„ამის დაჯერება შესაძლებელი იქნებოდა, რუსებს აქამდე არაერთხელ რომ არ გაეტეხათ სიტყვა ჰუმანიტარული დერეფნების შესახებ“ - ვერეშჩუკი რუსეთის განცხადებას უარყოფს
1650889679
რუსეთის თავდაცვის სამინისტრომ გამოაცხადა საომარი მოქმედებების სავარაუდო შეწყვეტა მარიუპოლის „აზოვსტალის“ ქარხნის ტერიტორიაზე, რათა მოხდეს მშვიდობიანი მოსახლეობის ევაკუაცია. უკრაინის ვიცე პრემიერ-მინისტრის ირინა ვერეშჩუკის განცხადებით, ამის შესახებ შეთანხმება არ არსებობს და შესაბამისად, ევაკუაცია უსაფრთხო არ არის.
„ამის დაჯერება შესაძლებელი იქნებოდა, რუსებს აქამდე არაერთხელ რომ არ გაეტეხათ სიტყვა ჰუმანიტარული დერეფნების შესახებ. ვიცი, რასაც ვამბობ, რადგან პრეზიდენტის სახელით მე პირადად ვაწარმოებ ასეთ მოლაპარაკებებს და ვაწყობ ჰუმანიტარულ დერეფნებს“, - განაცხადა ვერეშჩუკმა.
მისი თქმით, ჰუმანიტარული დერეფნის მოწყობა მხოლოდ ცალმხრივად გამოცხადდა და შესაბამისად, საფრთხე მშვიდობიანი მოსახლეობისთვის კვლავ არსებობს.
„ასე რომ, მე ოფიციალურად და საჯაროდ ვაცხადებ: სამწუხაროდ, დღეს „აზოვსტალიდან“ ჰუმანიტარული დერეფნების შესახებ შეთანხმებები არ არსებობს“, - დასძინა ვერეშჩუკმა.
მინისტრმა, ასევე, მოუწოდა გაეროს გენერალურ მდივანს, ანტონიო გუტერეშს, იმოქმედოს როგორც ინიციატორი და გარანტორი „აზოვსტალიდან“ მშვიდობიანი მოსახლეობის ევაკუაციაში.
„იმედი გვაქვს, რომ გაეროს გენერალურ მდივანსა და რუსეთის წარმომადგენლებს შორის მოლაპარაკებები ნაყოფიერი იქნება“, - დასძინა მინისტრმა.
აგრეთვე წაიკითხეთ:
✔️ კადიროვმა ქალაქ რუბეჟნოეს სრული გათავისუფლება გამოაცხადა - რუსული მედია
✔️ 5-10 წელიწადში რუსეთისგან ახალი ომი იქნება მოსალოდნელი - ლიტვის შეიარაღებული ძალების მეთაური
