ჩეხეთის პრეზიდენტი: ყველა, ვინც ევროკავშირიდან და ნატოდან გასვლისკენ მოუწოდებს, ქვეყანას ზიანს აყენებს
1755610316
ჩეხეთის პრეზიდენტმა პეტრ პაველმა განაცხადა, რომ ნატოსა და ევროკავშირში წევრობა ჩეხეთის რესპუბლიკის უსაფრთხოებისა და კეთილდღეობის საუკეთესო გარანტიაა.
მისი თქმით, ნებისმიერი პოლიტიკური პარტია, რომელიც არჩევნებამდე ამ ორგანიზაციიდან რომელიმედან გასვლისკენ მოუწოდებს, ჩეხეთის რესპუბლიკას ზიანს აყენებს.
„უცნაური და შესაძლოა სამარცხვინოც კი იქნებოდა, თუ ქვეყნის პრეზიდენტი არჩევნებამდე არ დააკვირდებოდა პოლიტიკური კამპანიის განვითარებას, რომელიც განსაზღვრავს ჩვენი ქვეყნის განვითარებას მომდევნო ოთხი წლის განმავლობაში. მე ვადევნებ თვალყურს სხვადასხვა პოლიტიკური პარტიის პოლიტიკოსების თითქმის ყველა გამოსვლას.
საკმაოდ ხშირად მესმის დაპირებები, რომლებსაც არ ახლავს კონკრეტული არგუმენტები იმის შესახებ, თუ როგორ უნდა შესრულდეს ეს დაპირებები. ასევე, მესმის დაპირებები, რომლებიც ხელს არ შეუწყობს ქვეყნის უსაფრთხოებას ან კეთილდღეობას. და ეს მაშფოთებს“, - აცხადებს ჩეხეთის პრეზიდენტი.
უსაფრთხოება და კეთილდღეობა პაველისთვის ახალი მთავრობის დანიშვნისას მთავარი კრიტერიუმები იქნება.
„ჩვენი ქვეყნის უსაფრთხოების საუკეთესო გარანტია ნატოს წევრობა და დემოკრატიულ ქვეყნებთან ალიანსი არის. ასევე, დარწმუნებული ვარ, რომ ჩვენი კეთილდღეობისთვის, ჩვენი ქვეყნის განვითარებისა და წარმატებისთვის კარგია, რომ ის ევროკავშირში იყოს. და მე არ ვამბობ, რომ ნატოს ან ევროკავშირს თავისი ნაკლოვანებები არ აქვს. მაგრამ ჩვენ სხვა უკეთესი ალტერნატივა არ გვაქვს.
ამიტომ, ჩემი აზრით, ყველა, ვინც ჩეხეთის რესპუბლიკას ნატოდან ან ევროკავშირიდან გასვლისკენ მოუწოდებს, ჩვენს ქვეყანას ზიანს აყენებს. და ეს არის ერთ-ერთი კრიტერიუმი, რომელსაც გავითვალისწინებ, როდესაც ახალი მთავრობის შექმნის წინადადებას მივიღებ“, - დასძინა პაველმა.
პაველმა, ასევე, მოუწოდა ამომრჩევლებს, არ მისცენ ხმა მათ, ვინც დაპირებებს იძლევა, მაგრამ არ ამბობს, თუ როგორ შეასრულებენ მათ.
