მთავარი

ძიება

ვიდეო

ქვიზები

კონტაქტი

„ტოცილიზუმაბი სარწმუნოდ აუმჯობესებს გამოსავლებს COVID 19-ით მძიმე და კრიტიკულად მძიმე ავადმყოფებში“- თენგიზ ცერცვაძე

ტოცილიზუმაბი
1623344495
COVID-19

ინფექციური პათოლოგიისა და შიდსის ცენტრის დირექტორმა თენგიზ ცერცვაძემ გამოაქვეყნა წერილი, რომელშიც საუბარია თუ როგორ ეხმარება მედიკამენტი ტოცილიზუმაბი კორონავირუსით ინფიცირებულ მძიმე მდგომარეობაში მყოფ პაციენტებს.

როგორც თენგიზ ცერცვაძე აღნიშნავს, COVID-19-ით პაციენტებში გარდაცვალების მაჩვენებლის (ე.წ. CFR) მინიმუმამდე შემცირების და შესაბამისად, გადარჩენის მაჩვენებლის გაზრდისათვის ე.წ. სტანდარტული მკურნალობის და მოვლის სერვისების მიწოდებასთან ერთად დიდი მნიშვნელობა აქვს ინოვაციური მეთოდების და მიდგომების (რემდესივირი, ტოცილიზუმაბი, კონვალესცენტის პლაზმა, მონოკლონური ანტისხეულები, პლაზმაფერეზი, სისხლის ექსტრაკორპორული გაწმენდა, და სხვ.) სწორ და დროულ გამოყენებას.

„ე.წ. არასტანდარტული მედიკამენტებიდან ერთ-ერთი ყველაზე ეფექტიანი საშუალებაა (უმნიშვნელოვანესია) ინტერლეიკინ-6-ის (IL-6) რეცეპტორის საწინააღმდეგო სპეციფიკური მონოკლონური ანტისხეულები - ტიცილიზუმაბი, რომელიც გამოიყენება COVID-19-ის დროს განვითარებული ე.წ. ციტოკინური შტორმის სამკურნალოდ.

ა.წ. იანვარ-თებერვალში გამოქვეყნებული დიდ ბრიტანეთში ჩატარებული სერიოზული კვლევების შედეგების მიხედვით სწორი გამოყენების შემთხვევაში ტოცილიზუმაბი მძიმე და კრიტიკულად მძიმე COVID-19-ით ავადმყოფებში სარწმუნოდ ამცირებს სიკვდილობას, პაციენტების ჰოსპიტალში დაყოვნების ხანგრძლივობას და მექანიკური ვენტილაციის საჭიროებას.

ჩვენ ტოცილიზუმაბს წარმატებით ვიყენებთ ჯერ კიდევ COVID პანდემიის ადრეული პერიოდიდან, თუმცა რიგი ობიექტური, თუ სუბიექტური მიზეზების გამო ამ მედიკამენტს ყველა COVID კლინიკა დღემდე არ იყენებს, რასაც არავითარი გამართლება არა აქვს.

გვინდა მოვიყვანოთ ტოცილიზუმაბის წარმატებული გამოყენების თვალსაჩინო მაგალითი.

„ჩაფიძის გულის ცენტრის“ COVID კლინიკაში ა.წ. მაის-ივნისის თვეებში ტოცილიზუმაბით წარმატებით უმკურნალეს შვიდ მძიმე და კრიტიკულად მძიმე COVID ავადმყოფს (ექვსი მათგანი გამოჯანმრთელდა და მხოლოდ ერთი პაციენტი რჩება კრიტიკულად მძიმე), რაც ძალიან კარგი შედეგია.

„ჩაფიძის გულის ცენტრი“ ქვეყნის წამყვანი კარდიოლოგიური კლინიკაა, მაგრამ აქ 2020 წლის ნოემბრიდან ფუნქციონირებს COVID განყოფილება, რომელშიც ტოცილიზუმაბის გარდა წარმატებით იყენებენ სხვა თანამედროვე მიდგომებსაც - პაციენტების მართვა მულტიდისციპლინური გუნდის მიერ, ჟანგბადის მიწოდება მაღალი ნაკადით - ე.წ. high flow, რემდესივირი და სხვ. შედეგიც სახეზეა. კლინიკას აქვს COVID-ით ჰოსპიტალიზებული პაციენტების გარდაცვალების ქვეყანაში ერთ-ერთი ყველაზე დაბალი მაჩვენებელი (1,46%) და ეს მიუხედავად იმისა, რომ კლინიკაში ცენტრის სპეციფიკის გათვალისწინებით როგორც წესი ხვდებიან COVID ავადმყოფები გულის და ფილტვების მძიმე თანმხლები დაავადებებით.

ტოცილიზუმაბი ძლიერმოქმედი პრეპარატია, აქვს მკაცრად განსაზღვრული ჩვენებები და უკუჩვენებები. ამიტომ ამ მედიკამენტის დანიშვნა და გამოყენება შესაძლებელია მხოლოდ შესაბამისი კომპეტენციის და გამოცდილების მქონე სპეციალისტების მიერ.

„ჩაფიძის გულის ცენტრის“ , ისევე როგორც ზოგიერთი სხვა COVID კლინიკის (ინფექციური პათოლოგიის და შიდსის ცენტრი, ნ. ყიფშიძის სახელობის ცენტრალური საუნივერსიტეტო კლინიკა, კლინიკა „ნიუ ვიჟენი“, კლინიკა „თბილისი ცენტრალი“ და სხვ.), წარმატებული გამოცდილება გვიჩვენებს, რომ ტოცილიზუმაბი უფრო ფართოდ უნდა იქნეს გამოყენებული ქვეყნის წამყვანი COVID კლინიკების მიერ, რა თქმა უნდა, ჩვენებების და უკუჩვენებების მკაცრად გათვალისწინებით“-აღნიშნულია თენგიზ ცერცვაძის მიერ გავრცელებულ ინფორმაციაში.

რა არის ტოცილიზუმაბი? - ეს ლაბორატორიის პირობებში გამოყვანილი ანტისხეულები ძალიან ჰგავს ჩვენი იმუნიტეტის მიერ გამომუშავებულ ჩვეულებრივ ანტისხეულებს, მაგრამ მათგან განსხვავებით, ამ უკანასკნელს უფრო კონკრეტული, ზუსტი სამიზნე აქვს.

იხილეთ აგრეთვე:

✅„იმის საფუძველი, რომ ეპიდვითარების კუთხით საქართველო მაღალი საშიშროების დონის ქვეყნად გამოცხადდეს, არ არსებობს“ - ივანე ჩხაიძე

✅„სინოვაკის“ ვაქცინის მეორე დოზის მისაღებად მოქალაქეთა რეგისტრაცია დაიწყო

✅„მეოთხე ტალღა შეიძლება იყოს აგვისტოს ბოლოს - შემოდგომაზე“- ამირან გამყრელიძე