„კოვიდინფიცირების დამძიმებული ფორმების შემთხვევაში არაფრით არ შეიძლება ბევრი სითხის მიღება“ - დავით გადელია
1629445976
აკადემიკოს ვახტანგ ბოჭორიშვილის სახელობის კლინიკის ხელმძღვანელი დავით გადელია იმუნიზაციის პროცესის შესახებ საზოგადოებაში გავრცელებული მოსაზრების საპასუხოდ განმარტებას აკეთებს.
დავით გადელიას თქმით, არაა სწორი გავრცელებული მოსაზრება, რომ კოვიდინფიცირების დროს ბევრი სითხის მიღება სასარგებლოა. მისი თქმით, დამძიმებული ფორმების შემთხვევაში ბევრი სითხის მიღებამ, ფილტვების დაზიანების გამო, შეიძლება სისხლის მიმოქცევის მცირე წრეში შეგუბება გამოიწვიოს.
ამასთან, ექიმის თქმით, აცრილების დაავადების ალბათობა 80%-ით მცირდება, ხოლო სიკვდილიანობა სრულყოფილი ვაქცინაციისას - 99-100%-ით.
„ვაგრძელებ გულახდილ საუბრებს პანდემიასთან დაკავშირებით, ცხადია, ჩემი ცოდნის და შესაძლებლობების ფარგლებში...
✔️ ძალიან ხშირად გაგვიგია, რომ აცრის შემდეგ ადამიანი ვირუსის მატარებელი და გადამდებია; ოდნავ ლოგიკას თუ მოიშველიებთ, დიდი პასტერობა და კოხობა არ უნდა იმის გააზრებას, რომ ვირუსი ადამიანიდან ადამიანში გადადის ცხვირ-ხახის გამონაყოფიდან ნერწყვი, გამოყოფილი სეკრეტი. ანუ ვირუსი იქ უნდა იყოს ამავე გზის შემოსული და ცემინებით, კოცნით, საუბრისას ნერწყვით, დახველებით მოხვდეს მეორე ადამიანის ცხვირ-პირის მიდამოში. ვაქცინა კი კეთდება კუნთში. მკვდარი ვაქცინა როგორ უნდა გამრავლდეს? თანაც ისე, რომ ნერწყვში და სეკრეტებში გაჯერდეს! უკვე მხოლოდ ფილტვებში არსებული ვირუსიც კი აღარაა დიდი ალბათობით გადამდები, არათუ ვაქცინა.
✔️ „ვაქცინა გაიკეთა და მაინც დაავადდა“... კი ბატონო, ასეც ხდება. ის კი არა, ძალიან ბევრი გვყავს ხელმეორედ გადატანილები. გვყავს ექიმიც, რომელიც ორჯერ დაავადდა და შუაში ვაქცინირებულიც იყო! რაზე მეტყველებს ეს? იმაზე, რომ ვაქცინაციას აზრი არა აქვს? მსოფლიო სტატისტიკა საწინააღმდეგოს ამბობს და ეს გამონაკლისები სწორედ ზოგადად კანონზომიერებას ამტკიცებს: „აცრილების დაავადების ალბათობა 80%-ით მცირდება, ხოლო სიკვდილიანობა, სრულყოფილი ვაქცინაციისას - 99-100%-ით!“
✔️ „დიდი ხნით ერთი და იგივე პირბადის ხმარება უფრო სახიფათოა, ვიდრე უპირბადობა!“.. რა თქმა უნდა, ჯობია ცვალოთ პირბადე. მაგრამ თუ ამის საშუალება არ გაქვთ, ატარეთ მუდამ ერთი და იგივე მხრივ. პირბადე სახეს მუდმივად ეხება და დაბინძურებისას არის საფრთხე, სხვა მიკრობებმა დაიბუდონ და გამოიწვიონ კანის დაავადებები. დავიმახსოვროთ: პირბადის მთავარი დანიშნულება კოვიდის წინააღმდეგ არის როგორც ჩვენი ნერწყვის და ცხვირის გამონადენების მექანიკური შეკავება, რომ სხვას არ გადავდოთ, ასევე სხვის მიერ „გამოსროლილი“ იგივე ნაწილაკებისგან მექანიკური დაცვა.
✔️ არაა სწორი გავრცელებული მოსაზრება, რომ ბევრი სითხის მიღება სასარგებლოა. დამძიმებული ფორმების შემთხვევაში კი პირიქით, არაფრით არ შეიძლება ბევრი სითხის მიღება! შეიძლება გამოიწვიოს შეგუბება სისხლის მიმოქცევის მცირე წრეში, ფილტვების დაზიანების გამო.
✔️„ვერ ხერხდება დროული დახმარების გაწევა, იგვიანებს კვლევის პასუხები, ძალიან ბევრი ხალხი და ზოგჯერ უკონტროლობაა კოვიდიან პაციენტთა კვლევებისას, აცრების დროს და ა.შ. თუ კარგი პატრონი არ გყავს და არ „იჩალიჩე“, კლინიკაში ვერ მოხვდები!“. სამწუხაროდ, ეს ყველაფერი მართალია. ძალიან არ გვყოფნის პერსონალი, რესურსები, ადგილები.
✔️ წინა თეზიდან გამომდინარე, მინდა ბოდიში მოგიხადოთ, თუ ეს ყველაფერი ჩვენ კლინიკაში შეგემთხვათ. პირველ რიგში, ჩვენი ოჯახის წევრებს, მეგობრებს, ნაცნობებს ვინც გვიკავშირდება და ამავე დროს, ყველა ჩვენ მოქალაქეს: გთხოვთ იყოთ შემწყნარებელი ჩვენს მიმართ, სამედიცინო მუშაკების მიმართ. ძალიან მძიმე სურათს ვუყურებთ ყოველდღე.
აუტანელია იმის შეგრძნება, რომ ვერ ეხმარები ადამიანს, თვალსა და ხელს შუა ილევა პიროვნება. იწურება ჩვენი ფსიქოლოგიური მდგრადობის რესურსები. ბევრ რამეს, მათ შორის იმ ხუმრობას, რასაც ადრე სიცილით ვიღებდი მეგობრებისგან, საშინელ გაღიზიანებას იწვევს. გუშინ საღამოს ვესაუბრე ჩემს კოლეგას, რომლის ყველაზე დიდი იმედი მაქვს ამ დაავადებასთან ბრძოლაში, ალბათ ძალიან ბევრსაც. თითქმის ტირილით მიპასუხა „ახლა სახლში ვზივარ, მარტო და რაიმე ალკოჰოლური თუ არ მივიღე, გული გამისკდებაო“.
ძალიან მოწესრიგებული ქალბატონია და საერთოდ არასდროს დაულევია! რაც შეეხება პიროვნულ თვისებებს, იმდენად უშიშარია, რომ თოფიან ფირალს ჩამოიღებს ცხენიდან!... ახლა საშინლად დათრგუნული იყო. დავუყვავე და „რა ვქნა, საშინელი ნაკადია, ყველა მიმძიმდება და ვერ ვშველიო“.
რა თქმა უნდა, ასე არაა, ეჩვენება დაძაბულობის გამო ერთეულების გარდა, ყველანი გამოჯანმრთელებული უბრუნდებიან ოჯახებს. სასწაულად მძიმე, თითქმის უიმედო შემთხვევები გამოვტაცეთ ახლახან სიკვდილს, მაგრამ გონებაში მარცხი უფრო დიდხანს ილექება და ფსიქიკას წამლავს...
თავს არ გაცოდებთ, ისევ თქვენ და ჩვენ ქვეყანას რომ კარგად გამოვადგეთ, ცოტა დაგვზოგეთ“, - წერს დავით გადელია ფეისბუკის პირად გვერდზე.
აგრეთვე დაგაინტერესებთ:
🔴 მითები და ფაქტები ვაქცინაციის შესახებ - ექსპერტები ცრუ მოსაზრებებს უარყოფენ
