პრემიერი: უცხოელები, კონკრეტული დიპლომატები პირდაპირ მხარდაჭერას უცხადებდნენ იმ აქციას, რომლის გაცხადებული მიზანი იყო კონსტიტუციური წყობილების დამხობა, ამის მიუხედავად, ისინი დღეს დუმან, მიუხედავად მათი პასუხისმგებლობისა
1759651003
საკუთარ სახეს აჩვენებენ კონკრეტული ადამიანები, მათ შორის უცხოელები, კონკრეტული დიპლომატები. კიდევ ერთხელ შევახსენებ ყველას, რომ კონკრეტული ადამიანები, კონკრეტული სტრუქტურების წარმომადგენლები პირდაპირ მხარდაჭერას უცხადებდნენ იმ აქციას, რომლის გაცხადებული მიზანი იყო კონსტიტუციური წყობილების დამხობა, - განაცხადა საქართველოს პრემიერ-მინისტრმა ირაკლი კობახიძემ დიპლომატების დუმილთან დაკავშირებით, რომლებმაც არ გააკეთეს შეფასება გუშინ განვითარებულ მოვლენებზე, როდესაც კონკრეტული ჯგუფის მიერ ადგილი ჰქონდა ხელისუფლების დამხობის მცდელობას.
ამის მიუხედავად, პრემიერის თქმით, ისინი დღეს დუმან, მიუხედავად მათი პასუხისმგებლობისა, რომელიც ეკისრებათ საკუთარი პირვანდელი პოზიციიდან გამომდინარე, რასაც საზოგადოება ხედავს და აფასებს.
ირაკლი კობახიძის თქმით, ისინი დუმან და გაურბიან იმ პასუხისმგებლობას, რომელსაც წესით თავადაც უნდა გრძნობდნენ.
მთავრობის მეთაურმა მადლობა გადაუხადა ყველა პოლიციელს, ვინც გუშინ მოქმედებდა და განსაკუთრებით მათ, ვინც დაშავდა.
„ვისარგებლებ შემთხვევით და განსაკუთრებულ მადლობას გადავუხადო თითოეულ პოლიციელს, რომელიც მოქმედებდა გუშინ. და განსაკუთრებული მადლობა მინდა გადავუხადო დაშავებულ პოლიციელებს. როგორც მოგეხსენებათ, საჭირო გახდა 15 პოლიციელის გადაყვანა კლინიკაში, მიღებული დაზიანებების გამო. საბედნიეროდ, მათი მდგომარეობა არის სტაბილური და მიმდინარეობს გამოჯანმრთელების პროცესი. მათ მინდა განსაკუთრებული მადლობა გადავუხადო და განსაკუთრებული თანადგომა გამოვუცხადო“, - განაცხადა პრემიერმა.
