ბაქო ერევანს ყარაბაღში აზერბაიჯანელი სამხედროების პოზიციების დაბომბვაში ადანაშაულებს
1659211333
ბაქომ ერევანი მთიან ყარაბაღში მდებარე სადავო ტერიტორიაზე აზერბაიჯანელი სამხედროების პოზიციების დაბომბვაში დაადანაშაულა, - ამის შესახებ Reuters-ი იუწყება.
აზერბაიჯანის თავდაცვის სამინისტრომ განაცხადა, რომ მან საპასუხო ცეცხლი მას შემდეგ გახსნა, რაც სომხეთმა ლაჩინისა და კალბაჯარის რაიონებში არტილერია გამოიყენა.
ამავდროულად, სომხეთის თავდაცვის სამინისტრომ ბრალდებები უარყო.
გარდაცვლილებისა და დაშავებულების შესახებ ინფორმაცია არცერთ მხარეს არ გაუვრცელებია.
ცნობისთვის, რამდენიმე დღის წინ აზერბაიჯანის პრეზიდენტმა ილჰამ ალიევმა განაცხადა, რომ სომხეთი 44-დღიანი ომის შემდეგ მიღწეულ შეთანხმებებს არ ასრულებს. ალიევი სომხეთისა და მთიანი ყარაბაღის შეიარაღებულ ძალებს შორის სხვაობას ვერ ხედავს და ყარაბაღში არსებული ყველა ქვედანაყოფის სრულ განიარაღებას მოითხოვს.
ეს საკითხი თბილისში სომხეთის და აზერბაიჯანის საგარეო საქმეთა მინისტრების შეხვედრაზეც განიხილებოდა, რომელიც რამდენიმე დღის წინ გაიმართა.
აგრეთვე, დაგაინტერესებთ:
🔴 მოსკოვში გაჩენილ ხანძარს 8 ადამიანი ემსხვერპლა
