მოქალაქეები მათი ოჯახის ექიმის ვინაობას პირადი ნომრით გაიგებენ
1603713185
ჯანდაცვის მინისტრის ეკატერინე ტიკარაძის განცხადებით, მიმდინარეობს სპეციალურ სისტემაზე მუშაობა, რომლის მეშვეობითაც მოქალაქეები მათი ოჯახის ექიმის ვინაობის გაგებას პირადი ნომრით შეძლებენ.
„ჩვენ ვგეგმავთ, ჩვენი ბაზების მეშვეობით დავაიდენტიფიციროთ თითოეული მოქალაქე, თუ რომელი ოჯახის ექიმის პატრონაჟის ქვეშ იმოფებოდა დღემდე და სახელმწიფო უნაზღაურებდა ამ ექიმს ამ ადამიანისთვის გასაწევ მომსახურებას.
თითოეულ მოქალაქეს ჩვენ გავაცნობთ მათ ოჯახის ექიმს და გავუზიარებთ შესაბამისად მათ საკონტაქტო ნომრებს. უმოკლეს ვადებში მათთან შეთანხმებით, ჩვენ ამას გავასაჯაროვებთ, სავარაუდოდ, საიტზეც დაიდება და ყველა მოქალაქეს შეეძლება საკუთარი პირადი ნომრით დააიდენტიფიციროს, თუ ვინ არის მისი ოჯახის ექიმი“, - აღნიშნა ჯანდაცვის მინისტრმა უწყებათაშორისი საკოორდინაციო სხდომის დასრულების შემდეგ გამართულ ბრიფინგზე.
მისივე თქმით, არსებული პროტოკოლის მიხედვით, კორონავირუსის საეჭვო სიმპტომების გამოვლენის შესახებ მოქალაქემ, პირველ რიგში, ოჯახის ექიმს უნდა აცნობოს.
ინფორმაციისთვის, საქართველოში კორონავირუსის 30 303 შემთხვევაა გამოვლენილი, აქედან 11 370 პაციენტი განიკურნა, 215 კი გარდაიცვალა.
