს თავდაცვის ძალების სამედიცინო პერსონალი. შეფასების პროცესს ხელმძღვანელობდნენ ნატოს სამხედრო მედიცინის დახელოვნების ცენტრის სერტიფიცირებული ექსპერტები აშშ-დან, დიდი ბრიტანეთიდან, უნგრეთიდან, სლოვაკეთიდან და ნიდერლანდებიდან.სწავლება, ასევე, ფოკუსირებული იყო საერთაშორისო და ჰუმანიტარულ ოპერაციებში ქართული სამხედრო სამედიცინო ქვედანაყოფების მონაწილეობის შესაძლებლობების გაძლიერებაზე. სამხედრო სამედიცინო შესაძლებლობების განვითარების ინიციატივის განხორციელება 2021 წლიდან მიმდინარეობს და მას ქართველ ექსპერტებთან ერთად, ხელმძღვანელობენ გერმანია და ნიდერლანდები.საქართველოს თავდაცვის სამინისტრო რეგულარული სამხედრო სამედიცინო წვრთნების ჩატარებით, მიზნად ისახავს ეროვნული მდგრადობისა და სამხედრო პერსონალის უსაფრთხოების შესაძლებლობების გაძლიერებასა და ნატოსთან თავსებადობის გაზრდას.

1758009965

დავით აღმაშენებლის სახელობის საქართველოს ეროვნული თავდაცვის აკადემიას პირველკურსელი იუნკერები შეუერთდნენ. წელს ეროვნული თავდაცვის აკადემიის იუნკერი ასზე მეტი აბიტურიენტი გახდა.აკადემიის წარმომადგენლებმა პირველკურსელ იუნკერებს ეროვნული თავდაცვის აკადემიაში არსებული უსაფრთხოების წესები და სამართლებრივი საკითხები გააცნეს.იუნკერებმა სასწავლო აუდიტორიები დაათვალიერეს და ყაზარმებში გადანაწილდნენ. მათ დაურიგდათ სამხედრო ფორმა, რომლის მორგების შემდეგ, სამხედრო მოსამსახურეებთან ერთად, „ჯარისკაცის ულუფაც“ დააგემოვნეს.სამხედრო ცხოვრების დაწყებამდე, ახალგაზრდებმა გაიარეს შიდა შესარჩევი ტური, რომელიც მოიცავდა ტესტირებას ფიზიკურ მომზადებაში, ფსიქოლოგიურ შერჩევასა და სამედიცინო შემოწმებას.პირველკურსელი იუნკერები გაივლიან 5-კვირიან საწყისი საბრძოლო მომზადების კურსს (BCT). საკარანტინო პერიოდის შემდეგ, ისინი გააგრძელებენ სწავლას საბაკალავრო საგანმანათლებლო პროგრამებზე: თავდაცვა და უსაფრთხოება, სამართალი, მენეჯმენტი, ინფორმატიკა, მექანიკის ინჟინერია და საავიაციო ინჟინერია.საბაკალავრო საგანმანათლებლო პროგრამის დასრულებისას კურსდამთავრებულს მიენიჭება ბაკალავრის აკადემიური ხარისხი და ოფიცრის წოდება – ლეიტენანტი. ეროვნული თავდაცვის აკადემიაში იუნკერის სწავლა და ცხოვრება სრულად ფინანსდება საქართველოს თავდაცვის სამინისტროს მიერ. მათთვის გათვალისწინებულია მზარდი სტიპენდია.იუნკერები აკადემიაში უზრუნველყოფილნი იქნებიან საცხოვრებლით, კვებით, სასწავლო პროცესთან დაკავშირებული მატერიალური და საკანცელარიო ნივთებით, სამხედრო ფორმითა და აღჭურვილობით. აკადემიის ინფრასტრუქტურული გარემო სრულად პასუხობს სამხედრო ტიპის სასწავლებლის უმაღლეს სტანდარტებს.ეროვნული თავდაცვის აკადემიის დასრულების შემდეგ, იუნკერებს თავდაცვის ძალების ქვედანაყოფებში დასაქმების 100%-იანი პერსპექტივა ექნებათ.

1757921640

ქუთაისში, გენერალ გიორგი კვინიტაძის სახელობის კადეტთა სამხედრო ლიცეუმში სასწავლებლის 15 წლის იუბილესა და ახალი სასწავლო წლის დაწყებისადმი მიძღვნილი ღონისძიება გაიმართა. ინფორმაციას საქართველოს თავდაცვის სამინისტრო ავრცელებს. პირად შემადგენლობას სიტყვით საქართველოს თავდაცვის მინისტრმა ირაკლი ჩიქოვანმა, თავდაცვის ძალების მეთაურმა, გენერალ-ლეიტენანტმა გიორგი მათიაშვილმა და ლიცეუმის დირექტორმა, პოლკოვნიკმა მალხაზ გოლეთიანმა მიმართეს. უწყების ხელმძღვანელებმა ლიცეუმის წარმომადგენლებს, კადეტებსა და მათი ოჯახის წევრებს სასწავლებლის იუბილე და ახალი სასწავლო წლის დაწყება მიულოცეს.თავდაცვის მინისტრმა აღნიშნა, რომ მომავალი სამხედროების განათლების მხარდაჭერა მთავრობის პრიორიტეტია. მისი განცხადებით, თავდაცვის სამინისტრო გააგრძელებს ლიცეუმის მხარდაჭერას და კადეტების საუკეთესო საცხოვრებელი, ასევე სასწავლო პირობებით უზრუნველყოფას. ამ მიზნით, კადეტთა სამხედრო ლიცეუმის ტერიტორიაზე ახალი ყაზარმის მშენებლობა მიმდინარეობს.თავდაცვის ძალების მეთაურმა კადეტთა სასწავლებლის მნიშვნელობაზე გაამახვილა ყურადღება; ლიცეუმის დირექტორმა კი ისაუბრა უწყების წარმატებულ საქმიანობაზე, რაც მის მიმართ მზარდ ინტერესს განაპირობებს.პირველკურსელმა კადეტებმა წაიკითხეს „კადეტთა მრწამსი“. ღონისძიების დამსწრე საზოგადოებამ პატივი მიაგო საქართველოს ერთიანობისათვის ბრძოლისა და სამსახურებრივი მოვალეობის შესრულების დროს დაღუპულთა ხსოვნას.ლიცეუმის მასწავლებლები და სამხედრო მოსამსახურეები მედლებით, გენერალ გიორგი კვინიტაძის სკულპტურით, მადლობის სიგელებითა და ფასიანი საჩუქრებით დააჯილდოვეს.ღონისძიებას თავდაცვის უწყების ხელმძღვანელი პირები, ქუთათელ-გაენათელი მიტროპოლიტი იოანე და ადგილობრივი ხელისუფლების წარმომადგენლები, ასევე კადეტთა ოჯახის წევრები დაესწრნენ.კადეტთა სამხედრო ლიცეუმში მოსწავლეები კონკურსის წესით მიიღებიან. მოსწავლეებმა, რომლებიც მიმდინარე წელს დაასრულებენ ცხრა კლასს, უნდა გაიარონ რეგისტრაცია, სამედიცინო შემოწმება და ჩააბარონ გამოცდები ზოგად უნარებსა და მათემატიკაში.

1757830535

ლისის ტბაზე, დაჭრილ-დაშავებული სამხედროების მხარდასაჭერად, საქველმოქმედო მარათონი გაიმართა.გარბენში მონაწილეობა მიიღეს თავდაცვის უწყების სამხედრო და სამოქალაქო პირებმა, დაჭრილ-დაშავებულმა სამხედრო მოსამსახურეებმა, დიპლომატიური კორპუსისა და მოხალისე ორგანიზაციების წარმომადგენლებმა.მარათონს, ასევე შეუერთდნენ სამხედროების ოჯახის წევრები და რიგითი მოქალაქეები.მარათონის სტარტის აღებამდე, თავდაცვის ძალების ბენდმა საქართველოს სახელმწიფო ჰიმნი შეასრულა. ღონისძიებას თავდაცვის მინისტრის პირველი მოადგილე პაატა პატიაშვილი და თავდაცვის ძალების მეთაურის მოადგილე, გენერალ-მაიორი ირაკლი ჭიჭინაძე დაესწრნენ. თავდაცვის ძალების მეთაურის მოადგილემ ღონისძიების მონაწილეებსა და ორგანიზატორებს სიტყვით მიმართა და დაჭრილ-დაშავებული სამხედროების მხარდაჭერისთვის მადლობა გადაუხადა.საქველმოქმედო გარბენის მონაწილეებმა სხვადასხვა სირთულის 3, 5 და 13 კილომეტრიანი დისტანცია დაფარეს. მარათონის გამარჯვებულებს ჯილდოები და სერტიფიკატები გადაეცათ. სამახსოვრო საჩუქრებით დაჯილდოვდნენ გარბენში მონაწილე დაჭრილ-დაშავებული სამხედროები.საქველმოქმედო მარათონის პარალელურად, ლისის ტბის ტერიტორიაზე თავდაცვის მოხალისე ორგანიზაციებს შორის შიდა შეჯიბრება ჩატარდა. გარდამავალი თასი „გენერალ მაზნიაშვილის სახელობის ახალგაზრდული ლეგიონის“ წარმომადგენლებმა მოიპოვეს.საქველმოქმედო ღონისძიება საქართველოს თავდაცვის სამინისტროს, სამხედრო ატაშეთა ასოციაციისა და დაჭრილ მებრძოლთა თანადგომის ფონდის ინიციატივით ყოველწლიურად ტარდება.საქველმოქმედო მარათონის შედეგად შეგროვებული თანხა სრულად გადაირიცხება დაჭრილ მებრძოლთა თანადგომის ფონდში.