„სამართალდამცავმა ორგანოებმა ძალის გადამეტების გარეშე შეასრულეს თავისი მოვალეობა“ - თალაკვაძე
1614066914
„ნიკა მელია თავის ადვოკატებთან ერთად აგრძელებს პროცესს სასამართლოში, დანარჩენი პოლიტიკურ პროცესს პარლამენტში - ეს არის ქვეყნის დემოკრატიული განვითარების სწორი გზა,“ - აღნიშნულის შესახებ პარლამენტის თავმჯდომარე არჩილ თალაკვაძემ ჟურნალისტებთან საუბრისას განაცხადა.
არჩილ თალაკვაძე აცხადებს, რომ მელიას საქმეზე სახელმწიფო იყო კომპრომისული, თუმცა მან განგებ აირჩია გზა, რომლითაც უფრო მეტ ესკალაციას შეიტანდა პროცესში.
„დემოკრატიულ სახელმწიფოში პასუხი არის სასამართლოს გადაწყვეტილების აღსრულება.
სახელმწიფო იყო მაქსიმალურად კომპრომისული, მელიას შეთავაზებული ჰქონდა გირაოს გადახდა, სხვა შემთხვევებში, მან იცოდა რომ ემუქრებოდა თავისუფლების აღკვეთა.
მან განგებ აირჩია, რომ უფრო მეტი ესკალაცია შეეტანა პროცესებში.
დღეს დავინახეთ, რომ სამართალდამცავმა ორგანოებმა ძალის გადამეტების გარეშე შეასრულეს თავისი მოვალეობა.
მთელი საზოგადოების წინაშე სრულიად გამჭვირვალედ ჩატარდა დაკავება,“ - განაცხადა თალაკვაძემ.
მისი თქმით, მომხდარზე პოლიტიკური პასუხისმგებლობა რადიკალურ ოპოზიციასა და ნიკა მელიას ეკისრებათ.
„მომხდარზე პოლიტიკური პასუხისმგებლობა ეკისრებათ ნიკა მელიას იმ თანაგუნდელებს რადიკალური ოპოზიციიდან, ვინც არწმუნებდნენ და ურჩევდნენ, რომ კანონის მიმართ დაუმორჩილებლობის, პარლამენტზე და ცესკოს შენობაზე შეტევის ძალადობრივი გზა, თითქოს არის დემოკრატიული და რაიმე შედეგამდე მიიყვანს ქვეყანას.
დღეს აშკარაა, რომ რადიკალურმა ოპოზიციამ ამ დესტრუქციული სცენარით საკუთარი თავი შეიყვანა ჩიხში.
კიდევ ერთხელ მივმართავ ყველა ოპოზიციურ პარტიას, რომელსაც აქვს პრეტენზია რომ არის ჯანსაღი პოლიტიკური ძალა, შემდეგი ნაბიჯი პროცესების დეესკალაციისკენ იქნება უკვე პარლამენტში და საპარლამენტო პროცესში მონაწილეობა.
ნიკა მელია თავის ადვოკატებთან ერთად აგრძელებს პროცესს სასამართლოში, დანარჩენი პოლიტიკურ პროცესს პარლამენტში - ეს არის ქვეყნის დემოკრატიული განვითარების სწორი გზა,“ - განაცხადა არჩილ თალაკვაძემ.
ჟურნალისტის შეკითხვას, თუ რას ფიქრობს თალაკვაძე საერთაშორისო პარტნიორების კრიტიკაზე, მან შემდეგი სიტყვებით უპასუხა:
„საერთაშორისო პარტნიორებს რაც შეეხება, პარლამენტზე ძალადობრივ შეტევას, კანონის მიმართ დაუმორჩილებლობას და ძალადობის წახალისებას, თავის გამოცხადებას კანონგარეშედ, ნებისმიერ დემოკრატიულ სახელმწიფოში, დასავლეთში, პასუხი ექნება ზუსტად ისეთი, როგორიც აქვს საქართველოში, ვინაიდან საქართველო არის დემოკრატიული სახელმწიფო და ვინც კანონზე ზემოთ აყენებს თავს ის სცდება.
მთელმა საზოგადოებამ იცის რომ ნიკანორ მელიას შეთავაზებული ჰქონდა გირაოს გადახდა, მეც მივმართე ოპოზიციას და პირადად მას, რომ ვითარების განმუხტვის ერთადერთი საშუალება იყო, რომ დამორჩილებოდა კანონს.
გარწმუნებთ, რომ დასავლური ღირებულებები გახლავთ კანონის უზენაესობის პრინციპი.
დასავლური დემოკრატია გახლავთ, რომ საკუთარი ქვეყნის პარლამენტზე ძალადობრივი შეტევა არის შეუწყნარებელი,“ - აღნიშნა მან.
ინფორმაციისთვის, დღეს, სამართალდამცავმა ორგანოებმა ნიკა მელია „ერთიანი ნაციონალური მოძრაობის“ ოფისში დააკავეს.
აგრეთვე დაინტერესდებით:
„არ გადაიხადა, დაიჭირეს“ - ირაკლი კობახიძის განცხადება ნიკა მელიას დაკავებაზე
