ვახო მეგრელიშვილი: კონფლიქტი შეიძლება პოზიტიურად გამოვიყენოთ, ვიფიქროთ , „გირჩი 2“-ის შექმნაზე

„გირჩის“ წევრი ვახო მეგრელიშვილი პარტიის ირგვლივ განვითარებულ მოვლენებს გამოეხმაურა. მეგრელიშვილის ამბობს, რომ „გირჩის“ დატოვებას არ აპირებს.

ჟურნალისტის კითხვაზე როგორ წარმოუდგენია პოლიტიკური თანაცხოვრება? მეგრელიშვილი აცხადებს, რომ „ვერავის წარმოუდგენია და ამოცანის ამოხსნა მოუწევთ“.

„შეიძლება ეს კონფლიქტი გამოვიყენოთ პოზიტიურად იმ თვალსაზრისით, რომ დაშლაც კი ცივილური იყოს. შეიძლება ვიფიქროთ ფრაქციებზე ერთი პლატფორმის შიგნით, გირჩი 2-ის გაკეთებაზე და ა.შ. მილიონი რამე შეიძლება ვიფიქროთ, ოღონდ ეს არის საუბრის თემა“, - განაცხადა რუსთავი 2-ის ეთერში მეგრელიშვილმა.

ინფორმაციისთვის, ზურაბ ჯაფარიძე აცხადებს, რომ „გირჩში“ იაგო ხვიჩიასთან, სანდრო რაქვიაშვილთან და ვახო მეგრელიშვილთან თანამშრომლობას აღარ აპირებს.

ამასთან, ჯაფარიძე ხაზგასმით აღნიშნავს, რომ რჩება „გირჩის“ ლიდერად და არ აპირებს პარტიის დატოვებას.