FT: აღმოსავლეთში რუსეთის გარღვევამ უკრაინა შეაშფოთა

უკრაინის აღმოსავლეთ ფრონტზე რუსეთის გარღვევამ უკრაინა შეაშფოთა აშშ-ის პრეზიდენტ დონალდ ტრამპსა და რუსეთის ლიდერ ვლადიმერ პუტინს შორის შეხვედრის წინ, რამაც გააღვივა ვარაუდები, რომ კრემლის ლიდერი შეეცდება უკრაინისგან მეტი დათმობების მიღებას შესაძლო სამშვიდობო შეთანხმების ფარგლებში.

„ფაინენშალ თაიმსმა“ გაარკვია, თუ რამდენად კრიტიკულია ფრონტზე არსებული ვითარება უკრაინისთვის.

რუსებმა ფრონტზე წარმატებას მიაღწიეს?

უკრაინელმა და დასავლელმა სამხედრო ანალიტიკოსებმა განაცხადეს, რომ ბოლო რამდენიმე დღის განმავლობაში რუსეთის ჯარებმა დონეცკის ოლქში, დობროპოლის პარალელურ ვიწრო დერეფნის გასწვრივ თითქმის 15 კილომეტრით წინ წაიწიეს. ამავდროულად, რუსებმა პოკროვსკი თითქმის მთლიანად ალყაში მოაქციეს.

ჟურნალისტებმა ხაზი გაუსვეს, რომ რუსეთის გარღვევა საფრთხეს უქმნის დობროპოლისა და კრამატორსკს შორის დამაკავშირებელ მნიშვნელოვანი გზის გადაჭრას. ამან შეიძლება გამოიწვიოს ის, რომ ოკუპანტებს საშუალება მიეცემათ, გვერდი აუარონ ბოლო თვეებში უკრაინელი სამხედროების მიერ აშენებულ თავდაცვით ხაზს.

გამოცემამ აღნიშნა, რომ ეს რუსეთის ერთ-ერთი ყველაზე მნიშვნელოვანი მიღწევაა ბოლო ერთი წლის განმავლობაში. უფრო მეტიც, ეს უკრაინისთვის სახიფათო მომენტში ხდება, რომლის არმიაც პერსონალისა და საბრძოლო მასალის დეფიციტს განიცდის.

გარდა ამისა, აშშ აგრძელებს უკრაინაზე ზეწოლას და მოითხოვს დათმობებს სამშვიდობო შეთანხმების მისაღწევად. მანამდე, უკრაინის პრეზიდენტმა ვოლოდიმირ ზელენსკიმ გამოთქვა შეშფოთება იმის შესახებ, რომ პუტინს შეუძლია ტრამპთან შეხვედრა გამოიყენოს სამხედრო იმპულსის გასაძლიერებლად.

„სიტუაცია საკმაოდ ქაოტურია: მოწინააღმდეგე ჩვენს ტერიტორიაზე ღრმად მიიწევს წინ, თავდაცვაში ხარვეზები აღმოაჩინა, შემდეგ კი პოზიციები გაამყარა და ახალი შეტევისთვის ძალები მოიკრიბა“, - ნათქვამი Deep State-ის ერთ-ერთ ბოლო განცხადებაში.

უკრაინა უარყოფს რუსეთის მიერ ფრონტზე გარღვევას

გამოცემამ გაიხსენა, რომ ადრე ჯარების ოპერატიულ-სტრატეგიული დაჯგუფება „დნიპროს“ სარდლობამ უარყო ინფორმაცია რუსული გარღვევის შესახებ და ხაზგასმით აღნიშნა, რომ რუსეთის ძალებმა მხოლოდ უკრაინელი სამხედროების თავდაცვის პირველი ხაზის გარღვევა მოახერხა.

„რა თქმა უნდა, სიტუაცია კვლავ რთული რჩება და ამ რეგიონში ბრძოლები ფრონტის სხვა რაიონებთან შედარებით ყველაზე ინტენსიურია“, - ნათქვამია გავრცელებულ განცხადებაში. 

უკრაინის შეიარაღებული ძალების გენერალურმა შტაბმა, ასევე, არ დაადასტურა ინფორმაცია აღმოსავლეთ ფრონტის ხაზზე რუსული ჯარების გარღვევის შესახებ. თუმცა, გენერალურმა შტაბმა განაცხადა, რომ უკრაინის შეიარაღებული ძალების მთავარსარდლის ალექსანდრე სირსკის გადაწყვეტილებით, დობროპოლისა და პოკროვსკის მიმართულებით დამატებითი ძალები და რესურსები გადადის.

უკრაინელი ჯარისკაცებისა და სამხედრო ანალიტიკოსების აზრით, რეალობა გაცილებით მკაცრი აღმოჩნდა, ვიდრე ვარაუდობდნენ.

„პოკროვსკის ჩრდილოეთით რუსეთის ბოლოდროინდელი ტაქტიკური გარღვევა მოულოდნელი არ არის, ერთიანი თავდაცვითი ხაზების არარსებობის გათვალისწინებით, და შესაძლოა, სიტუაციის კიდევ უფრო გაუარესება გამოიწვიოს“, - განუცხადა ჟურნალისტებს სამხედრო ანალიტიკოსმა და კარნეგის საერთაშორისო მშვიდობის ფონდის რუსეთისა და ევრაზიის პროგრამის უფროსმა მკვლევარმა მაიკ კოფმანმა.

საქველმოქმედო ფონდის  ხელმძღვანელმა ტარას ჩმუტმა, ადრე ხაზგასმით აღნიშნა, რომ დონეცკის რეგიონში არსებული ვითარება იმ ქმედებების ან უმოქმედობის შედეგია, რომლებზეც წელიწად-ნახევრის განმავლობაში მუდმივად საუბრობდნენ.

გამოცემამ დასძინა, რომ ზოგიერთი ანალიტიკოსი მიიჩნევს, რომ სიტუაცია შეიძლება აიხსნას არა რუსეთის ახალი ტაქტიკით, არამედ უკრაინის თავდაცვითი ხაზების არასაკმარისი რაოდენობით. კერძოდ, უკრაინელმა სამხედრო მოსამსახურემ და სამხედრო ბლოგერმა სტანისლავ ბუნიატოვმა განაცხადა, რომ „მთელი თავდაცვითი ხაზი საცერს ჰგავს“.

რუსეთის გარღვევა აღმოსავლეთ ფრონტის ხაზზე - მნიშვნელოვანი ამბავი

მანამდე, სამხედრო ექსპერტმა პავლო ნაროჟნიმ განაცხადა, რომ რუსმა ოკუპანტებმა პოკროვსკის ჩრდილოეთით შეღწევა მოახერხეს, რადგან უკრაინის თავდაცვაში სუსტი წერტილი იპოვეს. მისი თქმით, მოვლენების განვითარება უკრაინისთვის ძალიან უსიამოვნოა.

გარდა ამისა, უკრაინის შეიარაღებული ძალების გენერალური შტაბის პრესმდივანმა, მაიორმა ანდრეი კოვალევმა, UNIAN-თან კომენტარში განაცხადა, რომ პოკროვსკის მიმართულებით დამპყრობლები ცდილობენ მცირე ჯგუფებად შეღწევას უკრაინული ჯარების პოზიციების პირველი ხაზიდან.

მან აღნიშნა, რომ უკრაინის შეიარაღებული ძალების მთავარსარდალმა, ალექსანდრე სირსკიმ, დაავალა დობროპოლისა და პოკროვსკის მიმართულებით დამატებითი ძალებისა და საშუალებების გამოყოფა.