„ვაქცინაციის შემდეგ მწვავე ალერგიული რეაქცია კიდევ ერთ შემთხვევაში დადასტურდა, თუმცა დასადგენია იყო თუ არა შოკი“ - გამყრელიძე
1616158961
დაავადებათა კონტროლის ეროვნული ცენტრის დირექტორის განცხადებით, საქართველოში ვაქცინაციის შემდეგ, სავარაუდოდ, ანაფილაქსიური შოკის განვითარების შემთხვევა 17 მარტს დადასტურდა.
„გიდასტურებთ, რომ გვერდითი მოვლენების შესწავლის კომისიაში შევიდა ერთ-ერთი კლინიკიდან ახალგაზრდა ქალის შესახებ შეტყობინება, რომ მას განუვითარდა ანაფილაქსიური შოკი. კლინიკამ ანამნეზში ასე ჩაწერა, თუმცა იყო თუ არა ეს ნამდვილად ანაფილაქსიური შოკი, ეს გვერდითი მოვლენების მართვის კომისიამ უნდა დაადგინოს“, - აღნიშნა ამირან გამყრელიძემ.
მისი თქმით, პაციენტი ახლა თავს კარგად გრძნობს.
„იქ იყო მწვავე ალერგიული რეაქცია, თუმცა იყო თუ არა შოკი, ეს დასადგენია. იგი ახლა კარგად არის“, - განაცხადა ამირან გამყრელიძემ.
შეგახსენებთ, რომ 18 მარტს ახალციხეში, „იმედის“ კლინიკაში, კორონავირუსის საწინააღმდეგო AstraZeneca-ს ვაქცინის გაკეთების შემდეგ ახალგაზრდა ექთანი კომაში ჩავარდა.
პაციენტი თბილისში, პირველი საუნივერსიტეტო კლინიკის რეანიმაციულ განყოფილებაში დღეს გარდაიცვალა.
